Click it and Unblock the Notifications
ದಕ್ಷಿಣ ಗೋವಾದಲ್ಲಿ ಕಂಡು ಬರುವ ಕೋಲ್ವಾ ಕಡಲ ತೀರದ ಹಾಗೆ ದೊಡ್ಡ ಪ್ರಮಾಣದಲ್ಲಿ ಇರದೆ ಹೋದರೂ ವರ್ಕಾ ಬೀಚ್ ಉತ್ತಮವಾದ ಅನುಭವವನ್ನು ಒದಗಿಸುವುದರಲ್ಲಿ ಕಮ್ಮಿ ಏನೂ ಇಲ್ಲ. ಶ್ವೇತ ವರ್ಣದ ಮರಳು ಮತ್ತು ಪಾಮ್ ಗಿಡಗಳನ್ನು ಹೊತ್ತ ಈ ಕಡಲ ತೀರವು ಮಧ್ಯಾಹ್ನದ ಹೊತ್ತನ್ನು ಆರಾಮದಾಯಕವಾಗಿ ಕಳೆಯಲು ಹೇಳಿ ಮಾಡಿಸಿದ ತಾಣವಾಗಿದೆ. ಇಷ್ಟೆ ಅಲ್ಲ ಈ ಕಡಲ ತೀರದಲ್ಲಿ ಕೈಗೆಟುಕುವ ಬೆಲೆಯಲ್ಲಿ ವಿವಿಧ ಬಗೆಯ ಪಾನೀಯಗಳು, ಸಾಂಪ್ರದಾಯಿಕ ಶೈಲಿಯ ಗೋವಾದ ತಿಂಡಿ ತಿನಿಸುಗಳು ಕೂಡ ದೊರೆಯುತ್ತವೆ. ಈ ಕಡಲ ತೀರವು ವರ್ಕಾ ಎಂಬ ಬೆಸ್ತ ಹಳ್ಳಿಯಲ್ಲಿದೆ. ಇಲ್ಲಿ ಬಹುಸಂಖ್ಯೆಯಲ್ಲಿ ಬೆಸ್ತರು ತಮ್ಮ ಕಾರ್ಯವಾದ ಮೀನು ಹಿಡಿಯುವಿಕೆಯಲ್ಲಿ ತೊಡಗಿಕೊಂಡಿರುವುದನ್ನು ಗಮನಿಸಬಹುದು. ತುಂಬಾ ಸ್ನೇಹ ಜೀವಿಗಳಾದ ಇಲ್ಲಿನ ಬೆಸ್ತರು ಒಮ್ಮೊಮ್ಮೆ ನಿಮಗೆ ಕೈಗೆಟುಕುವ ದರದಲ್ಲಿ ಮೀನುಗಳನ್ನು ಮಾರುವುದು ಉಂಟು! ಇಷ್ಟೆ ಅಲ್ಲ...ಛಾಯಾಗ್ರಾಹಕರಿಗೂ ಕೂಡ ಇದೊಂದು ಸ್ವರ್ಗವೆಂದೇ ಹೇಳಬಹುದು.
ಪಕ್ಕದ ಕೋಲ್ವಾ ಪ್ರದೇಶದಲ್ಲಿ ಜರುಗುವ ಫಾಮಾ ಉತ್ಸವದ ಸಡಗರವು ವರ್ಕಾ ಕಡಲ ತೀರದಲ್ಲೂ ಹರಡಿರುವುದನ್ನು ಕಾಣಬಹುದಾಗಿದೆ. ವರ್ಷಕ್ಕೊಮ್ಮೆ ಜರುಗುವ ಈ ಉತ್ಸವದಲ್ಲಿ ಭಕ್ತರು ಹರ್ಷದಿಂದ ಪಾಲ್ಗೊಂಡು ಮೆನಿನೊ ಜೀಸಸ್ ಪ್ರತಿಮೆ ಎದುರು ಪ್ರಾರ್ಥಿಸಿ ಪುನೀತರಾಗುತ್ತಾರೆ. ಈ ಪ್ರತಿಮೆಯು ಕೋಲ್ವಾದಲ್ಲಿದೆ. ಸಾಮಾನ್ಯವಾಗಿ ಈ ಸಮಯದಲ್ಲಿ ವರ್ಕಾ ಪ್ರದೇಶವು ನೋಡಲು ಮನೋಹರವಾಗಿರುವುದರಿಂದ ನೀವು ಅದರ ಭೇಟಿಯನ್ನು ತಪ್ಪಿಸಿಕೊಳ್ಳಬಾರದೆಂಬುದು ನಮ್ಮ ಚಿಕ್ಕ ಸಲಹೆ. ಇದರ ಹತ್ತಿರದಲ್ಲೆ ಕಾಣಸಿಗುವ ಮತ್ತೊಂದು ಕಡಲ ತೀರವೆಂದರೆ ಬೆನೌಲಿಮ್. ಇದೂ ಕೂಡ ಸ್ವಚ್ಛವಾಗಿದ್ದು ಬಿಳಿ ಬಣ್ಣದ ಮರಳಿನಿಂದ ಕಂಗೊಳಿಸುತ್ತದೆ.
ದಕ್ಷಿಣ ಗೋವಾದಲ್ಲಿರುವ ಕೋಲ್ವಾದಿಂದ ರಸ್ತೆಯ ಮುಖಾಂತರ ವರ್ಕಾವನ್ನು ತಲುಪಬಹುದು. ಬೇರೆ ಬೇರೆ ಪಟ್ಟಣಗಳಿಂದ ಇಲ್ಲಿಗೆ ತಲುಪಲು ಕ್ಯಾಬಗಳು ಕೂಡ ದೊರೆಯುತ್ತವೆ. ಇದು ವಿಮಾನ ನಿಲ್ದಾಣಕ್ಕೆ ಹತ್ತಿರದಲ್ಲಿರುವುದರಿಂದ ನೇರವಾಗಿಯೂ ಕೂಡ ವರ್ಕಾ ತಲುಪಬಹುದಾಗಿದೆ. ಪಣಜಿಗಿಂತಲೂ ವಾಸ್ಕೊಗೆ ಹತ್ತಿರವಾಗಿರುವ ವರ್ಕಾವನ್ನು ಹಲವಾರು ಬೇರೆ ಬೇರೆ ರೈಲು ನಿಲ್ದಾಣಗಳಿಂದಲೂ ಕೂಡ ಮುಟ್ಟಬಹುದು.
