Click it and Unblock the Notifications
ಪೋರ್ಚುಗೀಸ ಭಾಷೆಯಲ್ಲಿ ಮೀರಾಮಾರ ಎಂದರೆ 'ಸಮುದ್ರ ನೋಟ' ಇಲ್ಲವೆ 'ಕಡಲ ತೀರದ ನೋಟ' ಎಂದಾಗುತ್ತದೆ. ಹೌದು...ಹೆಸರೆ ಹೇಳುವ ಹಾಗೆ ಮೀರಾಮರ ಕಡಲ ತೀರವು ಅದ್ಭುತವಾದ ಮೈಸಿರಿಯನ್ನು ಹೊಂದಿದ್ದು ನೋಡುಗರನ್ನು ಪುಳಕಿತಗೊಳಿಸುತ್ತದೆ. ಇದು ಗೋವಾದಲ್ಲಿ ಉತ್ತಮ ಸ್ಥಳದಲ್ಲಿ ರೂಪಗೊಂಡಂತಹ ಕಡಲ ತೀರಗಳಲ್ಲಿ ಒಂದಾಗಿದ್ದು, ರಾಜಧಾನಿಯಾದ ಪಣಜಿಯಿಂದ ಕೇವಲ 3 ಕಿ.ಮೀ ದೂರದಲ್ಲಿದೆ. ಇಲ್ಲಿ ಮಂಡೋವಿ ನದಿಯು ಅರೇಬಿಯನ್ ಸಮುದ್ರವನ್ನು ಸೇರುತ್ತದೆ. ಇಲ್ಲಿ ತಂಗಲು ಬಹುಸಂಖ್ಯೆಯಲ್ಲಿ ಹೊಟೆಲಗಳಿದ್ದು ಸುಸಜ್ಜಿತವಾಗಿವೆ. ಈ ಒಂದು ಕಡಲ ತೀರದಲ್ಲಿ ಹೊಳೆಯುವ ಮರಳಿನ ಜೊತೆ ಸಾಲು ಸಾಲಾಗಿರುವ ಪಾಮ ಗಿಡಗಳನ್ನು ಕಾಣಬಹುದು. 2 ಕಿ.ಮೀ ಉದ್ದವನ್ನು ಹೊಂದಿರುವ ಈ ಕಡಲ ಕಿನಾರೆಯನ್ನು ನಡೆಯುತ್ತ ಆನಂದಿಸಬಹುದು. ಪ್ರತಿ ಹುಣ್ಣಿಮೆಯ ರಾತ್ರಿಯಂದು ಈ ಕಡಲ ತೀರದ ಮರುಳು ಹೊಳೆಯುವುದು ಇದರ ವಿಶೇಷವಾಗಿದೆ.
ನವಂಬರ ಮತ್ತು ಮಾರ್ಚ ಮಧ್ಯದ ಸಮಯವು ಈ ಬೀಚಿಗೆ ಭೇಟಿ ನೀಡಲು ಸೂಕ್ತವಾಗಿದ್ದು, ವಿವಿಧ ಜನಾಂಗಗಳ ಜನರ ಜೊತೆ ವಲಸೆ ಬಂದ ಹಕ್ಕಿಗಳು ಕಾಣಸಿಗುವುದರಿಂದ ಮತ್ತಷ್ಟು ಸೊಗಸಾಗಿರುತ್ತದೆ. ಇತರೆ ಪ್ರೇಕ್ಷಣೀಯ ಸ್ಥಳಗಳಾದ ಡೊನಾ ಪೌಲಾ ಮತ್ತು ಅಗುವಾಡಾ ಕೋಟೆ ಹತ್ತಿರದಲ್ಲೆ ಇದ್ದು ಶಾಪಿಂಗ ಗಾಗಿ ಹಲವು ಮಳಿಗೆಗಳಿರುವುದನ್ನೂ ಕೂಡ ಈ ಕಡಲ ತೀರದಲ್ಲಿ ಕಾಣಬಹುದು.ಜನಪ್ರೀಯ ಕಡಲ ತೀರವಾಗಿರುವ ಮೀರಾಮಾರನ್ನು ಪಣಜಿಯಿಂದ ಬಸ್ಸು ಇಲ್ಲವೆ ವಿಮಾನ ನಿಲ್ದಾಣದಿಂದ ಕ್ಯಾಬ್ ಮುಖಾಂತರ ಸುಲಭವಾಗಿ ತಲುಪಬಹುದು.
