ಹಿಮಾಚಲ ರಾಜ್ಯದ ಕೆಲ ಅದ್ಭುತ ಕೆರೆಗಳು

ಹಿಮಾಚಲದ ಅದ್ಭುತ ಕೆರೆಗಳು:

ನಾಕೊ ಕೆರೆ : ಹಿಮಾಚಲ ಪ್ರದೇಶ ರಾಜ್ಯದ ಕಿನ್ನೌರ್ ಜಿಲ್ಲೆಯ ಉಪಭಾಗವಾದ ಪೂಹ್ ನ ನಾಕೊ ಗ್ರಾಮದಲ್ಲಿದೆ ಈ ಸುಂದರ, ಬಿಡಿಸಿದ ವರ್ಣಚಿತ್ರ ಹಾಗೆ ಮನಸೆಳೆವ ನಾಕೊ ಕೆರೆ. ಸಮುದ್ರ ಮಟ್ಟದಿಂದ ಬರೋಬ್ಬರಿ 12,014 ಅಡಿಗಳಷ್ಟು ಎತ್ತರದಲ್ಲಿ ಇದು ಸ್ಥಿತವಿದೆ.

ಚಿತ್ರಕೃಪೆ: Sayantan Bhattacharya

ಹಿಮಾಚಲದ ಅದ್ಭುತ ಕೆರೆಗಳು:

ಈ ಸುಂದರ ಕೆರೆಯು ಸುತ್ತಲೂ ಪೊಪ್ಲಾರ್ ಮರಗಳು ಹಾಗೂ ಬೌದ್ಧ ದೇವಾಲಯಗಳಿಂದ ಸುತ್ತುವರೆದಿದೆ. ಕೆರೆಯ ಬಳಿ ಒಂದು ಪಾದದ ಗುರುತಿದ್ದು ಬೌದ್ಧ ಸಂತ ಪದ್ಮಸಂಭವರ ಪಾದದ ಗುರು ಇದಾಗಿದೆಯೆಂದು ಇಲ್ಲಿನ ಸ್ಥಳೀಯರು ನಂಬುತಾರೆ.

ಚಿತ್ರಕೃಪೆ: Snotch

ಹಿಮಾಚಲದ ಅದ್ಭುತ ಕೆರೆಗಳು:

ಬೃಘು ಸರೋವರ : ಹಿಮಾಚಲ ಪ್ರದೇಶ ರಾಜ್ಯದ ಕುಲ್ಲು ಜಿಲ್ಲೆಯಲ್ಲಿ ಕಂಡುಬರುವ ಬೃಘು ಸರೋವರವು ಸಮುದ್ರ ಮಟ್ಟದಿಂದ ಅತಿ ಎತ್ತರದಲ್ಲಿ ನೆಲೆಸಿರುವ ಹಿಮ ಸರೋವರವಾಗಿದೆ. ಪ್ರಖ್ಯಾತ ರೋಹ್ತಂಗ್ ಪಾಸ್ ನ ಪೂರ್ವಕ್ಕಿರುವ ಈ ಕೆರೆಯು ಗುಲಾಬಾ ಎಂಬ ಗ್ರಾಮದಿಂದ ಕೇವಲ ಆರು ಕಿ.ಮೀ ದೂರದಲ್ಲಿದೆ. ಹಿಂದಿನ ಕಾಲದಲ್ಲಿ ಬೃಘು ಮಹಾಮುನಿಯ ನಂಟನ್ನು ಹೊಂದಿರುವ ಈ ಕೆರೆಯು ಹಿಂದೂ ಭಕ್ತರಲ್ಲಿ ಪವಿತ್ರ ಎಮ್ದು ಪರಿಗಣಿಸಲ್ಪಟ್ಟಿದೆ.

