ನಿಕೋಬಾರ್ ದ್ವೀಪ ಸಮೂಹದಲ್ಲಿ ಅತ್ಯಂತ ದೊಡ್ಡ ದ್ವೀಪ ಇದಾಗಿದೆ. ಇದು ಎಲ್ಲಾ ದ್ವೀಪಗಳಿಗೆ ದಕ್ಷಿಣಕ್ಕಿದೆ ಮತ್ತು ಇಂದಿರಾ ಪಾಯಿಂಟ್ ಇದರ ಬಳಿಯೆ ಇದೆ. ಈ ಪ್ರದೇಶವು ತನ್ನಲ್ಲಿರುವ ವಿಶಿಷ್ಟ ಸಸ್ಯಗಳು, ಪ್ರಾಣಿಗಳು, ಜಲಜೀವಿಗಳು, ಅನನ್ಯ ಪ್ರಭೇದದ ಹಕ್ಕಿಗಳು ಮತ್ತು ಹೂವುಗಳಿಗೆ ಹೆಸರುವಾಸಿಯಾಗಿದೆ. ಇಲ್ಲಿನ ಪ್ರಕೃತಿ ಇಲ್ಲಿನ ಪ್ರಮುಖ ಆಕರ್ಷಣೆ ಹಾಗೂ ಮಧುಚಂದ್ರಕ್ಕೆ ಹೇಳಿ ಮಾಡಿಸಿನ ಸ್ಥಳ. ಪವನ್ ಹಂಸ್ ಹೆಲಿಕಾಪ್ಟರ್ ಮತ್ತು ದೋಣಿ ಸೌಲಭ್ಯಗಳ ಮೂಲಕ ಇಲ್ಲಿಗೆ ತಲುಪುವುದು ಅಷ್ಟೇನು ಕಷ್ಟವಲ್ಲ. ದೋಣಿಯಲ್ಲಿ ಪ್ರಯಾಣಿಸುವುದು ನಿಮ್ಮ ನಿರ್ಧಾರವಾಗಿದ್ದಲ್ಲಿ ದಾರಿಯುದ್ದಕ್ಕೂ ಹಲವು ಮನೋಹರವಾದ ಸ್ಥಳಗಳಿವೆ.

ಕಾಂಪೆಲ್ ಬೇ ರಾಷ್ಟ್ರೀಯ ಉದ್ಯಾನ ಇಂದಿರಾ ಪಾಯಿಂಟ್ ಬಳಿಕ ಅತ್ಯಂತ ಹೆಚ್ಚು ಭೇಟಿ ನೀಡುವ ಪ್ರವಾಸಿ ತಾಣವಾಗಿದೆ. ಇಲಿನ ವಿಶಿಷ್ಟ ಹಕ್ಕಿ ತಳಿಗಳಾದ ನಿಕೋಬಾರ್ ಸ್ಕ್ರಬ್ ಫ್ಲೋ ಮತ್ತು ನಿಕೋಬಾರ್ ಮೆಗಾ ಪೋಡ್ ಪಕ್ಷಿ ಪ್ರೀಯರ ಅತ್ಯಂತ ಪ್ರಮುಖ ಆಕರ್ಷಣೆಯಾಗಿದೆ. ಇದು ಛಾಯಾಚಿತ್ರಗ್ರಾಹಕರ ಮೆಚ್ಚಿನ ತಾಣವೂ ಆಗಿದೆ. ಇದೊಂದು ವಲ್ಡ್ ವೈಡ್ ಫಂಡ್ ಫಾರ್ ನೇಚರ್ ನಿಂದ ಗುರುತಿಸಲಾದ ದ್ವೀಪವೂ ಆಗಿದೆ.