Click it and Unblock the Notifications
ನೊಹ್ಕಲಿಕೈ ಜಲಪಾತವು ಚಿರಾಪುಂಜಿಗೆ ಸಮೀಪದಲ್ಲಿರುವ ಭಾರತದ ಅತ್ಯಂತ ಎತ್ತರವಾದ ಜಲಪಾತವಾಗಿದೆ. ಚಿರಾಪುಂಜಿಯು ವರ್ಷಪೂರ್ತಿ ಮಳೆಯನ್ನು ಕಾಣುವ ಸ್ಥಳ. ಹಾಗಾಗಿ ಈ ಜಲಪಾತವು ವರ್ಷಪೂರ್ತಿ ಧುಮ್ಮಿಕ್ಕಿ ಹರಿಯುತ್ತಲೆ ಇರುತ್ತದೆ. ಆದಾಗಿಯೂ ಒಣ ಹವೆಯಿರುವ ಡಿಸೆಂಬರ್ ನಿಂದ ಫೆಬ್ರವರಿ ತಿಂಗಳುಗಳ ಕೆಲ ದಿನಗಳಲ್ಲಿ ಈ ಜಲಪಾತವು ಸಹ ಇಂಗಿ ಹೋಗುತ್ತದೆ. ಈ ಜಲಪಾತದ ಕೆಳಗೆ ಒಂದು ಸುಂದರವಾದ ಕೊಳ ನಿರ್ಮಾಣವಾಗಿದ್ದು, ಸದಾ ಹಸಿರಿನಿಂದ ಕೂಡಿರುತ್ತದೆ. ದಂತಕಥೆಯ ಪ್ರಕಾರ ಈ ಜಲಪಾತದ ಪಕ್ಕದಲ್ಲಿರುವ ಶಿಖರದ ತುದಿಯಿಂದ ಕ ಲಿಕೈ ಎಂಬ ಹುಡುಗಿಯೊಬ್ಬಳು ಕೆಳಕ್ಕೆ ಹಾರಿದಳಂತೆ, ಹಾಗಾಗಿ ಈ ಜಲಪಾತಕ್ಕೆ ನೊಹ್ಕಲಿಕೈ ಎಂಬ ಹೆಸರು ಬಂದಿತಂತೆ.
ಹಿಂದೆ ನೊಹ್ಕಲಿಕೈ ಜಲಪಾತವನ್ನು ದೂರದಿಂದ ಮಾತ್ರ ನೋಡಲು ಸಾಧ್ಯವಿತ್ತು. ಆದರೆ ಇಂದು ಜಲಪಾತವನ್ನು ನೋಡಲು ಮೆಟ್ಟಿಲುಗಳ ವ್ಯವಸ್ಥೆ ಮಾಡಲಾಗಿದೆ. ಈ ಮೆಟ್ಟಿಲುಗಳು ನಿಮ್ಮನ್ನು ಸೀದಾ ಜಲಪಾತದ ಬುಡಕ್ಕೆ ಕರೆದೊಯ್ಯುತ್ತವೆ. ಆದರೆ ಆಸ್ತಮ,ಉಬ್ಬಸ ಇತ್ಯಾದಿ ಸಮಸ್ಯೆ ಇರುವ ಪ್ರವಾಸಿಗರು ಇಲ್ಲಿಗೆ ಇಳಿದು ಹೋಗದಿದ್ದರೆ ಒಳ್ಳೆಯದು. ಏಕೆಂದರೆ ನೂರಾರು ಮೆಟ್ಟಿಲುಗಳನ್ನು ಮತ್ತೆ ಏರಿ ಬರುವುದು ಕಷ್ಟದ ಕೆಲಸ.
ಇಲ್ಲಿ ಹಲವಾರು ಊಟ- ತಿಂಡಿಯನ್ನು ಒದಗಿಸುವ ಉಪಾಹಾರ ಮಂದಿರಗಳು ಇವೆ. ಸ್ಥಳೀಯ ಖಾಸಿ ಖಾದ್ಯಗಳಿಂದ ಹಿಡಿದು, ಉತ್ತರ ಮತ್ತು ದಕ್ಷಿಣ ಭಾರತದ ಖಾದ್ಯಗಳವರೆಗೆ ಹಾಗು ಚೈನಿಸ್ ನೂಡಲ್ಸ್ ಸಹ ಇಲ್ಲಿ ದೊರೆಯುತ್ತವೆ. ಇಲ್ಲಿರುವ ಸಣ್ಣ ಅಂಗಡಿಗಳಲ್ಲಿ ಸ್ಥಳೀಯವಾಗಿ ತಯಾರಿಸಿದ ವಸ್ತುಗಳನ್ನು ಬೇಕಾದರೆ ಕೊಳ್ಳಬಹುದು.