ಚಿತ್ರಕೃಪೆ: DarthTang

ಹಿಮಾಚಲದ ಅದ್ಭುತ ಕೆರೆಗಳು:

ಢಂಕಾರ್ ಕೆರೆ : ಹಿಮಾಚಲ ರಾಜ್ಯದ ಸ್ಪಿತಿ ಜಿಲ್ಲೆಯ ಢಂಕಾರ್ ಎಂಬಲ್ಲಿ ಒಂದು ಬೌದ್ಧ ಮಠವಿದ್ದು ಅಲ್ಲಿಂದ ಚಾರಣದ ಮೂಲಕ ಈ ಸುಂದರ ಕೆರೆಗೆ ತಲುಪಬಹುದು. ಈ ಕೆರೆಯವರೆಗಿನ ಚಾರಣವು ಅದ್ಭುತ ಗಿರಿ ಪರ್ವತಗಳ ಸಾಲುಗಳಿಂದ ಕೂಡಿದ್ದು, ಈ ಕೆರೆಯ ನೀರು ಸಾಕಷ್ಟು ತಂಪಾಗಿರುತ್ತದೆ ಹಾಗೂ ಈಜ ಬೇಕೆನ್ನುವವರಿಗೆ ದೊಡ್ಡ ಸವಾಲೆಸೆಯುತ್ತದೆ.

ಚಿತ್ರಕೃಪೆ: 4ocima

ಹಿಮಾಚಲದ ಅದ್ಭುತ ಕೆರೆಗಳು:

ಕರೇರಿ ಕೆರೆ : ಹಿಮಾಚಲ ಪ್ರದೇಶದ ಧೌಲಾಧರ್ ಪರ್ವತ ಶ್ರೇಣಿಗಳಲ್ಲಿ ಕಂಡುಬರುವ ಶುಭ್ರ ನೀರಿನ ಕೆರೆ ಇದಾಗಿದೆ. ಸುತ್ತಮುತ್ತಲಿರುವ ಹಿಮಚ್ಛಾದಿತ ಪರ್ವತಗಳು ಈ ಕೆರೆಗೆ ಮುಖ್ಯ ನೀರಿನ ಮೂಲವಾಗಿದೆ. ಈ ಕೆರೆಗೆ ಕೇವಲ ಚಾರಣದ ಮೂಲಕ ಮಾತ್ರವೆ ತಲುಪಬಹುದಾಗಿದ್ದು, ಧರ್ಮಶಾಲಾ ಬಳಿಯಿರುವ ಘೇರಾ ಎಂಬ ಗ್ರಾಮವು ಇದಕ್ಕೆ ಹತ್ತಿರವಾಗಿದೆ ಹಾಗೂ ಈ ಗ್ರಾಮವನ್ನು ವಾಹನಗಳ ಮೂಲಕ ತಲುಪಬಹುದಾಗಿದೆ. ಒಂದೊಮ್ಮೆ ಘೇರಾ ತಲುಪಿದರೆ ಅಲ್ಲಿಂದ ಮಾರ್ಗದರ್ಶಿಯ ಸಹಾಯ ಪಡೆದು ಟ್ರೆಕ್ ಮಾಡುತ್ತ ಈ ಕೆರೆಗೆ ತಲುಪಬಹುದು. ಅಷ್ಟೊಂದು ಆಳವಿಲ್ಲದ ಈ ಕೆರೆಯ ನೀರು ಎಷ್ಟೊಂದು ಪಾರದರ್ಶಕವಾಗಿದೆಯೆಂದರೆ ಅದರ ತಳವನ್ನೂ ಸಹ ಸುಲಭವಾಗಿ ನೋಡಬಹುದು. ಈ ಕೆರೆಯ ಬಳಿಯಿರುವ ಬೆಟ್ಟವೊಂದರ ಮೇಲೆ ಶಿವನ ದೇವಸ್ಥಾನವಿದ್ದು ಬೇಕಾದರೆ ತಂಗಲೂ ಬಹುದು.

ಚಿತ್ರಕೃಪೆ: Shalabh

ಹಿಮಾಚಲದ ಅದ್ಭುತ ಕೆರೆಗಳು:

ಟ್ರೆಕ್ ಪ್ರಾರಂಭದ ತಾಣವಾದ ಘೇರಾ ಗ್ರಾಮ. ಧರ್ಮಶಾಲಾದಿಂದ ಇಲ್ಲಿಯವರೆಗೆ ರಸ್ತೆಯ ಮಾರ್ಗವಿದ್ದು ವಾಹನಗಳ ಮೂಲಕ ಬರಬಹುದು. ನಂತರ ಇಲ್ಲಿಂದ ಟ್ರೆಕ್ ಮಾರ್ಗವು ಬೆಟ್ಟ ಪರ್ವತಗಳ ಮಧ್ಯದಿಂದ ಅದ್ಭುತವಾಗಿ ಸಾಗುತ್ತದೆ.

ಚಿತ್ರಕೃಪೆ: Ashish Gupta

ಹಿಮಾಚಲದ ಅದ್ಭುತ ಕೆರೆಗಳು:

ಕರೇರಿ ಕೆರೆಗೆ ಕರೆದೊಯ್ಯುವ ಅದ್ಭುತ ಟ್ರೆಕ್ ಮಾರ್ಗ. ಇದು ಟ್ರೆಕ್ ಮಾರ್ಗವು ಘೇರಾದಿಂದ ಸುಮಾರು 13 ಕಿ.ಮೀ ಗಳಷ್ಟು ದೂರವಿದ್ದು ಅಷ್ಟೊಂದು ಕಷ್ಟಕರವಾಗಿಲ್ಲ.

ಚಿತ್ರಕೃಪೆ: Ashish Gupta

ಹಿಮಾಚಲದ ಅದ್ಭುತ ಕೆರೆಗಳು:

ಕರೇರಿ ಕೆರೆಯ ಸುತ್ತಮುತ್ತಲಿನಲ್ಲಿ ಅಲ್ಲಲ್ಲಿ ಕೆಲವು ಪಾಳು ಬಿದ್ದ ಕೋಣೆಗಳ ರೀತಿಯ ರಚನೆಗಳಿದ್ದು ಊಟ, ತಿಂಡಿಗಳನ್ನು ತಯಾರಿಸಲು ಬಳಸಿಕೊಳ್ಳಲಾಗುತ್ತದೆ.

ಚಿತ್ರಕೃಪೆ: Ashish Gupta

ಹಿಮಾಚಲದ ಅದ್ಭುತ ಕೆರೆಗಳು:

ಕರೇರಿ ಕೆರೆ ಬಳಿಯ ಚಿಕ್ಕ ಬೆಟ್ಟವೊಂದರ ಮೇಲೆ ನಿರ್ಮಿಸಲಾಗಿರುವ ಶಿವನ ಪುಟ ದೇಗುಲ.

ಚಿತ್ರಕೃಪೆ: Ashish Gupta

ಹಿಮಾಚಲದ ಅದ್ಭುತ ಕೆರೆಗಳು:

ಟ್ರೆಕ್ ಪ್ರವಾಸಿಗರ ಅನುಕೂಲಕ್ಕೆಂದು ನಿರ್ಮಿಸಲಾಗಿರುವ ಕೆರೆಯ ಬಳಿಯಿರುವ ಶೌಚಾಲಯ ವ್ಯವಸ್ಥೆ.

