ಬೆಂಗಳೂರಿಗೆ ಬರುವ ಪ್ರತಿಯೊಬ್ಬರಿಗೂ “ಮಲ್ಲೇಶ್ವರಂ” ಇಷ್ಟವಾಗುವುದು ಇದೇ ಕಾರಣಕ್ಕೆ!

ಕರ್ನಾಟಕ ರಾಜ್ಯದಲ್ಲಿರುವ ಪ್ರತಿಯೊಂದು ನಗರವು ತನ್ನದೇ ಆದ ವಿಶೇಷತೆ ಹೊಂದಿದೆ. ಕೆಲವು ಸ್ಥಳಗಳಲ್ಲಿ ನೀವು ಪುರಾತನ ಕಾಲದ ಅರಮನೆಗಳು, ಕೋಟೆಗಳು, ದೇವಾಲಯಗಳನ್ನು ನೋಡಿದರೆ, ಮತ್ತೆ ಕೆಲವು ಸ್ಥಳಗಳಲ್ಲಿನ ನೈಸರ್ಗಿಕ ಸೌಂದರ್ಯವು ನಿಮ್ಮನ್ನು ಕೈ ಬೀಸಿ ಕರೆಯುತ್ತವೆ. ಎಲ್ಲ ನಗರಗಳಲ್ಲಿಯೂ ಕೆಲವು ಏರಿಯಾಗಳು ಹತ್ತು ಹಲವು ಕಾರಣಗಳಿಗಾಗಿ ಜನಪ್ರಿಯತೆ ಗಳಿಸಿರುತ್ತವೆ. ಹಾಗೆಯೇ ಬೆಂಗಳೂರಿನಲ್ಲಿರುವ ಒಂದು ಏರಿಯಾ ಬಹಳ ಫೇಮಸ್ . ಅದು ಏಕೆ ಅಷ್ಟು ಪ್ರಸಿದ್ಧಿ ಪಡೆದಿದೆ, ಅಲ್ಲಿನ ವಿಶೇಷತೆ ಏನು ಇತ್ಯಾದಿ ಮಾಹಿತಿಗಳನ್ನು ತಿಳಿಯೋಣ ಬನ್ನಿ...ಸಾಮಾನ್ಯವಾಗಿ ಕರ್ನಾಟಕದ ಮಂದಿ ರಾಜ್ಯದ ರಾಜಧಾನಿ ಬೆಂಗಳೂರನ್ನು ಎಲ್ಲಿಗೆ ಹೋದರೂ ಮಿಸ್ ಮಾಡಿಕೊಳ್ಳುತ್ತಾರೆ. ದಕ್ಷಿಣ ಭಾರತದಲ್ಲಿ ಹೆಚ್ಚು ಇಷ್ಟಪಡುವ ಸ್ಥಳಗಳಲ್ಲಿ ಇದೂ ಒಂದಾಗಿದೆ. ದೇಶದ ಐಟಿ ಕೇಂದ್ರವಾಗಿರುವುದರಿಂದ ಬೆಂಗಳೂರು ಪ್ರಪಂಚದಾದ್ಯಂತ ಪ್ರಸಿದ್ಧವಾಗಿದೆ. ಸಾಮಾನ್ಯವಾಗಿ ಬೆಂಗಳೂರಿಗೆ ಬರುವ ಜನರು ವಿಶೇಷವಾಗಿ ಕೆಲವು ಪ್ರದೇಶಗಳಲ್ಲಿ ಉಳಿಯಲು, ಶಾಪಿಂಗ್ ಮಾಡಲು ಬಹಳ ಪಡುತ್ತಾರೆ. ಅಂತಹ ಪ್ರದೇಶಗಳ ಪೈಕಿ ಮಲ್ಲೇಶ್ವರಂ ಕೂಡ ಒಂದು. ಈ ಸ್ಥಳದ ಸಂಸ್ಕೃತಿ ಮತ್ತು ಪರಂಪರೆಯ ಬಗ್ಗೆ ತಿಳಿದುಕೊಳ್ಳಲು ನೀವು ಬಯಸಿದರೆ ಮಲ್ಲೇಶ್ವರಂಗೆ ಭೇಟಿ ನೀಡಲು ಯೋಜಿಸಿ.