ವಾಸುಕಿ ತಾಲ್ ಇರುವುದು ಸಮುದ್ರ ಮಟ್ಟದಿಂದ 4135 ಮೀಟರ್ ಎತ್ತರದಲ್ಲಿ. ಕೇದಾರನಾಥದಿಂದ 8 ಕಿ.ಮೀ. ದೂರದಲ್ಲಿದೆ. ಈ ಕೆರೆಯು ಹಿಮಾಲಯ ಪರ್ವತಗಳಿಂದ ಸುತ್ತುವರಿಯಲ್ಪಟ್ಟಿದ್ದು, ಅತ್ಯಾಕರ್ಷಕವಾಗಿ ಗೋಚರಿಸುತ್ತದೆ. ಉತ್ತರಖಂಡ ರಾಜ್ಯದ ಒಂದು ಖಾಯಂ ಪ್ರವಾಸಿತಾಣವಾಗಿ ಇದು ಜನಪ್ರಿಯವಾಗಿದೆ. ಇಲ್ಲಿ ಬರುವ ಪ್ರವಾಸಿಗರಿಗೆ ಲಭಿಸುವ ಇನ್ನೊಂದು ಆಕರ್ಷಕ ನೋಟ ಚೌಖಂಬಾ ಪರ್ವತಗಳ ಶೃಂಗಗಳ ವೀಕ್ಷಣೆ. ಇವು ಕೂಡ ಕೆರೆಗೆ ಸಮೀಪದಲ್ಲಿಯೇ ಇರುವುದರಿಂದ ಈ ತಾಣ ಇನ್ನಷ್ಟು ಜನಪ್ರಿಯವಾಗಿದೆ.
ಪ್ರವಾಸಿಗರು ಇಲ್ಲಿ ತಲುಪುವ ಮಾರ್ಗದಲ್ಲಿ ಚತುರಂಗಿ ಹಾಗೂ ವಾಸುಕಿಯನ್ನು ವೀಕ್ಷಿಸಿ ಮುಂದೆ ಬಂದಿರುತ್ತಾರೆ. ಈ ಮಾರ್ಗದಲ್ಲಿ ಬರುವುದು ಸುಲಭವೇನಲ್ಲ. ಸಾಕಷ್ಟು ಕಷ್ಟ, ಸವಾಲುಗಳನ್ನು ಎದುರಿಸಿದ ನಂತರವೇ ಈ ಆಕರ್ಷಕ ಹಾಗೂ ರಮಣೀಯ ನೋಟ ಒಳಗೊಂಡ ತಾಣ ದರ್ಶಿಸಲು ಸಾಧ್ಯ. ಇಲ್ಲಿ ತಲುಪುವ ಹೊತ್ತಿಗೆ ಸಾಕಷ್ಟು ಸಾಮರ್ಥ್ಯ ಹಾಗೂ ಶಕ್ತಿ ಕುಂದಿರುತ್ತದೆ. ಪ್ರವಾಸಿಗರು ಈ ತಾಣ ಸಂದರ್ಶಿಸುವುದಾದರೆ ಜೂನ್ ತಿಂಗಳಿಂದ ಅಕ್ಟೋಬರ್ ನಡುವಿನ ಅವಧಿಯಲ್ಲಿ ಬರುವುದು ಉತ್ತಮ ಎಂಬ ಸಲಹೆ ನೀಡಲಾಗುತ್ತದೆ. ಈ ಸಮಯದಲ್ಲಿ ವಾತಾವರಣ ಇಲ್ಲಿ ಸಹನೀಯವಾಗಿರುತ್ತದೆ.