Click it and Unblock the Notifications
ಮೃಗವಾಣಿ ರಾಷ್ಟ್ರೀಯ ಉದ್ಯಾನವನವು ಹೈದರಬಾದಿನಿಂದ 25 ಕಿ.ಮೀ ದೂರದಲ್ಲಿರುವ ಚಿಲ್ಕೂರ್ ನಲ್ಲಿ ನೆಲೆಗೊಂಡಿದೆ. ಇಲ್ಲಿರುವ ವೈವಿಧ್ಯಮಯ ಸಸ್ಯ ಮತ್ತು ಪ್ರಾಣಿ ಪ್ರಬೇಧಗಳನ್ನು ಕಣ್ತುಂಬಿಕೊಳ್ಳಲು ಪ್ರತಿ ವರ್ಷ ಸಾವಿರಾರು ಪ್ರವಾಸಿಗರು ಇಲ್ಲಿಗೆ ಭೇಟಿಕೊಡುತ್ತಿರುತ್ತಾರೆ. ಈ ಉದ್ಯಾನವನದಲ್ಲಿ ಹತ್ತಿರ ಹತ್ತಿರ 600 ಸಸ್ಯ ಪ್ರಬೇಧಗಳನ್ನು ಕಾಣಬಹುದು. ಇಲ್ಲಿ ಬಿದಿರು, ಪಲಸ್, ಗಂಧದ ಮರ, ತೇಗ, ಪೈಕಸ್ ಮತ್ತು ರೆಲ ಮರಗಳು ಬೆಳೆದಿರುವುದನ್ನು ಕಾಣಬಹುದು. ಇದರೊಂದಿಗೆ ಚಿರತೆಯಿಂದ ಪುನುಗು ಬೆಕ್ಕಿನವರೆಗು ಹಾಗು ಕಾಡುಬೆಕ್ಕಿನಿಂದ ಕಾಡು ಹಂದಿಯ, ಸಾಂಬರ್ ವರೆಗಿನ ಪ್ರಾಣಿಗಳ ಶ್ರೇಣಿಗಳನ್ನು ಕಣ್ತುಂಬಿಕೊಳ್ಳಬಹುದು.
ಅಷ್ಟೇ ಅಲ್ಲದೆ ಮಂಡಲ ಹಾವು ,ನಾಗರಹಾವು , ಹೆಬ್ಬಾವುಗಳ ಜೊತೆಗೆ ಭಾರತೀಯ ಕೇರೆ ಹಾವನ್ನು ಸಹ ಈ ಉದ್ಯಾನವನದಲ್ಲಿ ಕಾಣಬಹುದು. ಹೂವುಗಳ ಮಧುವನ್ನು ಹೀರುವ ಪಕ್ಷಿಗಳನ್ನು ಈ ಉದ್ಯಾನವನದಲ್ಲಿ ಸಾಮಾನ್ಯವಾಗಿ ಕಾಣಬಹುದು. ಯಾರು ಬೇಕಾದರರು ಈ ಉದ್ಯಾನವನಕ್ಕೆ ಹಗಲಿನ ಹೊತ್ತಿನಲ್ಲಿ ಭೇಟಿಕೊಡಬಹುದು. ಧೈರ್ಯವಿದ್ದವರು ಉದ್ಯಾನವನದ ಒಳಗಡೆ ಲಭ್ಯವಿರುವ ಕಾಟೇಜ್ಗಳಲ್ಲಿ ರಾತ್ರಿಯನ್ನು ಕಳೆಯುತ್ತ, ಕಾಡಿನ ವನ್ಯಜೀವಿಗಳನ್ನು ನೋಡಬಹುದು.
