ಶುಂಠಿಕೊಪ್ಪವು ಮಡಿಕೇರಿ ಮತ್ತು ಕುಶಾಲಗರದ ಮಧ್ಯೆ ಮಂಗಳೂರು-ಮೈಸೂರು ರಸ್ತೆಯಲ್ಲಿ ಇರುವ ಒಂದು ಸಣ್ಣ ಪಟ್ಟಣ. ಶುಂಠಿಕೊಪ್ಪದ ಕಾಫಿ ಮತ್ತು ಮೆಣಸು ಎಸ್ಟೇಟ್‌ಗಳು ತುಂಬಾ ಜನಪ್ರಿಯ. ಮಧುರಮ್ಮಾ ಎಸ್ಟೇಟ್‌ ಈ ಪ್ರದೇಶದಲ್ಲೇ ಅತಿ ದೊಡ್ಡ ಎಸ್ಟೇಟ್‌. ಸ್ಥಳೀಯ ಜನರ ಆಸಕ್ತಿಕರ ಆಟವೆಂದರೆ ಫುಟ್‌ಬಾಲ್‌. ಪ್ರತಿವರ್ಷವೂ ಸ್ಥಳೀಯ ಕ್ಲಬ್‌ನಿಂದ ಗೋಲ್ಡ್‌ ಕಪ್‌ ನಡೆಯುತ್ತದೆ. ರವಿವಾರ ಶುಂಠಿಕೊಪ್ಪದಲ್ಲಿ ಸಂತೆ ನಡೆಯುತ್ತದೆ. ಆ ದಿನ ಸಮೀಪದ ಎಸ್ಟೇಟ್‌ನ ಜನರು ವಾರದ ಅಗತ್ಯಕ್ಕೆ ಬೇಕಾದ ಸಾಮಾನುಗಳನ್ನು ಖರೀದಿಸಲು ಬರುತ್ತಾರೆ. ಸಮೀಪದ ಹಳ್ಳಿಗಳಾದ ಕೊಡಗರ ಹಳ್ಳಿ, ಕಂಬಿಬಾನೆ, ಹೊಸಕೋಎ, ನಾಕೂರು, ಗರಗಂಡೂರು, ಕೆಡಕ್ಕಲ್‌, ಕಡ್ಲೆಮನೆ ಇತ್ಯಾದಿ. ನಗರದ ಗಡಿಬಿಡಿಯ ಜೀವನದಿಂದ ಜಿಗುಪ್ಸೆ ಹುಟ್ಟಿದ್ದರೆ ಈ ಪ್ರದೇಶ ಅಂಥವರಿಗೆ ನೆಮ್ಮದಿಯನ್ನು ನೀಡುತ್ತದೆ.