Click it and Unblock the Notifications
ಎಲ್ಲಿ ಹೋದರೂ, ಎಲ್ಲಿ ನೋಡಿದರೂ ಜನರು ಸಿಕ್ಕಾಪಟ್ಟೆ ಬ್ಯುಸಿ. ಕೆಲವರಿಗಂತೂ ತಮ್ಮವರಿಗಿರಲಿ ತಮಗಾಗಿಯೂ ಸಮಯ ಸಿಗುವುದೇ ಇಲ್ಲ. ಸ್ನೇಹಿತರು, ಕುಟುಂಬ ಅಥವಾ ಸಂಗಾತಿ ಜೊತೆ ಸಮಯ ಕಳೆಯಲು ಸಾಧ್ಯವಾಗುವುದಿಲ್ಲ. ಅದಕ್ಕಾಗಿಯೇ ಜನರು ಸಾಮಾನ್ಯವಾಗಿ ರಜಾದಿನಗಳು ಬಂತೆಂದರೆ ಪ್ರವಾಸಗಳನ್ನು ಆಯೋಜಿಸುತ್ತಾರೆ. ಏಕೆಂದರೆ ಕೆಲವರು ಪ್ರಯಾಣಿಸಲು ತುಂಬಾ ಇಷ್ಟಪಡುತ್ತಾರೆ. ಅದರಲ್ಲೂ ಕೆಲವರು ವಿಭಿನ್ನ ಸಾಹಸಗಳಿಗೆ ಕೈ ಹಾಕಲು ಪ್ರಯತ್ನಿಸುತ್ತಾರೆ. ಅಂದರೆ ವಿಶೇಷವಾದ ಜಾಗಗಳು, ಚಟುವಟಿಕೆಗಳು ಹೀಗೆ.. ಇಂತಹ ಪ್ರವಾಸಿ ಪ್ರಿಯರಿಗೆ ಬಹುಶಃ ಈ ಲೇಖನ ತುಂಬಾ ಪ್ರಯೋಜನಕಾರಿಯಾಗಲಿದೆ. ಏಕೆಂದರೆ ಇಂದು ನಾವು ನಿಮಗೆ ಹೇಳಲು ಹೊರಟಿರುವ ಆ ಪ್ರವಾಸಿ ತಾಣ ಸಂಪೂರ್ಣವಾಗಿ ವಿಭಿನ್ನ ಮತ್ತು ವಿಶಿಷ್ಟವಾಗಿದೆ. ಹಾಗಾದರೆ ಬನ್ನಿ ಆ ಸ್ಥಳದ ಬಗ್ಗೆ ತಿಳಿಯೋಣ.
ನಿಮಗೆಲ್ಲರಿಗೂ ತಿಳಿದಿರುವಂತೆ ನಮ್ಮ ಭಾರತದಲ್ಲಿ ಒಂದಕ್ಕಿಂತ ಹೆಚ್ಚು ಸುಂದರವಾದ ಸ್ಥಳಗಳಿವೆ. ಅವುಗಳ ಸೌಂದರ್ಯವು ಜನರನ್ನು ತಮ್ಮತ್ತ ಆಕರ್ಷಿಸುತ್ತಲೇ ಇರುತ್ತದೆ. ನಾವಿಲ್ಲಿ ಹೇಳಲು ಹೊರಟಿರುವ ಸ್ಥಳ ಸಹ ಅದೆಷ್ಟು ವಿಶೇಷವಾಗಿದೆಯೆಂದರೆ ಅಲ್ಲಿನ ಸೇತುವೆ ಮರಗಳ ಬೇರುಗಳಿಂದ ನಿರ್ಮಾಣವಾಗಿದೆ. ಇದನ್ನು ಕೇಳಿದಾಗ ನಿಮಗೆ ನಂಬಲು ಅಸಾಧ್ಯ ಅನಿಸುತ್ತದೆ. ಈಗಂತೂ ಎಐ ಬಂದ ಮೇಲೆ ಭೂಮಿ ಮೇಲಿರದ ಕಾಲ್ಪನಿಕ ದೃಶ್ಯಗಳು ಸಹ ಕಾಣಿಸಿಕೊಳ್ಳುತ್ತಿವೆ. ಹಾಗಾಗಿ ನಿಮಗೆ ಈ ಸ್ಥಳವನ್ನು ನೋಡಿದಾಗ ಹೀಗೂ ಉಂಟೆ ಎಂದು ಅನಿಸಬಹುದು. ಇಂತಹ ಕಾಲ್ಪನಿಕ ಸ್ಥಳಗಳನ್ನು ನಮಗೇನಿದ್ದರೂ ಚಿತ್ರಕಲೆ, ಚಲನಚಿತ್ರಗಳಲ್ಲಿ ನೋಡಿಯಷ್ಟೇ ರೂಢಿ. ಇಷ್ಟು ಹೇಳಿದ ಮೇಲೆ ಈ ಸ್ಥಳ ಅನ್ವೇಷಿಸಲು ಎಷ್ಟು ಅದ್ಭುತವಾಗಿದೆ ಎಂದು ನೀವು ಊಹಿಸಿಕೊಳ್ಳಿ. ನಿಮಗೂ ಕೂಡ ಇಂತಹ ಸ್ಥಳವನ್ನು ನೋಡಬೇಕೆಂದು ಅನಿಸಿದರೆ ಈ ಸುದ್ದಿಯನ್ನು ಕೊನೆಯವರೆಗೂ ಓದಿ.
