ಹುತಾತ್ಮರಿಗೆ ಗೌರವ ಸೂಚಕವಾಗಿ 1976ರಲ್ಲಿ ಆಂಗ್ಲೊ ಸಿಖ್ ಯುದ್ಧ ಸ್ಮಾರಕವನ್ನು ನಿರ್ಮಿಸಲಾಗಿತ್ತು. ಫಿರೊಜ್ಪುರದ ಮುದ್ಕಿಯಲ್ಲಿ ಬ್ರಿಟಿಷ್ ಸೇನೆ ವಿರುದ್ಧ ಹೋರಾಡಿ ತಮ್ಮ ಜೀವವನ್ನೇ ಅರ್ಪಿಸಿದ ಪಂಜಾಬಿಗಳ ಪರಾಕ್ರಮದ ನೆನಪಿಗಾಗಿ ರಚಿಸಲಾದ ಬೃಹತ್ ವರ್ಣಚಿತ್ರವಿದೆ. ರಾಜಸ್ಥಾನ್ ಚಾನಲ್ ನ ತಟದಲ್ಲಿರುವ ಮೂರು ಮಹಡಿಯ ಕಟ್ಟಡದಲ್ಲಿ ಇತಿಹಾಸದ ಪುಟಗಳಲ್ಲಿ ಅಚ್ಚಳಿಯದೆ ಉಳಿದಿರುವಂತಹ ಹುತಾತ್ಮರು, ಶಸ್ತ್ರಾಸ್ತ್ರಗಳು ಮತ್ತು ರಣರಂಗದಲ್ಲಿ ಧೈರ್ಯ ಮೆರೆದವರ ಚಿತ್ರಗಳನ್ನು ಕೆತ್ತಲಾಗಿದೆ. ಈ ಸ್ಮಾರಕವು ಫಿರೊಜ್ಪುರದಿಂದ 16 ಕಿ.ಮೀ. ದೂರದಲ್ಲಿರುವ ಮೊಗಾ ರಸ್ತೆಯ ಫಿರೊಜ್ ಷಾದಲ್ಲಿದೆ.