ಮೋಯರ್ ನದಿಯು ಭವಾನಿ ನದಿಯ ಒಂದು ಉಪನದಿ. ಇದು ಮಸಿನಗುಡಿ - ಊಟಿ ರಸ್ತೆಯಲ್ಲಿರುವ ಮೋಯರ್ ಪಟ್ಟಣದ ಬಳಿಯಲ್ಲಿ ಉಗಮವಾಗುತ್ತದೆ. ಇದು ಬಂಡಿಪುರ ಮತ್ತು ಮುದುಮಲೈ ವನ್ಯಜೀವಿಧಾಮದ ಪ್ರಾಕೃತಿಕ ಗಡಿಯಾಗಿ ಕಾರ್ಯನಿರ್ವಹಿಸುತ್ತಿದೆ. ಈ ಧಾಮದ ಹಲವಾರು ಪ್ರಾಣಿಗಳು ಈ ನದಿಗೆ ನೀರು ಕುಡಿಯುವ ಸಲುವಾಗಿ ಆಗಮಿಸುತ್ತಿರುತ್ತವೆ. ಆಗಾಗಿ ಪ್ರಾಣಿಗಳನ್ನು ನೋಡಲು ಈ ನದಿಯ ಕಿನಾರೆಗಳು ಅತ್ಯಂತ ಸೂಕ್ತ ಸ್ಥಳವಾಗಿದೆ. ಮುದುಮಲೈ ಕಮರಿ ಅಥವಾ ಮುದುಮಲೈ ಕ್ಯಾನ್ಯನ್ ಎಂಬುದು ಮೋಯರ್ ನದಿಯ ಹರಿವಿನಿಂದ ಉಂಟಾದ ಆಳವಾದ ಕಮರಿಯಾಗಿದೆ.

20 ಕಿ.ಮೀ ನಷ್ಟು ಆಳವಾದ ಈ ಕಮರಿಗೆ ಎತ್ತರದಿಂದ ಮೋಯರ್ ನದಿ ಧುಮುಕುವಾಗ ಮೋಯರ್ ಜಲಪಾತವುಂಟಾಗುತ್ತದೆ. ಈ ಜಲಪಾತವನ್ನು ಕಣ್ತುಂಬಿಕೊಳ್ಳುವ ಸಲುವಾಗಿ ಹಲವಾರು ಪ್ರವಾಸಿಗರು ಇಲ್ಲಿಗೆ ವಿಹಾರಕ್ಕೆಂದು ಬರುತ್ತಾರೆ. ಮುದುಮಲೈ ರಾಷ್ಟ್ರೀಯ ಉದ್ಯಾನವನಕ್ಕೆ ಈ ನದಿಯು ನೀರಿನ ಮೂಲವನ್ನು ಒದಗಿಸುತ್ತದೆ. ಪ್ರಶಾಂತವಾದ ಪರಿಸರದಲ್ಲಿ ಪ್ರಕೃತಿಯ ಅನುಭವವನ್ನು ಪಡೆಯಲು ಬಯಸುವವರಿಗಾಗಿ ಈ ಸ್ಥಳವು ಹೇಳಿ ಮಾಡಿಸಿದ ತಾಣವಾಗಿದೆ.