ರಾಮಬಾಗ್ ಎಂಬುದು ಅಮೃತಸರದಲ್ಲಿರುವ ಆಕರ್ಷಕ ಗಾರ್ಡನ್. ಇದು ಮಹಾರಾಜ ರಂಜಿತ್ ಸಿಂಗ್‌ನ ಬೇಸಿಗೆ ಅರಮನೆಯಾಗಿತ್ತು. ಈಗ ಇದನ್ನು ಮ್ಯೂಸಿಯಂ ಆಗಿ ಪರಿವರ್ತಿಸಲಾಗಿದೆ. ಮೊದಲಿಗೆ ಇದನ್ನು 'ಕಂಪನಿ ಗಾರ್ಡನ್' ಎಂದು ಕರೆಯುತ್ತಿದ್ದರು. ಈ ಸುಂದರ ಸ್ಥಳವನ್ನು ರಾಜ, ಶ್ರೇಷ್ಠ ಸಂತ, ನಗರದ ಸಂಸ್ಥಾಪಕರಾದ ಗುರು ರಾಮದಾಸಜೀ ಅವರ ನಂತರ ಮರುನಾಮಕರಣ ಮಾಡಲಾಗಿದೆ. ಲಾಹೋರ್ ನಲ್ಲಿರುವ ಶಾಲಿಮಾರ್ ಗಾರ್ಡನ್‌ನ ಪಡಿಯಚ್ಚಿನಂತಿದೆ ಅಮೃತಸರ ಈ ಗಾರ್ಡನ್.

ಒಂದು ಬಗೆಯ ಗಟ್ಟಿ ಡ್ರೈ ಫ್ರೂಟ್ಸ್ ಬಿಡುವ ವೃಕ್ಷಗಳು, ಹರ್ಬಲ್ ಗಿಡಗಳು, ಕಾರಂಜಿಯನ್ನೊಳಗೊಂಡ ಕಾಲುವೆಗಳಲ್ಲಿ ಗೋಲ್ಡನ್ ಮೀನುಗಳು ಈಜಾಡುವುದನ್ನು ನೋಡುವುದೇ ಚೆಂದ. ಈ ಹಸಿರು ಹಾಸಿನ ನಡುವೆ ಮಹಾರಾಜ ರಂಜಿತ್ ಜೀವನಚರಿತ್ರೆಯನ್ನು ಸಾರುವ ದೃಶ್ಯಾವಳಿಗಳನ್ನು 3ಡಿ ತಂತ್ರಜ್ಞಾನದಲ್ಲಿ ಕಾಣಬಹುದು. ಗಾರ್ಡನ್ ನ ಪ್ರವೇಶದ್ವಾರ ಉತ್ತಮ ರಕ್ಷಣಾ ವ್ಯವಸ್ಥೆಯನ್ನು ಹೊಂದಿದೆ. ಗಾರ್ಡನ್‌ನ ಇನ್ನೊಂದು ಬದಿಯಲ್ಲಿ ಕುದುರೆಯನ್ನೇರಿದ ರಾಜನ ಪ್ರತಿಮೆ ಆಕರ್ಷಕ ಭಂಗಿಯಲ್ಲಿದೆ.