ಮಲ್ಲೇಶ್ವರಂ ಬೆಂಗಳೂರು ನಗರದ ಪ್ರಮುಖ ಪ್ರದೇಶವಾಗಿದೆ ಮತ್ತು ಅತ್ಯಂತ ಹಳೆಯ ವಸತಿ ಪ್ರದೇಶಗಳಲ್ಲಿ ಒಂದಾಗಿದೆ. ಬೆಂಗಳೂರಿನ ಉತ್ತರ ಭಾಗದಲ್ಲಿರುವ ಮಲ್ಲೇಶ್ವರಂ 1898 ರ ನಂತರ ಅಭಿವೃದ್ಧಿ ಹೊಂದಿದ ಯೋಜಿತ ಪ್ರದೇಶವಾಗಿದೆ. ಈ ಪ್ರದೇಶಕ್ಕೆ 17 ನೇ ಶತಮಾನದ ದೇವಸ್ಥಾನವಾದ ಕಾಡು ಮಲ್ಲೇಶ್ವರ ದೇವಸ್ಥಾನದಿಂದ ಈ ಹೆಸರು ಬಂದಿದೆ. ಹಾಗಾದರೆ ಮಲ್ಲೇಶ್ವರಂಗೆ ಬಂದಾಗ ನೀವು ಎಲ್ಲಿಗೆಲ್ಲಾ ಭೇಟಿ ನೀಡಬಹುದು ನೋಡೋಣ ಬನ್ನಿ...ದೇವಸ್ಥಾನಗಳುನೀವು ಮಲ್ಲೇಶ್ವರಂಗೆ ಬಂದಾಗ ಹಿಂದೂ ದೇವಾಲಯಗಳಿಗೆ ಭೇಟಿ ನೀಡಲೇಬೇಕು. ಇಲ್ಲಿ ಅನೇಕ ಹಳೆಯ ಹಿಂದೂ ದೇವಾಲಯಗಳಿವೆ. ಅವುಗಳಲ್ಲಿ ಮೂರು ಪ್ರಮುಖ ದೇವಾಲಯಗಳಿವೆ. ಇವುಗಳಲ್ಲಿ ನಂದಿತೀರ್ಥ ದೇವಾಲಯದ ಪಕ್ಕದಲ್ಲಿರುವ ಕಾಡು ಮಲ್ಲೇಶ್ವರ ದೇವಾಲಯವೂ ಸೇರಿದೆ. ಕಾಡು ಮಲ್ಲೇಶ್ವರ ದೇವಾಲಯವನ್ನು ವೆಂಕೋಜಿಯವರು ದ್ರಾವಿಡ ವಾಸ್ತುಶಿಲ್ಪ ಶೈಲಿಯಲ್ಲಿ ನಿರ್ಮಿಸಿದ್ದಾರೆ. ಕಾಡು ಮಲ್ಲೇಶ್ವರ ದೇವಸ್ಥಾನ ಎಂಬ ಹೆಸರು ಕನ್ನಡದ ಕಾಡು ಪದದಿಂದ ಬಂದಿದೆ. ಶಿವನಿಗೆ ಸಮರ್ಪಿತವಾದ ನಂದಿತೀರ್ಥ ದೇವಾಲಯವು ಒಂದು ದೊಡ್ಡ ದೇವಾಲಯವಾಗಿದೆ. ಜೊತೆಗೆ ಗಂಗಮ್ಮ ದೇವಿ ದೇವಸ್ಥಾನಕ್ಕೆ ಭೇಟಿ ನೀಡಬಹುದು. ಸಾಮಾನ್ಯವಾಗಿ ದೇವಾಲಯಗಳನ್ನು ಮಧ್ಯಾಹ್ನ ಮುಚ್ಚಲಾಗುತ್ತದೆ. ಆದ್ದರಿಂದ ನೀವು ಬೆಳಗ್ಗೆ ಅಥವಾ ಸಂಜೆ ಈ ದೇವಾಲಯಗಳಿಗೆ ಭೇಟಿ ನೀಡಬಹುದು.ಸ್ಯಾಂಕಿ ಟ್ಯಾಂಕ್ ಮಲ್ಲೇಶ್ವರಂನಲ್ಲಿ ಸುತ್ತಾಡುವಾಗ ನೀವು ಪ್ರಕೃತಿಯ ನಡುವೆ ಸ್ವಲ್ಪ ಸಮಯವನ್ನು ಶಾಂತಿಯುತವಾಗಿ ಕಳೆಯಲು ಬಯಸಿದರೆ, ನೀವು ಸ್ಯಾಂಕಿ ಟ್ಯಾಂಕ್ ಗೆ ಭೇಟಿ ನೀಡಬೇಕು. ಸ್ಯಾಂಕಿ ಟ್ಯಾಂಕ್ ಮಲ್ಲೇಶ್ವರಂ ದಡದಲ್ಲಿರುವ ಸುಂದರವಾದ ಸಿಹಿನೀರಿನ ಸರೋವರವಾಗಿದೆ. ಇಲ್ಲಿ ನೀವು ಬೆಳಗ್ಗೆ ಅಥವಾ ಸಂಜೆ ವಾಕ್ ಮಾಡಬಹುದು. ಇದಲ್ಲದೆ, ನೀವು ಲೇಕ್ ನಲ್ಲಿ ಬೋಟಿಂಗ್ ಅನ್ನು ಸಹ ಆನಂದಿಸಬಹುದು. ಪಕ್ಷಿವೀಕ್ಷಣೆಗೂ ಇದು ಉತ್ತಮ ಸ್ಥಳವಾಗಿದೆ. ಇಲ್ಲಿ ನೀವು ಶಾಂತಿಯುತ ಸ್ಥಳದಲ್ಲಿ ವಿವಿಧ ಜಾತಿಯ ಪಕ್ಷಿಗಳನ್ನು ನೋಡುವ ಅವಕಾಶವನ್ನು ಪಡೆಯುತ್ತೀರಿ.ಮಲ್ಲೇಶ್ವರಂ ಮಾರುಕಟ್ಟೆಮಲ್ಲೇಶ್ವರಂನಲ್ಲಿ ಸ್ಥಳೀಯ ಮಾರುಕಟ್ಟೆಯನ್ನು ಸಹ ಅನ್ವೇಷಿಸಬೇಕು. ಈ ಸ್ಥಳಗಳು ನಿಮಗೆ ವಿಭಿನ್ನವಾದ ಶಾಪಿಂಗ್ ಅನುಭವವನ್ನು ನೀಡುತ್ತವೆ. ತಾಜಾ ಹೂವುಗಳು, ತರಕಾರಿಗಳಿಂದ ಹಿಡಿದು ದಕ್ಷಿಣ ಭಾರತದ ವಸ್ತುಗಳು ಇತ್ಯಾದಿಗಳನ್ನು ಇಲ್ಲಿ ನೀವು ಕಾಣಬಹುದು. ಬೆಳಗ್ಗೆ ಇಲ್ಲಿನ ಹೂವಿನ ಮಾರುಕಟ್ಟೆಗೆ ಭೇಟಿ ನೀಡಬೇಕು. ಈ ಮಾರುಕಟ್ಟೆಯು ಅದರ ಪರಿಮಳಯುಕ್ತ ಹೂವಿನ ಮಾಲೆಗಳಿಗೆ ಹೆಸರುವಾಸಿಯಾಗಿದೆ, ಇದನ್ನು ದೇವಾಲಯಗಳಲ್ಲಿ ಬಳಸಲಾಗುತ್ತದೆ. ಅಲ್ಲದೆ, ತಾಜಾ ಮತ್ತು ಸಾವಯವ ಉತ್ಪನ್ನಗಳನ್ನು ಮತ್ತು ದಕ್ಷಿಣ ಭಾರತದ ಮಸಾಲೆಗಳನ್ನು ಖರೀದಿಸಲು ತರಕಾರಿ ಮತ್ತು ಮಸಾಲೆ ಮಾರುಕಟ್ಟೆಗೆ ತೆರಳಬಹುದು.ಶಾಪಿಂಗ್...ಶಾಪಿಂಗ್ಮಲ್ಲೇಶ್ವರಂನಲ್ಲಿ ಸಾಕಷ್ಟು ಸ್ಥಳೀಯ ಮಾರುಕಟ್ಟೆಗಳಿವೆ. ಇವು ಎಲ್ಲಾ ರೀತಿಯ ಶಾಪರ್ಸ್ ಗೆ ಅನುಕೂಲ. ಅಗ್ಗದ ಉತ್ಪನ್ನಗಳಿಂದ ಹಿಡಿದು ಬ್ರಾಂಡೆಡ್ ಉತ್ಪನ್ನಗಳವರೆಗೆ ಮಲ್ಲೇಶ್ವರಂನಲ್ಲಿ ಎಲ್ಲ ಗುಣಮಟ್ಟ, ದರದಲ್ಲೂ ಲಭ್ಯ. ಹೂವಿನ ಮಾರುಕಟ್ಟೆಗಳಲ್ಲಿ ಮಲ್ಲಿಗೆ ಮಾಲೆಗಳು, ಗುಲಾಬಿಗಳು ಮತ್ತು ಇತರ ಹೂವುಗಳನ್ನು ಸಂಗ್ರಹಿಸಬಹುದು. ಜೊತೆಗೆ ಕೆಲವು ವರ್ಣರಂಜಿತ ಚಿತ್ರಗಳನ್ನು ಕ್ಲಿಕ್ ಮಾಡಲು ಇದು ಖಂಡಿತವಾಗಿಯೂ ಅದ್ಭುತ ಸ್ಥಳವಾಗಿದೆ.