ಬಿಷ್ಣುಪುರದ ಪ್ರವಾಸಿ ತಾಣಗಳಲ್ಲಿ ನಮಗೆ ಅಗ್ರಪಟ್ಟಿಯಲ್ಲಿ ಕಾಣಸಿಗುವುದೆಂದರೆ ’ಕೈಬುಲ್ ಲಾಮ್ಜಾವೋ’ ರಾಷ್ತ್ರೀಯ ಉದ್ಯಾನವನ. ವಿಶ್ವದ ಅತ್ಯಂತ ದೊಡ್ಡ ತೇಲುವ ಉದ್ಯಾನವನವೆಂದೇ ಪ್ರಖ್ಯಾತಿ ಪಡೆದಿರುವ ಈ ಉದ್ಯಾನವನವು ಸರೋವರದ ದಕ್ಷಿಣ ಪಾತ್ರದಲ್ಲಿದೆ. ಇದು ತೇಲಲು ಕಾರಣ ಇಲ್ಲಿರುವ ಏಕರೂಪದ ಪರಿಸರ ವ್ಯವಸ್ಥೆ. ’ಫುಮ್ಡಿ’ಗಳೆಂದು ಕರೆಯಲ್ಪಡುವ ತೇಲುವ ಜೌಗು ಸಸ್ಯಗಳೇ ಇದಕ್ಕೆ ಕಾರಣ. ಲೋಕ್ತಾಕ್ ಸರೋವರದ ಅವಿಭಾಜ್ಯ ಅಂಗವಾಗಿರುವ ’ಕೈಬುಲ್ ಲಾಮ್ಜಾವೋ’ ಉದ್ಯಾನವನವು ಬಿಷ್ಣುಪುರದ ಹತ್ತಿರದಲ್ಲಿರುವ ’ತಂಗಾ’ ಎನ್ನುವ ಪಟ್ಟಣದಲ್ಲಿದೆ.
ಈ ಮೊದಲೇ ಹೇಳಿದಂತೆ ಬಿಷ್ಣುಪುರವು ಅಪರೂಪದ ಸಾಂಗಾಯ್ ಜಿಂಕೆಗಳ ಆಶ್ರಯತಾಣ. ಇಲ್ಲಿ ಈ ವಿಶಿಷ್ಟ ಜಿಂಕೆಗಳ ರಕ್ಷಣೆಗೆಂದು ಸ್ಥಾಪಿಸಲಾದ ಅಭಯಾರಣ್ಯಗಳಲ್ಲಿ ಒಂದಾದ ’ಕೈಬುಲ್ ಲಾಮ್ಜಾವೋ’ ಅಭಯಾರಣ್ಯವನ್ನು 1977ರಲ್ಲಿ ರಾಷ್ಟ್ರೀಯ ಉದ್ಯಾನವನವೆಂದು ಘೋಷಣೆ ಮಾಡಲಾಯಿತು. ಈ ನ್ಯಾಚುರಲ್ ಪಾರ್ಕ್ ಕೇವಲ ಸಾಂಗಾಯ್ ಜಿಂಕೆಗಳಿಗೆ ಮಾತ್ರವಲ್ಲ, ಇತರ ಪ್ರಾಣಿಗಳಿಗೂ ಆಶ್ರಯ ಒದಗಿಸುತ್ತಿದೆ. ಹಾಗ್ ಡೀರ್, ವಾಟರ್ ಫೌಲ್ ಮುಂತಾದ ಪ್ರಾಣಿಸಂಕುಲಗಳು ಈ ಉದ್ಯಾನವವನದಲ್ಲಿ ಬೆಚ್ಚಗೆ ಆಶ್ರಯ ಪಡೆದಿವೆ. ಅಂದಹಾಗೆ ಈ ರಕ್ಷಿತಾರಣ್ಯವು ಲೋಕ್ತಾಕ್ ಸರೋವರದಿಂದ ಸುತ್ತುವರೆದಿದ್ದು, ಜೀವಸಂಕುಲಗಳಿಗೆ ಉತ್ತಮ ತಂಪು ವಾತಾವರಣದ ಜೊತೆಗೆ ಪ್ರವಾಸಿಗರಿಗೆ ನೋಡಲು ಉತ್ತಮ ಪ್ರವಾಸಿತಾಣವನ್ನೇ ಸೃಷ್ಠಿಸಿದೆ. ಇಂಫಾಲ್ನಿಂದ ಕೇವಲ 53 ಕಿ.ಮೀ ದೂರದಲ್ಲಿರುವ ಈ ತಾಣಕ್ಕೆ ಪ್ರವಾಸಿಗರು ಸುಲಭವಾಗಿ ತೆರಳಬಹುದು. ಇನ್ನು ಒಕ್ಟೋಬರ್ ಮತ್ತು ಫೆಬ್ರವರಿ ತಿಂಗಳ ಮಧ್ಯೆ ಇಲ್ಲಿಗೆ ಭೇಟಿ ಕೊಟ್ಟರೆ ಪ್ರವಾಸ ಇನ್ನಷ್ಟು ಮಜವಾಗಿರುತ್ತದೆ.