ಚಿತ್ರಕೃಪೆ: Ashish Gupta

ಹಿಮಾಚಲದ ಅದ್ಭುತ ಕೆರೆಗಳು:

ಮಹಾರಾಣಾ ಪ್ರತಾಪ ಸಾಗರ : ಪಾಂಗ್ ಜಲಾಶಯ ಎಂತಲೂ ಕರೆಯಲ್ಪಡುವ ಹಿಮಾಚಲ ಪ್ರದೇಶದ ಈ ಸುಂದರ ಕೃತಕ ಕೆರೆಯು ಬಿಯಾಸ್ ನದಿಯಿಂದ ರೂಪಿತವಾಗಿದೆ. ಹಿಮಾಚಲ ಪ್ರದೇಶ ಕಂಗ್ರಾ ಜಿಲ್ಲೆಯ ಶಿವಾಲಿಕ್ ಪರ್ವತ ಶ್ರೇಣಿಗಳಲ್ಲಿ ನಿರ್ಮಿಸಲಾಗಿರುವ ಈ ಜಲಾಶಯ ಅಥವಾ ಕೆರೆಯು ಹಿಮಾಚಲ್ ರಾಜ್ಯದಲ್ಲಿ ಮೀನುಗಳ ಸಾಗಾಟಕ್ಕೆ ಪ್ರಮುಖ ಮೂಲವಾಗಿದೆ.

ಚಿತ್ರಕೃಪೆ: Vikasjariyal

ಹಿಮಾಚಲದ ಅದ್ಭುತ ಕೆರೆಗಳು:

ಹಿಮಾಚಲ ಪ್ರದೇಶ ಚಂಬಾ ಜಿಲ್ಲೆಯ ಭರ್ಮೌರ್ ಪ್ರಾಂತ್ಯದ ಹಿಮಾಲಯ ಶ್ರೇಣಿಗಳಲ್ಲಿರುವ ಪೀರ್ ಪಾಂಜಾಲ್ ವಲಯದಲ್ಲಿ ಸ್ಥಿತವಿರುವ ಕೆರೆಯೆ ಮಣಿಮಹೇಶ ಕೆರೆ. ಇದನ್ನು ದಾಲ್ ಸರೋವರ ಎಂತಲೂ ಕರೆಯಲಾಗುತ್ತದೆ. (ಶ್ರೀನಗರದಲ್ಲಿರುವ ಪ್ರಖ್ಯಾತ ದಾಲ್ ಕೆರೆ ಬೇರೆ) ಈ ಕೆರೆಯ ಭೇಟಿಯನ್ನು ಹಿಂದೂ ಧರ್ಮದಲ್ಲಿ ಅತ್ಯಂತ ಪವಿತ್ರ ಎಂದು ನಂಬಲಾಗಿದ್ದು ಹಿಂದೂ ಕ್ಯಾಲೆಂಡರಿನ ಅನ್ವಯ ಭಾಡೋನ್ ಮಾಸದಲ್ಲಿ ಅಂದರ ಅಗಸ್ಟ್/ಸೆಪ್ಟಂಬರ್ ತಿಂಗಳಿನಲ್ಲಿ ಈ ಕೆರೆಗೆ ಯಾತ್ರೆ ಹೊರಡಲಾಗುತ್ತದೆ. ಹಿಮಾಚಲ ಸರ್ಕಾರವು ಈ ಯಾತ್ರೆಯನ್ನು ರಾಜ್ಯದ ಅಧಿಕೃತ ತೀರ್ಥ ಯಾತ್ರೆ ಎಂದು ಘೋಷಿಸಿದೆ. ಮಣಿಮಹೇಶ ಯಾತ್ರೆ ಎಂದು ಕರೆಯಲಾಗುತ್ತದೆ.

ಚಿತ್ರಕೃಪೆ: Vinod Rana

ಹಿಮಾಚಲದ ಅದ್ಭುತ ಕೆರೆಗಳು:

ಪಂಡೋಹ್ ಕೆರೆ : ಹಿಮಾಚಲದ ಮಂಡಿ ಜಿಲ್ಲೆಯಲ್ಲಿ ನಿರ್ಮಿಸಲಾಗಿರುವ ಪಂಡೋಹ್ ಆಣೆಕಟ್ಟಿನಿಂದ ಈ ಕೆರೆಯು ರೂಪಿತವಾಗಿದೆ. ಈ ಅಣೆಕಟ್ಟೆಯ ವಿಶೇಷವೆಂದರೆ ಇದು ಬಿಯಾಸ್ ನದಿಯ ದಿಕ್ಕನ್ನು ಬದಲಿಸಿ ಅದು ಸಟ್ಲೇಜ್ ನದಿಯಲ್ಲಿ ಸೇರುವ ಹಾಗೆ ಮಾಡುತ್ತದೆ.