ಸಂಪಿಗೆ ರಸ್ತೆ (ಮಲ್ಲೇಶ್ವರಂನ ಪ್ರಮುಖ ಬೀದಿಗಳಲ್ಲಿ ಒಂದಾಗಿದೆ) ರಸ್ತೆಯ ಎರಡೂ ಬದಿಗಳಲ್ಲಿ ಅಂಗಡಿಗಳನ್ನು ಹೊಂದಿದೆ. ಅಂಗಡಿಗಳು ಆಭರಣಗಳು, ಸೀರೆಗಳು, ಚಪ್ಪಲಿಗಳು ಮತ್ತು ಇತರವುಗಳನ್ನು ಇಲ್ಲಿ ಮಾರಾಟ ಮಾಡಲಾಗುತ್ತದೆ. ಹಾಗೆಯೇ ಮಲ್ಲೇಶ್ವರಂ 11 ಮತ್ತು 13ನೇ ಕ್ರಾಸ್ ನಲ್ಲಿ ಆಟಿಕೆಗಳು,ಬ್ಯಾಗ್ ಗಳು, ತರಕಾರಿಗಳು ಮತ್ತು ಹಣ್ಣುಗಳು ಸೇರಿದಂತೆ ಎಲ್ಲಾ ರೀತಿಯ ಉತ್ಪನ್ನಗಳನ್ನು ಮಾರಾಟ ಮಾಡುವ ಸ್ಥಳೀಯ ಅಂಗಡಿಗಳನ್ನು ಕಾಣಬಹುದು. ಮಂತ್ರಿ ಸ್ಕ್ವೇರ್ ಮಾಲ್ (ಶಾಪಿಂಗ್ ಸೆಂಟರ್) ಕೂಡ ಬ್ರ್ಯಾಂಡೆಡ್ ಬಟ್ಟೆಗಳು, ಬ್ಯಾಗ್ ಗಳು ಮತ್ತು ಬೂಟುಗಳನ್ನು ಖರೀದಿಸಲು ಪರಿಪೂರ್ಣ ಸ್ಥಳವಾಗಿದೆ. ಶಾಪಿಂಗ್ ಸೆಂಟರ್ ದೊಡ್ಡದಾಗಿದ್ದು, ಅದರೊಳಗೆ ಕೆಲವು ಸೂಪರ್ಮಾರ್ಕೆಟ್ ಗಳು ಇವೆ.ರುಚಿ ರುಚಿಯಾದ ಸ್ಥಳೀಯ ಆಹಾರಮಲ್ಲೇಶ್ವರಂಗೆ ಬಂದ ಮೇಲೆ ತಿಂಡಿಯ ರುಚಿ ನೋಡದಿದ್ದರೆ ಹೇಗೆ ಹೇಳಿ. ಇಲ್ಲಿನ ಆಹಾರವು ವಿಶಿಷ್ಟವಾಗಿರುವುದಲ್ಲದೆ, ಸಂಪೂರ್ಣವಾಗಿ ರುಚಿಕರವಾಗಿದೆ. ವಿಶೇಷವಾಗಿ ಸ್ಥಳೀಯ ಆಹಾರ. ಸ್ಥಳೀಯ ಆಹಾರ ಪೂರೈಸುವ ಅನೇಕ ರೆಸ್ಟೋರೆಂಟ್ ಗಳಿಗೆ ಮಲ್ಲೇಶ್ವರಂ ನೆಲೆಯಾಗಿದೆ. ಬೆಳಗಿನ ಜಾವ ಬೆಣ್ಣೆ ಮಸಾಲೆ ದೋಸೆ, ಬಿಸಿ ಬೇಳೆ ಬಾತ್ , ಪುಳಿಯೊಗರೆ, ಉಪ್ಪಿಟ್ಟು, ಪೊಂಗಲ್ ಮತ್ತು ಫಿಲ್ಟರ್ ಕಾಫಿಯನ್ನು ಮರೆಯದೆ ಸೇವಿಸಿ. ಹಾಗೆಯೇ ಸಂಜೆ ವೇಳೆಗೆ 99 ವೆರೈಟಿ ದೋಸೆ, ದಹಿ ಪೂರಿ, ಬೇಲ್ ಪೂರಿ, ಹಪ್ಪಳ, ಕೋಲ್ಡ್ ಕಾಫಿ ಸೇರಿದಂತೆ ಇನ್ನು ಅನೇಕ ಸಿಹಿ ತಿನಿಸುಗಳನ್ನು ಸವಿಯಬಹುದು.