ಜೈಸಲ್ಮೇರಿನ ಕೋಟೆಯ ಹೊರಭಾಗದಲ್ಲಿರುವ ಮನಕ್ ಚೌಕ್ ಮತ್ತು ಹವೇಲಿಗಳು ಇಲ್ಲಿನ ಪ್ರಮುಖ ಪ್ರವಾಸಿ ಆಕರ್ಷಣೆಗಳಾಗಿವೆ. ಈ ಹವೇಲಿಗಳನ್ನು ಸುಂದರವಾದ ಚಿತ್ರಕಲೆ ಮತ್ತು ಕರಕುಶಲ ವಸ್ತುಗಳಿಂದ ಶೃಂಗಾರಗೊಳಿಸಲಾಗಿರುತ್ತದೆ. ಈ ಹವೇಲಿಗಳಲ್ಲಿ ಪಟ್ವೋಂ- ಕಿ – ಹವೇಲಿ, ಸಲೀಂ ಸಿಂಗ್ – ಕಿ- ಹವೇಲಿ ಮತ್ತು ನಾಥ್ ಮಲ್ಜಿ – ಕಿ- ಹವೇಲಿಗಳು ಅತ್ಯಂತ ಪ್ರಸಿದ್ಧ ಸ್ಮಾರಕಗಳಾಗಿವೆ.ಇಲ್ಲಿನ ಒಟ್ಟಾರೆ ಮಾರುಕಟ್ಟೆ ಪ್ರದೇಶವನ್ನು ’ ಸದರ್ ಮಂಡಿ’ ಎಂದು ಕರೆಯಲಾಗುತ್ತದೆ. ಒಂದಾನೊಂದು ಕಾಲದಲ್ಲಿ ಇದೊಂದು ಪ್ರಸಿದ್ಧ ಧಾನ್ಯದ ಮಾರುಕಟ್ಟೆಯಾಗಿದ್ದು, ಇರಾಕ್, ಈಜಿಪ್ಟ್, ಪರ್ಷಿಯಾ ಮತ್ತು ಅರೇಬಿಯಾ ದೇಶಗಳಿಂದ ವರ್ತಕರು ಇಲ್ಲಿಗೆ ಆಗಮಿಸುತ್ತಿದ್ದರು. ಮನಕ್ ಚೌಕ್ ಮಾರುಕಟ್ಟೆ ಪ್ರದೇಶದಲ್ಲಿದ್ದು ಅಲಂಕಾರಯುತವಾದ ಚರ್ಮದ ವಸ್ತುಗಳಿಗೆ, ಸಾಂಪ್ರದಾಯಿಕವಾದ ಬೆಳ್ಳಿಯ ಆಭರಣಗಳಿಗೆ , ಕುಸುರಿ ಕಲೆಯ ವಸ್ತುಗಳಿಗೆ ಮತ್ತು ಪುರಾತನ ಕಾಲದ ಕಲಾ ವಸ್ತುಗಳನ್ನು ಕೊಳ್ಳಲು ಬಯಸುವವರ ನೆಚ್ಚಿನ ತಾಣವಾಗಿದೆ. ಇದೊಂದು ಅಪರೂಪವಾದ ಮಾರುಕಟ್ಟೆ ಪ್ರದೇಶವಾಗಿದ್ದು, ಇಲ್ಲಿ ಪ್ರವಾಸಿಗರು ಸ್ಥಳೀಯ ಕಲಾವಿದರು ಕಲಾ ವಸ್ತುಗಳನ್ನು ಹೇಗೆ ತಯಾರಿಸುತ್ತಾರೆ ಎಂಬ ಪ್ರಕ್ರಿಯೆಯನ್ನು ಪ್ರತ್ಯಕ್ಷವಾಗಿ ನೋಡಬಹುದಾಗಿದೆ.