ಧರಮಗಡವು ಒಡಿಶಾ ರಾಜ್ಯದ, ಕಲಾಹಂಡಿ ಜಿಲ್ಲೆಯ ಕೇಂದ್ರ ಕಾರ್ಯಸ್ಥಾನದ ಉಪವಿಭಾಗವಾಗಿದ್ದು, ಇದು ಕಲಾಹoಡಿಯ ಕಣಜ ಎಂಬುದಾಗಿಯೂ ಕೂಡ ಸಾಮಾನ್ಯವಾಗಿ ಕರೆಯಲ್ಪಡುತ್ತದೆ. ಧರಮಗಡವು ಒಡಿಶಾ ರಾಜ್ಯದ ಅಗ್ರಸ್ಥಾನದಲ್ಲಿರುವ ಭತ್ತದ ಉತ್ಪಾದನೆಯ ಕೇಂದ್ರಗಳಲ್ಲಿ ಒಂದಾಗಿದೆ. ಧರಮಗಡವು, ತನ್ನಲ್ಲಿ ಹಾಗೂ ತನ್ನ ಸುತ್ತಮುತ್ತಲಿನ ಪ್ರದೇಶಗಳಲ್ಲಿರುವ ವಿವಿಧ ಪುರಾತನ ಮತ್ತು ಕೆಲವೊಂದು ಅದ್ವಿತೀಯ ದೇವಸ್ಥಾನಗಳ ಕಾರಣದಿಂದ ಕೀರ್ತಿ ಗಳಿಸಿದೆ.
ಧರಮಗಡದ ಪ್ರವಾಸೋದ್ಯಮವು ತನ್ನಲ್ಲಿ ಹುದುಗಿರುವ ಪ್ರಾಕೃತಿಕ ವೈಭವಗಳಾದ ಭವ್ಯವಾದ ಬೆಟ್ಟಗಳು, ಮೆಟ್ಟಿಲುಗಳಿಂದ ಇಳಿಯುವ ರೀತಿಯಲ್ಲಿರುವ ಜಲಪಾತಗಳು, ವನ್ಯ ಜಂತುಗಳ ಕಲರವವನ್ನೊಳಗೊಂಡ ದಟ್ಟವಾದ ಕಾಡುಗಳು, ಮತ್ತು ಇದಕ್ಕೆ ವಿಭಿನ್ನವಾದಂತಹ ವಿಶಾಲವಾದ ಹುಲ್ಲುಗಾವಲುಗಳು ಇವೇ ಮೊದಲಾದವುಗಳನ್ನು ಸಾಕ್ಷೀಭೂತವಾಗಿಸಲು ಅನೇಕ ಜನರನ್ನು ತನ್ನೆಡೆಗೆ ಆಕರ್ಷಿಸುತ್ತದೆ.
ಧರಮಗಡದಲ್ಲಿ ಮತ್ತು ಅದರ ಸುತ್ತಮುತ್ತಲೂ ಇರುವ ಪ್ರವಾಸೀ ತಾಣಗಳು
ಧರಮಗಡವು ಶ್ರೀ ಆರೋಬಿಂದೋ ಮತ್ತು ಶ್ರೀ ಮಾ ಇವರುಗಳ ಪವಿತ್ರವಾದ ಅವಶೇಷಗಳ ತವರೂರು ಕೂಡ ಆಗಿದೆ. ಈ ಪವಿತ್ರವಾದ ಕೇಂದ್ರದ ದೈವಿಕತೆಯನ್ನು ಅನುಭವಿಸಲು ಬರುವ ಅಸಂಖ್ಯಾತ ಪ್ರವಾಸಿಗರು ಧರಮಗಡದ ಪ್ರವಾಸೋದ್ಯಮದಲ್ಲಿ ಕಂಡುಬರುತ್ತಾರೆ. ಅಂಪನಿ ಮತ್ತು ದೊಖರಿ ಚಂಚ್ರಾ ದಲ್ಲಿರುವ ಮಹೋನ್ನತವಾದ ಜಲಪಾತಗಳು ಧರಮಗಡದ ಸೌಂದರ್ಯಕ್ಕೆ ತಮ್ಮ ಕಾಣ್ಕೆಯನ್ನು ಸಲ್ಲಿಸಿವೆ. ಜುನಾಗಡ್ ಪಟ್ಟಣವು ಕೆಲವು ಪುರಾತನ ದೇವಾಲಯಗಳಾದ ಲಂಕೇಶ್ವರಿ, ಕನಕ್ ದುರ್ಗಾ, ಮತ್ತು ಇನ್ನೂ ಅನೇಕ ದೇವಾಲಯಗಳನ್ನು ಹೊಂದಿದೆ.
