Click it and Unblock the Notifications
ಕಂಚನ್ ಜುಂಗಾ ರಾಷ್ಟ್ರೀಯ ಉದ್ಯಾನವನವನ್ನು 1977ರಲ್ಲಿ ಸ್ಥಾಪನೆ ಮಾಡಲಾಯಿತು. ಇದು ಸಿಕ್ಕಿಂ ರಾಜ್ಯದಲ್ಲಿರುವ ಅತ್ಯಂತ ದೊಡ್ಡ ರಾಷ್ಟ್ರೀಯ ಉದ್ಯಾನವನವಾಗಿದೆ. 850 ಚ.ಕಿ.ಮೀ ನಷ್ಟು ವಿಸ್ತಾರವನ್ನು ಹೊಂದಿರುವ ಈ ಉದ್ಯಾನವನವು ಸಿಕ್ಕಿಂನ ಉತ್ತರ ಜಿಲ್ಲೆಯಲ್ಲಿ ನೆಲೆಗೊಂಡಿದೆ. ಈ ಉದ್ಯಾನವನದ ಉತ್ತರಕ್ಕೆ ಟೆಂಟ್ ಶಿಖರವಿದ್ದರೆ, ಪೂರ್ವದಲ್ಲಿ ಮೌಂಟ್ ಲಮೊ ಅಂಗ್ಡೆನ್ ಪ್ರಪಾತವಿದೆ. ದಕ್ಷಿಣಕ್ಕೆ ನರ್ಸಿಂಗ್ ಮತ್ತು ಪಂಡಿಮ್ ಶಿಖರಗಳಿದ್ದರೆ, ಪಶ್ಚಿಮಕ್ಕೆ ಕಂಚನ್ ಜುಂಗಾ ಪರ್ವತವಿದೆ.
ಈ ಉದ್ಯಾನವನವು ಜೈವಿಕವಾಗಿ ಪರಿಸರ ಮಾಲಿನ್ಯದಿಂದ ಮತ್ತು ಜನ ಸಂಪರ್ಕದಿಂದ ದೂರವಿರುವುದರಿಂದಾಗಿ ಇಲ್ಲಿನ ಪ್ರಾಣಿಗಳು ಅತ್ಯಂತ ಸುರಕ್ಷಿತವಾಗಿವೆ. ಇಲ್ಲಿ ಹಿಮ ಚಿರತೆ, ಹಿಮಾಲಯನ್ ಕಪ್ಪು ಕರಡಿ, ಕೆಂಪು ಪಾಂಡಾ ಮತ್ತು ಚುಕ್ಕೆ ಜಿಂಕೆಗಳಂತಹ ಪ್ರಾಣಿಗಳನ್ನು ನಾವು ನೋಡಬಹುದು. ಈ ಉದ್ಯಾನವನದ ಕೆಲವು ಭಾಗಗಳಿಗೆ ಪ್ರವಾಸಿಗರಿಗೆ ಪ್ರವೇಶಾವಕಾಶವಿರುವುದರಿಂದ ನೀವು ಇಲ್ಲಿ ಸುತ್ತಾಡಬಹುದು. ಆದರು ಈ ಉದ್ಯಾನವನದ ಕೆಲವು ಭಾಗಗಳಲ್ಲಿ ಹೊಸ ಪ್ರಭೇದಗಳು ಕಾಣ ಸಿಗುವ ಅವಕಾಶ ಈಗಲೂ ಇದೆ.
ಈ ಉದ್ಯನವನದಲ್ಲಿ ಓಕ್, ದೇವದಾರು, ಬಿರ್ಚ್, ಮ್ಯಾಪಲ್ ಮತ್ತು ವಿಲ್ಲೋ ಮರಗಳನ್ನು ನಾವು ನೋಡಬಹುದು. ಇಲ್ಲಿನ ಎತ್ತರದ ಪ್ರದೇಶಗಳಲ್ಲಿ ಔಷಧೀಯ ಸಸ್ಯಗಳ ಜೊತೆಗೆ ಅಲ್ಪೈನ್ ಹುಲ್ಲುಗಳನ್ನು ಮತ್ತು ಪೊದೆಗಳನ್ನು ನಾವು ನೋಡಬಹುದು. ಇದರ ಜೊತೆಗೆ ಈ ಉದ್ಯಾನವನದಲ್ಲಿ ರಕ್ತ ವರ್ಣದ ಪೆಸಂಟ್ ( ನವಿಲು ಜಾತಿಯ ಹಕ್ಕಿ), ಸಟ್ಯೆ ಟ್ರಗೊಪನ್, ಒಸ್ಪ್ರೆ, ಹಿಮಾಲಯನ್ ಗ್ರಿಪ್ಫನ್, ಲಮ್ಮೆರ್ಜಿಯರ್ ಮತ್ತು ಟ್ರಗೊಪನ್ ಪೆಸೆಂಟ್ನಂತಹ ಹಕ್ಕಿಗಳನ್ನು ನಾವು ನೋಡಬಹುದು.