ಚಿತ್ರಕೃಪೆ: Biswarup Ganguly

ಹಿಮಾಚಲದ ಅದ್ಭುತ ಕೆರೆಗಳು:

ಪ್ರಶಾರ್ ಕೆರೆ : ಹಿಮಾಚಲ ಪ್ರದೇಶದ ಮಂಡಿ ಪಟ್ಟಣದ ಉತ್ತರಕ್ಕೆ ಸುಮಾರು 49 ಕಿ.ಮೀ ಗಳಷ್ಟು ದೂರದಲ್ಲಿ ಈ ಸುಂದರ ಕೆರೆಯನ್ನು ಕಾಣಬಹುದಾಗಿದೆ. ಪ್ರಶಾರ ಮುನಿಗಳು ಹಿಂದೆ ಈ ಕೆರೆಯ ತಟದಲ್ಲಿ ತಪಗೈದಿದ್ದರಿಂದ ಇದನ್ನು ಪವಿತ್ರ ಕೆರೆ ಎಂದು ಭಾವಿಸಲಾಗುತ್ತದೆ. ಇದರ ತಟದಲ್ಲಿ ದೇವಾಲಯವೊಂದಿದ್ದು ಇದನ್ನು 13 ನೆಯ ಶತಮಾನದಲ್ಲಿ ನಿರ್ಮಿಸಿದರೆನ್ನಲಾಗಿದೆ. ಆಸಕ್ತಿಕರ ವಿಷಯವೆಂದರೆ ಈ ಕೆರೆಯ ಮೇಲೆ ತೇಲುವ ನಡುಗಡ್ಡೆಯೊಂದಿದ್ದು ಇನ್ನೂ ವರೆಗೂ ಇದರ ಸ್ಪಷ್ಟವಾದ ಆಳ ತಿಳಿಯಲಾಗಿಲ್ಲ.

ಹಿಮಾಚಲದ ಅದ್ಭುತ ಕೆರೆಗಳು:

ಫೆಬ್ರುವರಿ 2014 ರಲ್ಲಿ ಚಿತ್ರದಲ್ಲಿ ಸೆರೆ ಹಿಡಿಯಲಾದ ಪ್ರಶಾರ್ ಕೆರೆಯ ನೋಟ.

ಚಿತ್ರಕೃಪೆ: Manojkhurana

ಹಿಮಾಚಲದ ಅದ್ಭುತ ಕೆರೆಗಳು:

ರೇಣುಕಾ ಕೆರೆ : ಹಿಮಾಚಲ ಪ್ರದೇಶದ ಸಿರ್ಮೌರ್ ಜಿಲ್ಲೆಯಲ್ಲಿದೆ ಈ ಪವಿತ್ರ ಕೆರೆ. ಪೌರಾಣಿಕ ಕಥೆಯ ಪ್ರಕಾರ, ಪರಶುರಾಮರ ತಾಯಿಯಾದ ರೇಣುಕಾ ದೇವಿಯು ಮಗನಿಂದ ವಧಿಸಲ್ಪಡುವ ಸಂದರ್ಭದಲ್ಲಿ ಕೆರೆಯ ರೂಪ ಹೊಂದಿದಳು ಎನ್ನಲಾಗಿದೆ. ಆದ್ದರಿಂದ ಹಿಂದೂ ಧರ್ಮದಲ್ಲಿ ಈ ಕೆರೆಗೆ ಪ್ರಮುಖವಾದ ಸ್ಥಾನವಿದೆ.

