Click it and Unblock the Notifications
ಮೌಂಟ್ ಅಬು ಗಿರಿಧಾಮಕ್ಕೆ ಹೋಗುವ ಯಾವುದೇ ಪ್ರವಾಸಿಗರು ನೋಡಲೆ ಬೇಕಾದ ಸ್ಥಳಗಳಲ್ಲಿ ಮೌಂಟ್ ಅಬು ವನ್ಯಜೀವಿ ಧಾಮವು ಪ್ರಮುಖವಾದುದಾಗಿದೆ. ಈ ಧಾಮವು ಅರಾವಳಿ ಪರ್ವತ ಶ್ರೇಣಿಯಲ್ಲಿ ಮತ್ತು ಅದರ ತಪ್ಪಲು ಪ್ರದೇಶದಲ್ಲಿ ನೆಲೆಸಿದೆ. ಇದು ಸುಮಾರು 19 ಕಿ.ಮೀ ಉದ್ದ ಮತ್ತು 5-8 ಕಿ.ಮೀ ಅಗಲವನ್ನು ಹೊಂದಿದೆ. 1960 ರಲ್ಲಿ ಈ ಅರಣ್ಯವನ್ನು ವನ್ಯಜೀವಿ ಧಾಮವೆಂದು ಘೋಷಿಸಲಾಯಿತು. ಈ ಸ್ಥಳವು ಪ್ರವಾಸಿಗರಿಗೆ ವಿವಿಧ ಬಗೆಯ ಸಸ್ಯ ಮತ್ತು ಪ್ರಾಣಿ ಪ್ರಭೇದಗಳನ್ನು ನೋಡುವ ಭಾಗ್ಯವನ್ನು ಒದಗಿಸುತ್ತದೆ. ಹಾಗಾಗಿ ಈ ಸ್ಥಳವು ಪ್ರಕೃತಿ ಪ್ರಿಯರಿಗೆ ಮತ್ತು ವನ್ಯ ಜೀವಿ ಆಸಕ್ತರಿಗೆ ರಸದೌತಣವನ್ನು ಉಣಿಸುತ್ತದೆ. ಮೌಂಟ್ ಅಬು ವನ್ಯಜೀವಿ ಧಾಮವು ವಿಶೇಷವಾಗಿ ಸಸ್ಯ ಸಂಪತ್ತಿನ ಆಗರವಾಗಿದೆ. ಇದು 820 ಬಗೆಯ ಸಸ್ಯಗಳಿಗೆ ಆಶ್ರಯವನ್ನೊದಗಿಸಿದೆ. ಇಷ್ಟೇ ಅಲ್ಲದೆ ಈ ಸ್ಥಳದಲ್ಲಿ ಭಾರೀ ಸಂಖ್ಯೆಯಲ್ಲಿ ಆರ್ಕಿಡ್ ಹೂವುಗಳನ್ನು ಸಹ ನಾವು ಕಾಣಬಹುದು. ಇದರೊಂದಿಗೆ ಈ ವನ್ಯಜೀವಿ ಧಾಮದ ಸುತ್ತ –ಮುತ್ತ ಹಸಿರಿನಿಂದ ಕೂಡಿದ್ದು, ತನ್ನಲ್ಲಿರುವ ಪ್ರಾಣಿ ಸಂಪತ್ತಿಗಾಗಿ ಪ್ರಸಿದ್ಧಿ ಪಡೆದಿದೆ. ವನ್ಯಜೀವಿ ಪ್ರಿಯರು ಇಲ್ಲಿಗೆ ಇಲ್ಲಿನ ವಿಶಿಷ್ಟವಾದ ಮತ್ತು ಅಳಿವಿನಂಚಿನಲ್ಲಿರುವ ಪ್ರಾಣಿ ಪ್ರಭೇದಗಳನ್ನು ನೋಡಲು ಆಗಮಿಸುತ್ತಿರುತ್ತಾರೆ. ಹಿಂದೆ ಈ ಬೆಟ್ಟಗಳಲ್ಲಿ ಹುಲಿ ಮತ್ತು ಸಿಂಹಗಳು ಕಂಡುಬರುತ್ತಿದ್ದವು. ಆದರೆ ಈಗ ಕೇವಲ ಬೆಕ್ಕಿನ ಜಾತಿಯ ಮಾಂಸಾಹಾರಿ ಪ್ರಾಣಿಗಳು ಮಾತ್ರ ಕಂಡುಬರುತ್ತವೆ. ಅವುಗಳಲ್ಲಿ ಪ್ರಮುಖವಾದುದು ಚಿರತೆ. ಅಷ್ಟೇ ಅಲ್ಲದೆ ಈ ಧಾಮವು ಸಾಂಬರ್ ಜಿಂಕೆ, ಕಾಡು ಹಂದಿ, ಕರಡಿ, ನರಿ, ಭಾರತದ ಗುಳ್ಳೆ ನರಿ, ತೋಳ, ಕತ್ತೆ ಕಿರುಬ, ಭಾರತೀಯ ಪುನುಗು ಬೆಕ್ಕು ಮತ್ತು ಕಾಡು ಬೆಕ್ಕುಗಳಂತಹ ವಿಪುಲವಾದ ವನ್ಯಜೀವಿಗಳಿಗೆ ಆಶ್ರಯ ನೀಡಿದೆ.
