ಮನಾಲಿಯಿಂದ ಲೇಹ್ ಗೆ ಹೋಗುವ ಪ್ರವಾಸಿಗರಿಗೆ ಸರ್ಚು ರಾತ್ರಿಯ ಹೊತ್ತು ವಿರಮಿಸಲು ಅಥವಾ ತಂಗಲು ಹೇಳಿಮಾಡಿಸಿದ ಸ್ಥಳವಾಗಿದೆ. ಏಕೆಂದರೆ ಈ ಎರಡರ ಮಧ್ಯೆ ಇರುವ ಅಂತರ ಸುಮಾರು 475 ಕಿ.ಮೀ. ಇಲ್ಲಿ ವಿರಮಿಸಲು ತಂಗುವ ಪ್ರವಾಸಿಗರಿಗೆ ಪ್ರಾಥಮಿಕ ಅವಶ್ಯಕತೆಗಳಾದ ಟೆಂಟ್ ಹಾಗು ಊಟದ ಸೌಲಭ್ಯಗಳನ್ನು ಒದಗಿಸಲಾಗುತ್ತದೆ. ಆದರೆ ಚಳಿಗಾಲದ ಸಮಯದಲ್ಲಿ ಈ ತಾಣವು ಅತಿಯಾದ ಹಿಮಪಾತವನ್ನು ಅನುಭವಿಸುವುದರಿಂದ ಈ ಎಲ್ಲಾ ಸೌಲಭ್ಯಗಳು ಸ್ಥಗಿತಗೊಂಡಿರುತ್ತವೆ ಎಂಬ ವಿಷಯವು ಗಮನದಲ್ಲಿಡಬೇಕಾದ ಸಂಗತಿ. ಆದ್ದರಿಂದ ಜೂನ್ ಹಾಗು ಅಕ್ಟೋಬರ್ ಮಧ್ಯದ ಸಮಯದಲ್ಲಿ ಈ ಪ್ರದೇಶಕ್ಕೆ ಭೇಟಿ ನೀಡುವುದು ಒಳಿತು. ಲಡಾಖ್ ನ ಝನ್ಸ್ಕಾರ್ ಪ್ರದೇಶದಲ್ಲಿ ಚಾರಣ ಮಾಡಬಯಸುವವರಿಗೆ ಈ ತಾಣವು ಟ್ರೆಕ್ಕಿಂಗ್ ಬೇಸ್ ಆಗಿ ಕಾರ್ಯನಿರ್ವಹಿಸುತ್ತದೆ.