200 ವರ್ಷಗಳ ಇತಿಹಾಸ
ಈಗಿಲ್ಲಿ ಹೇಳುತ್ತಿರುವ ಆ ಸುಂದರವಾದ ಸ್ಥಳ ಬೇರೆ ಎಲ್ಲಿಯೋ ಇಲ್ಲ, ಭಾರತದ ಮೇಘಾಲಯ ರಾಜ್ಯದಲ್ಲಿದೆ. ಲಿವಿಂಗ್ ಟ್ರೀ ರೂಟ್ ಬ್ರಿಡ್ಜ್ ಎಂದು ಕರೆಯಲ್ಪಡುವ ಇದರ ಇತಿಹಾಸ 200 ವರ್ಷಗಳಷ್ಟು ಹಳೆಯದು ಎಂದು ಪರಿಗಣಿಸಲಾಗಿದೆ. ಇದರಲ್ಲಿ ಏಕಕಾಲಕ್ಕೆ 50 ಮಂದಿ ಒಂದು ತುದಿಯಿಂದ ಇನ್ನೊಂದು ತುದಿಗೆ ಹೋಗಬಹುದು. ಸೇತುವೆ ಬಹಳಷ್ಟು ಹಳೆಯದಾಗಿದ್ದರೂ ಯಾವುದೇ ರೀತಿ ದುರ್ಬಲಗೊಂಡಿಲ್ಲ. ಈ ಸೇತುವೆಯನ್ನು ಹತ್ತುವುದು ವಿಭಿನ್ನ ಅನುಭವವನ್ನು ನೀಡುತ್ತದೆ. ಎಳೆಗಳಿಂದ ನೇಯ್ದಂತೆ ಕಾಣುವ ಮರಗಳ ಜೀವಂತ ಬೇರುಗಳಿಂದ ಇದನ್ನು ತಯಾರಿಸಲಾಗಿದೆ ಎಂದು ತಿಳಿದರೆ ನಿಮಗೆ ಆಶ್ಚರ್ಯವಾಗುತ್ತದೆ. ಇದು ದಟ್ಟವಾದ ಕಾಡಿನ ಮಧ್ಯದಲ್ಲಿದೆ. ಇದನ್ನು ಮಾಡಲು 15 ವರ್ಷಗಳ ಸುದೀರ್ಘ ಸಮಯ ತೆಗೆದುಕೊಂಡಿತು. ಅದರ ಅನೇಕ ಜಡೆಗಳು ನೀರಿನಲ್ಲಿ ನೆನೆದರೆ ಅದರ ಸೌಂದರ್ಯವು ಮತ್ತಷ್ಟು ಹೆಚ್ಚಾಗುತ್ತದೆ. ಆದರೆ ಅದು ಕ್ರಮೇಣ ಕೊಳೆಯುತ್ತದೆ. ಆಗ ಈ ಸೇತುವೆ ದುರ್ಬಲವಾಗುತ್ತದೆ, ಬದಲಿಗೆ ಹೊಸ ಬೇರುಗಳು ಅದರ ಸ್ಥಳದಲ್ಲಿ ಹೊರಹೊಮ್ಮುತ್ತವೆ. ಈ ಸಮಯದಲ್ಲಿನ ದೃಶ್ಯ ನೋಡುವುದಕ್ಕೆ ಬಹಳ ಅದ್ಭುತವಾಗಿರುತ್ತದೆ.
