ಪತಿರಮನ್ನಲ್ ಎಂಬುದು ಕುಮರಕೊಮ್ ಸಮೀಪದ ಒಂದು ಸುಂದರವಾದ ದ್ವೀಪವಾಗಿದೆ. ಇದು ಆನಂದ ಪದ್ಮನಾಭನ್ ತೊಪ್ಪು ಮತ್ತು ಪಾತಿರ ತೊಪ್ಪು ಎಂಬ ಹೆಸರುಗಳಿಂದಲು ಚಿರಪರಿಚಿತವಾಗಿದೆ. ವೆಂಬನಾಡ್ ಸರೋವರದ ನಡುವೆ ನೆಲೆಗೊಂಡಿರುವ ಈ ನಯನ ಮನೋಹರವಾದ ದ್ವೀಪವು ಸುಮಾರು 10 ಎಕರೆಗಳಷ್ಟು ವಿಸ್ತೀರ್ಣವನ್ನು ಹೊಂದಿದೆ. ಕೊಟ್ಟಾಯಂ ಮತ್ತು ಅಲೆಪ್ಪಿ ಜಿಲ್ಲೆಗಳ ಗಡಿಗೆ ಹೊಂದಿಕೊಂಡಿರುವ ಈ ದ್ವೀಪಕ್ಕೆ, ಕುಮರಕೊಮಿನಿಂದ ದೋಣಿ ಮೂಲಕ ತಲುಪಬಹುದು.
ಈ ದ್ವೀಪಕ್ಕೆ ಹಿನ್ನೀರಿನ ಹಿನ್ನಲೆಯಲ್ಲಿ ಸಾಗುವ ಪಯಣವು ಎಂತಹವರನ್ನು ಸಹ ಮಂತ್ರಮುಗ್ಧಗೊಳಿಸುತ್ತದೆ. ಅಲ್ಲದೆ ಈ ದ್ವೀಪವು ತಾತ್ಕಲಿಕವಾಗಿ ಸುಮಾರು 50 ಜಾತಿಯ ವಲಸೆ ಹಕ್ಕಿಗಳಿಗೆ ಆಶ್ರಯವನ್ನು ನೀಡುತ್ತದೆ. ಇದರ ಜೊತೆಗೆ 91 ಬಗೆಯ ಸ್ಥಳೀಯ ಹಕ್ಕಿಗಳ ಪ್ರಭೇದವನ್ನು ಇಲ್ಲಿ ಗುರುತಿಸಲಾಗಿದೆ.
ಈ ಹಚ್ಚ ಹಸಿರಿನಿಂದ ಕೂಡಿದ ದ್ವೀಪವು ತನ್ನ ಶ್ವೇತ ವರ್ಣದ ಮರಳಿನಿಂದ, ನಿಶ್ಕಲ್ಮಷವಾದ ಸೌಂದರ್ಯದಿಂದ ಮತ್ತು ಪ್ರಶಾಂತವಾದ ವಾತಾವರಣದಿಂದಾಗಿ ಪ್ರವಾಸಿಗರನ್ನು ತನ್ನತ್ತ ಆಕರ್ಷಿಸುತ್ತಿದೆ. ಜನವಸತಿಯಿಲ್ಲದ ಈ ಸಣ್ಣ ದ್ವೀಪವು ತನ್ನ ಶಾಂತತೆಯಿಂದಾಗಿ ಪರಿಸರ ಅದ್ಭುತವನ್ನು ಸವಿಯುವ ಅವಕಾಶವನ್ನು ನೀಡುತ್ತಿದೆ. ಯಾರು ಛಾಯಗ್ರಹಣದಲ್ಲಿ ಆಸಕ್ತಿ ಹೊಂದಿರುತ್ತಾರೋ , ಅವರಿಗೆ ಈ ದ್ವೀಪವು ಪ್ರತಿಕೋನದಲ್ಲಿಯು ಸೌಂದರ್ಯವನ್ನು ಒದಗಿಸುವುದರಲ್ಲಿ ಯಾವುದೇ ಸಂಶಯವಿಲ್ಲ.