ಕೋವೈ ಕುಟ್ಟ್ರಲಂ ಎಂಬುದು ಕೊಯಮತ್ತೂರಿನ ಸಮೀಪದ ಒಂದು ಪ್ರಸಿದ್ಧ ವಿಹಾರ ತಾಣವಾಗಿದೆ. ಈ ಸ್ಥಳವು ಇಲ್ಲಿ ಧುಮ್ಮಿಕ್ಕುವ ಜಲಪಾತಕ್ಕೆ ಪ್ರಸಿದ್ಧಿಯನ್ನು ಪಡೆದಿದೆ. ಈ ನೀರು ಸಿರುವನಿ ಬೆಟ್ಟಗಳಲ್ಲಿ ಹುಟ್ಟಿ ಹರಿಯುವ ತೊರೆಯಿಂದ ಬರುತ್ತದೆ. ಕೊಯಮತ್ತೂರಿನ ಪಶ್ಚಿಮಕ್ಕೆ ಇರುವ ಈ ಬೆಟ್ಟಗಳು ಪಶ್ಚಿಮ ಘಟ್ಟದ ಒಂದು ಭಾಗವಾಗಿವೆ. ಕೋವೈ ಕುಟ್ಟ್ರಲಂ ಈ ನಗರದಿಂದ 35 ಕಿ.ಮೀ ದೂರದಲ್ಲಿದ್ದು, ಸುಲಭವಾಗಿ ಇಲ್ಲಿಗೆ ತಲುಪಬಹುದು.
ಈ ಸ್ಥಳದಲ್ಲಿ ಜಲಪಾತದಿಂದ ಮೇಲೆ ಪ್ರಸಿದ್ಧವಾದ ಸಿರುವನಿ ಜಲಾಶಯವನ್ನು ನಿರ್ಮಿಸಲಾಗಿದೆ. ಈ ಜಲಪಾತ, ಜಲಾಶಯ ಮತ್ತು ಸುತ್ತ- ಮುತ್ತಲ ಪ್ರದೇಶದ ನಿರ್ವಹಣೆಯನ್ನು ಅರಣ್ಯ ಇಲಾಖೆ ನೋಡಿಕೊಳ್ಳುತ್ತಿದೆ. ಕೋವೈ ಕುಟ್ಟ್ರಲಂ ಜಲಪಾತಕ್ಕೆ ಹೋಗಬೇಕಾದರೆ ಮೊದಲು ಅರಣ್ಯ ಇಲಾಖೆಯ ಅನುಮತಿ ಪಡೆಯಬೇಕಾದುದು ಅನಿವಾರ್ಯ. ನಗರದಿಂದ ಈ ಜಲಪಾತಕ್ಕೆ ಕೆಲವೇ ಕೆಲವು ಬಸ್ಸುಗಳು ಮಾತ್ರ ಸಂಚರಿಸುತ್ತವೆ. ಹಾಗಾಗಿ ಸಂಜೆ ಐದರ ಒಳಗೆ ಈ ಜಲಪಾತವನ್ನು ನೋಡಿಕೊಂಡು ವಾಪಸ್ಸಾಗುವಂತೆ ಯೋಜನೆ ಮಾಡಿಕೊಂಡು ಹೋಗುವುದು ಉತ್ತಮ. ಆನಂತರ ಇಲ್ಲಿಗೆ ಯಾರನ್ನು ಬಿಡುವುದಿಲ್ಲ.