ದಿಮಾಪುರದ ಹೃದಯಭಾಗದಲ್ಲಿ ನೆಲೆಗೊಂಡಿರುವ ದಿಮಾಪುರ್ ಓ ಬಾಪ್ಟಿಸ್ಟ್ ಚರ್ಚ್ ಈ ಊರಿಗೆ ಬರುವ ಪ್ರತಿಯೊಬ್ಬ ಪ್ರವಾಸಿಗನು ತಪ್ಪದೆ ಭೇಟಿ ನೀಡಲೆ ಬೇಕಾದ ಸ್ಥಳವಾಗಿದೆ. ಈ ಚರ್ಚ್ ಸುಮಾರು 5000 ಓ ಕುಟುಂಬಗಳ ಮತ್ತು 15000 ಬಾಪ್ಟಿಜೆಡ್ ಸದಸ್ಯರ ಒಂದು ಕೂಟವಾಗಿದ್ದು, ಭಾರತದಲ್ಲಿರುವ ಒಂದು ದೊಡ್ಡ ಬಾಪ್ಟಿಸ್ಟ್ ಚರ್ಚ್ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ. ಈ ಚರ್ಚಿನಲ್ಲಿ ಏಕಕಾಲಕ್ಕೆ 10,000 ಜನ ಪ್ರಾರ್ಥನೆ ಸಲ್ಲಿಸಬಹುದಾದಷ್ಟು ವಿಶಾಲವಾದ ಸ್ಥಳಾವಕಾಶವಿದೆ. ಭಾನುವಾರದಂದು ಇಲ್ಲಿಗೆ ಸಾಂಪ್ರದಾಯಿಕ ಮತ್ತು ಔಪಚಾರಿಕ ವಸ್ತ್ರಗಳಲ್ಲಿ ಬಂದು ಪ್ರಾರ್ಥನೆ ಸಲ್ಲಿಸುವವರನ್ನು ನಾವು ಕಾಣಬಹುದು.
ಸುಮಾರು ಅರ್ಧ ಶತಮಾನದಷ್ಟು ಹಳೆಯದಾದ ಈ ಚರ್ಚ್ ವಾಸ್ತುಶಿಲ್ಪದ ದೃಷ್ಟಿಯಿಂದ ಅತ್ಯಂತ ಶ್ರೇಷ್ಠ ಕಟ್ಟಡವಾಗಿದೆ. ಇದು ಸಹೋದರ ಭಾವನೆ, ಶಾಂತಿ ಮತ್ತು ಪ್ರಸನ್ನತೆಯ ಸಂದೇಶವನ್ನು ಸಾರುತ್ತ ನಿಂತಿದೆ. 1958ರಲ್ಲಿ ಎರಡು ಓ ಕುಟುಂಬಗಳ ಕಾಳಜಿಯಿಂದ ಜನಿಸಿದ ಈ ಸಂಸ್ಥೆಯು ಅಂದಿನಿಂದ ಇಂದಿನವರೆಗು ಬಡ ಬಗ್ಗರ ಅವಶ್ಯಕತೆಗಳನ್ನು ಪೂರೈಸುತ್ತ, ದೇವರ ಸಂದೇಶವನ್ನು ಸಾರುತ್ತ ಬೆಳೆಯುತ್ತಿದೆ. ಪ್ರತಿ ವರ್ಷ ಕ್ರಿಸ್ಮಸ್ ದಿನದಂದು ಈ ಚರ್ಚ್ ದೀಪಾಲಂಕಾರದಿಂದ ವೈಭವಯುತವಾಗಿ ಅಲಂಕಾರಗೊಂಡಿರುತ್ತದೆ.