ವಿಶ್ವ ಪರಂಪರೆಯ ತಾಣ
ಫೋಟೋ ಶೂಟ್ ಮಾಡಲು ಬಯಸುವವರು ಸಹ ಇಲ್ಲಿಗೆ ಬರಬಹುದು. ಈ ಸೇತುವೆಯನ್ನು ಯುನೆಸ್ಕೋ ವಿಶ್ವ ಪರಂಪರೆಯ ತಾಣವೆಂದು ಘೋಷಿಸಲಾಗಿದೆ. ಹಾಗೆ ನೋಡಿದರೆ ಕೆಲವೇ ಜನರಿಗೆ ಇದರ ಬಗ್ಗೆ ತಿಳಿದಿದೆ. ಇದು ಸಂಪೂರ್ಣವಾಗಿ ನೈಸರ್ಗಿಕವಾಗಿ ತಯಾರಿಸಲ್ಪಟ್ಟಿದೆ. ಆದರೆ, ಇಲ್ಲಿಗೆ ಬರುವ ಪ್ರವಾಸಿಗರು ಈ ಸೇತುವೆಯನ್ನು ಒಮ್ಮೆ ದಾಟುವುದು ಖಂಡಿತ, ಆದರೆ ಈ ಸಮಯದಲ್ಲಿ ಅದು ಮಧ್ಯದಲ್ಲಿ ಒಡೆಯಬಹುದು ಎಂಬ ಭಯವೂ ಇದೆ, ಆದರೆ ಅಂತಹದ್ದೇನೂ ಸಂಭವಿಸುವುದಿಲ್ಲ. ನಿಮ್ಮ ಸ್ನೇಹಿತರೊಂದಿಗೆ ನೀವು ಇಲ್ಲಿಗೆ ಹೋದರೆ ಅದರ ಮಜವೇ ಬೇರೆ. ಮಳೆಗಾಲವು ಇಲ್ಲಿ ಅತ್ಯಂತ ಪ್ರತಿಕೂಲವಾದ ಸಮಯವೆಂದು ಪರಿಗಣಿಸಲಾಗಿದೆ.
ಗಮನಿಸಿ: ಸೇತುವೆಯ ಕೆಳಗೆ 3500-3600 ಮೆಟ್ಟಿಲುಗಳಿವೆ. ಹಾಗಾಗಿ ಫಿಟ್ ಆಗಿರುವವರು ಇಲ್ಲಿ ತೆರಳಬಹುದು. ಹೆಚ್ಚು ಲಗೇಜ್ ಒಯ್ಯಬೇಡಿ. ದಾರಿಯುದ್ದಕ್ಕೂ ತಿಂಡಿ ಮತ್ತು ನೀರಿಗಾಗಿ ಅಂಗಡಿಗಳಿವೆ. ಆದ್ದರಿಂದ ಆ ವಸ್ತುಗಳನ್ನು ಸಾಗಿಸಲು ಹೆಚ್ಚು ಚಿಂತಿಸಬೇಡಿ.
ಹೋಗುವುದು ಹೇಗೆ?
ಸೇತುವೆಯು ಚಿರಾಪುಂಜಿಗೆ ಸಮೀಪದಲ್ಲಿದೆ. ಹಾಗಾಗಿ ಪ್ರಯಾಣಿಕರು ಸಾಮಾನ್ಯವಾಗಿ ಅಸ್ಸಾಂನ ಪ್ರಮುಖ ಸಾರಿಗೆ ಕೇಂದ್ರವಾದ ಗುವಾಹಟಿಗೆ ಆಗಮಿಸುತ್ತಾರೆ. ಗುವಾಹಟಿಯಿಂದ ಮೇಘಾಲಯದ ರಾಜಧಾನಿಯಾದ ಶಿಲ್ಲಾಂಗ್ಗೆ ಟ್ಯಾಕ್ಸಿ ಅಥವಾ ಬಸ್ ಮೂಲಕ 4-5 ಗಂಟೆಗಳ ಪ್ರಯಾಣವನ್ನು ಮಾಡಬಹುದು ಅಥವಾ ನೇರವಾಗಿ ಚಿರಾಪುಂಜಿಗೆ ಖಾಸಗಿ ಕಾರಿಗೆ ವ್ಯವಸ್ಥೆ ಮಾಡಬಹುದು. ಪರ್ಯಾಯವಾಗಿ, ನೀವು ಶಿಲ್ಲಾಂಗ್ ವಿಮಾನ ನಿಲ್ದಾಣಕ್ಕೆ ಬರಬಹುದು. ಆದರೂ ಆಯ್ಕೆಗಳು ಸೀಮಿತವಾಗಿದ್ದು, ರಸ್ತೆಯ ಮೂಲಕ ಸಾಗಬೇಕಾಗುತ್ತದೆ. ಚಿರಾಪುಂಜಿಯಲ್ಲಿ ಸ್ಥಳೀಯ ಸಾರಿಗೆಗಳೆಂದರೆ ಟ್ಯಾಕ್ಸಿಗಳು ಮತ್ತು ಶೇರಿಂಗ್ ಕ್ಯಾಬ್ಗಳು ಲಭ್ಯವಿದ್ದು, ಅದ್ಭುತ ಪ್ರಾಕೃತಿಕ ದೃಶ್ಯಗಳು ಮತ್ತು ಆಕರ್ಷಣೆಗಳನ್ನು ಅನ್ವೇಷಿಸಲು ಅನುವು ಮಾಡಿಕೊಡಲಾಗುತ್ತದೆ.