ಚಿತ್ರಕೃಪೆ: Fred Hsu

ಹಿಮಾಚಲದ ಅದ್ಭುತ ಕೆರೆಗಳು:

ರೇವಾಲ್ಸರ್ ಕೆರೆ : ಹಿಮಾಚಲದ ಮಂಡಿ ಜಿಲ್ಲೆಯ ರೇವಾಲ್ಸರ್ ನಲ್ಲಿರುವ ಈ ಕೆರೆಯು ಬೌದ್ಧರಿಗೆ ಪವಿತ್ರವಾದ ಕೆರೆಯಾಗಿದೆ. ಈ ಕೆರೆಯು ಮಹಾಭಾರತದಲ್ಲಿ ಪಾಂಡವರು ಮೇಣದ ಅರಮ್ನೆ ಹೊತ್ತುರಿಯುತ್ತಿದ್ದಾಗ ತಪ್ಪಿಸಿಕೊಂಡುದದರ ಪ್ರಸಂಗದ ನಂಟನ್ನು ಹೊಂದಿದೆ ಎನ್ನಲಾಗಿದೆ. ಬೌದ್ಧರಲ್ಲದೆ ಹಿಂದೂಗಳು ಹಾಗೂ ಸಿಖ್ಖರಿಗೂ ಸಹ ಈ ಕೆರೆ ಪವಿತ್ರವಾಗಿದೆ.

ಚಿತ್ರಕೃಪೆ: Hellknight mnd

ಹಿಮಾಚಲದ ಅದ್ಭುತ ಕೆರೆಗಳು:

ಸೂರ್ಯ ಅಥವಾ ಸೂರಜ್ ತಾಲ್ : ಹಿಮಾಚಲದ ಲಾಹೌಲ್ ಮತ್ತು ಸ್ಪಿತಿ ಕಣಿವೆಯ ಬಾರಾ ಲಾಚಾ ಲಾ ಪಾಸ್ ನಲ್ಲಿ ಈ ಪವಿತ್ರ ಕೆರೆಯು ಸ್ಥಿತವಿದೆ. ಅಕ್ಷರಶಃ ಅರ್ಥೈಸಿದರೆ ಇದನ್ನು ಸೂರ್ಯನ ಕೆರೆ ಎಂದು ಅರ್ಥೈಸಿಕೊಳ್ಳಬಹುದಾಗಿದೆ. ಇದೊಂದು ಹಿಮಕೆರೆಯಾಗಿದ್ದು ಭಾಗ ನದಿಯ ಮೂಲವಾಗಿದೆ.

ಚಿತ್ರಕೃಪೆ: Hiranmay

ಹಿಮಾಚಲದ ಅದ್ಭುತ ಕೆರೆಗಳು:

ಚಂದ್ರ ತಾಲ್ : ಸೂರ್ಯ ತಾಲ್ ನಂತೆಯೆ ಸ್ಪಿತಿ ಜಿಲ್ಲೆಯಲ್ಲಿ ಚಂದ್ರ ತಾಲ್ ಕೆರೆಯನ್ನು ಕಾಣಬಹುದು. ಇದರ ಅರ್ಧ ಚಂದ್ರಾಕೃತಿಯೆ ಇದಕ್ಕೆ ಈ ಹೆಸರು ಬರಲು ಕಾರಣವಾಗಿದೆ. ಪ್ರವಾಸಿಗರ, ಟ್ರೆಕ್ ಮಾಡುವವರ ನೆಚ್ಚಿನ ತಾಣ ಇದಾಗಿದ್ದು ಸ್ಪಿತಿಯ ಕುಂಜುಮ್ ಪಾಸ್ ಮೂಲಕ ಟ್ರೆಕ್ ಮಾಡುತ್ತ ಇಲ್ಲಿಗೆ ತಲುಪಬಹುದಾಗಿದೆ.

ಚಿತ್ರಕೃಪೆ: Christopher L Walker