ವೇಲಾಂಕಣ್ಣಿ ಚರ್ಚ್ ಅಥವಾ 'ಬೆಸಿಲಿಕಾ ಆಫ್ ಅವರ್ ಲೇಡಿ ಆಫ್ ಗುಡ್ ಹೆಲ್ತ್', ವೇಲಾಂಕಣ್ಣಿಯೆಂಬ ಪವಿತ್ರ ಪಟ್ಟಣದ ಅತ್ಯಂತ ಪ್ರಮುಖ ಆಕರ್ಷಣೆಯಾಗಿದೆ. ಹದಿನಾರನೆಯ ಶತಮಾನದಲ್ಲಿ ಒಂದು ಹುಲ್ಲು ಗುಡಿಸಲಿನ ಚಾಪೆಲ್ ಆಗಿ ಆರಂಭಗೊಂಡ ಈ ಚರ್ಚ್ ಮುಂದೆ 1771ರಲ್ಲಿ ಪಾರಿಶ್ ಚರ್ಚ್ ಆಗಿ ರೂಪಾಂತರಗೊಂಡಿತು. ನಂತರ 1962 ರಲ್ಲಿ 23ನೇ ಪೋಪ್ ಜಾನ್ರ್ವರಿಂದ ಮೈನರ್ ಬೆಸಿಲಿಕಾದ ಸ್ಥಾನಮಾನವನ್ನು ಪಡೆದುಕೊಂಡಿತು.
ಈ ಚರ್ಚ್ ಬೆಳಗ್ಗೆ ಐದರಿಂದ ರಾತ್ರಿ ಒಂಭತ್ತರವರೆಗೆ ತೆರೆದಿರುತ್ತದೆ. ಇಲ್ಲಿ ಪ್ರತಿದಿನವು ತಮಿಳು, ಮಲಯಾಳಂ ಮತ್ತು ಇಂಗ್ಲೀಷಿನಲ್ಲಿ ಸಾಮೂಹಿಕ ಪ್ರಾರ್ಥನೆಯನ್ನು ಮಾಡಲಾಗುತ್ತದೆ. ನೊವೆನ ಪ್ರಾರ್ಥನೆಗಳು, ರೋಸರಿ ಮತ್ತು ಸಂಜೆ ಆರಕ್ಕೆ ಸಂಜೆ ಪ್ರಾರ್ಥನೆಗಳನ್ನು ಇಲ್ಲಿ ನಿರ್ವಹಿಸಲಾಗುತ್ತದೆ.
1974-75 ರಲ್ಲಿ ಈ ಬೆಸಿಲಿಕಾವನ್ನು ಫ್ರಾನ್ಸಿನ ಲೌರ್ಡ್ಸ್ ನಲ್ಲಿರುವ ಬೆಸಿಲಿಕಾದಂತೆ ವಿನ್ಯಾಸಗೊಳಿಸಿ ವಿಸ್ತರಿಸಲಾಯಿತು. ಹಾಗಾಗಿ ವೇಲಾಂಕಣ್ಣಿಯ ಚರ್ಚನ್ನು "ಪೂರ್ವದ ಲೌರ್ಡ್ಸ್" ಎಂದು ಕರೆಯಲಾಗುತ್ತದೆ. ಸೆಪ್ಟೆಂಬರ್ ಮತ್ತು ಕ್ರಿಸ್ಮಮಸ್ ಸಮಯದಲ್ಲಿ ನಡೆಯುವ ಫೀಸ್ಟ್(ಉತ್ಸವ) ಸಂದರ್ಭದಲ್ಲಿ ಯಾತ್ರಾರ್ಥಿಗಳು ಇಲ್ಲಿಗೆ ಸಾಮಾನ್ಯವಾಗಿ ಬರಲು ಇಚ್ಛಿಸುತ್ತಾರೆ.