ಗುಡಹಂಡಿಯು ವಿಫುಲವಾದ ಪ್ರಾಕೃತಿಕ ಸೌಂದರ್ಯದಿಂದ ಹರಸಲ್ಪಟ್ಟಿದ್ದು, ಇಲ್ಲಿ ಕೆಲವೊಂದು ಪ್ರಾಚೀನ ಅವಶೇಷಗಳೂ ಕೂಡ ಇವೆ. ಮುಖಿಗುಡದಲ್ಲಿ (Mukhiguda) ದಟ್ಟವಾದ, ಹಚ್ಚ ಹಸುರಿನ ಕಾನನದ ನಡುವೆ ಹಾಗೂ ಬೆಟ್ಟಗಳ ನಡುವೆ ಇರುವ ಇಂದ್ರಾವತಿ ಅಣೆಕಟ್ಟು, ಅತೀ ಪ್ರಮುಖವಾದ ಪ್ರವಾಸೀ ತಾಣಗಳಲ್ಲೊಂದಾಗಿದೆ. ಖೈರ್ ಪದರ್ ಮತ್ತು ಗೋಲಾಮುಂಡಾಗಳಂತಹ ಸಣ್ಣ ಗ್ರಾಮಗಳು ತನ್ನ ಪ್ರವಾಸಿಗರಿಗಾಗಿ, ನಯನ ಮನೋಹರವಾದ ಮನಸೂರೆಗೊಳ್ಳುವಂತಹ ಬಯಲುಪ್ರದೇಶಗಳನ್ನು ಹೊಂದಿದೆ.
ಕೊಕ್ಸರಾವು ಧರಮಗಡದಲ್ಲಿರುವ ಮತ್ತೊಂದು ಸಣ್ಣ ಗ್ರಾಮವಾಗಿದ್ದು, ಈ ಗ್ರಾಮದ ನಿಪುಣ ಕಲಾವಿದರು ಶಿಲೆಗಳಲ್ಲಿ ರಚಿಸಿರುವ ಅದ್ಭುತ ಕಲಾಕೃತಿಗಳಿಗಾಗಿ ಈ ಗ್ರಾಮವು ಕೀರ್ತಿ ಪಡೆದಿದೆ. ಈ ಗ್ರಾಮವು ಶಿವ ದೇವಸ್ಥಾನ, ದಂತೇಶ್ವರಿ ದೇವಸ್ಥಾನ, ಬುದ್ಧರಾಜ ದೇವಸ್ಥಾನ, ಮತ್ತು ಶ್ರೀ ಜಗನ್ನಾಥ ದೇವಸ್ಥಾನಗಳಂತಹ ಕೆಲವೊಂದು ಪುರಾತನ ದೇವಸ್ಥಾನಗಳ ಆಶ್ರಯ ತಾಣವೂ ಆಗಿದೆ.
ಧರಮಗಡವನ್ನು ಸಂದರ್ಶಿಸಲು ಪ್ರಶಸ್ತ ಕಾಲಾವಧಿ
ಸೆಪ್ಟೆಂಬರ್ ತಿಂಗಳಿನಿಂದ ಮಾರ್ಚ್ ತಿಂಗಳವರೆಗಿನ ಅವಧಿಯಯಲ್ಲಿ ಧರಮಗಡದ ಪ್ರವಾಸೋದ್ಯಮವು ತನ್ನ ಚರಮಸೀಮೆಯನ್ನು ತಲುಪುತ್ತದೆ.
ಧರಮಗಡವನ್ನು ತಲುಪುವುದು ಹೇಗೆ ?
ಧರಮಗಡವು ದಕ್ಷಿಣ ಒಡಿಶಾದ ಪ್ರಮುಖ ಪ್ರವಾಸೀ ತಾಣಗಳಲ್ಲೊಂದಾಗಿರುವುದರಿಂದ ಈ ಪಟ್ಟಣವು ರಸ್ತೆಗಳು ಮತ್ತು ರೈಲ್ವೆ ಸೇವೆಗಳಿಂದ ಸುಸಜ್ಜಿತಗೊಂಡಿದೆ. ಅನೇಕ ಸರಕಾರೀ ಸ್ವಾಮ್ಯದ ಬಸ್ಸುಗಳು ಮತ್ತು ಖಾಸಗೀ ಸುಖಾಸೀನ ಬಸ್ಸುಗಳು ಪ್ರವಾಸಿಗರ ಸಂವಹನಕ್ಕಾಗಿ ಲಭ್ಯವಿವೆ. ಪ್ರವಾಸೀ ಸಂಸ್ಥೆಗಳು ಒದಗಿಸುವ ಅನೇಕ ಪ್ರವಾಸೀ ಪ್ಯಾಕೇಜುಗಳು, ಪ್ರವಾಸಿಗರು ಧರಮಗಡದ ಎಲ್ಲಾ ಪ್ರಮುಖ ಪ್ರವಾಸೀ ತಾಣಗಳಿಗೆ ಸಂಪರ್ಕಿಸಲು ಸಹಕಾರಿಯಾಗಿವೆ.
ಧರಮಗಡದ ಹವಾಮಾನ.
ಸೆಪ್ಟೆಂಬರ್ ತಿಂಗಳಿನಿಂದ ಮಾರ್ಚ್ ತಿಂಗಳಿನವರೆಗಿನ ಅವಧಿಯಲ್ಲಿ ಇಲ್ಲಿನ ವಾತಾವರಣವು ತಂಪಾಗಿರುವುದರಿಂದ, ಧರಮಗಡಕ್ಕೆ ಪ್ರವಾಸ ಕೈಗೊಳ್ಳಲು ಈ ಅವಧಿಯು ಅತೀ ಪ್ರಶಸ್ತವಾದ ಕಾಲವಾಗಿದೆ. ಈ ಅವಧಿಯಲ್ಲಿ, ಸೂರ್ಯನ ಎಳೆಬಿಸಿಲು ಮತ್ತು ದಿನವಿಡೀ ಬೀಸುವ ತಂಗಾಳಿಯು ಪ್ರಯಾಣವನ್ನು ಅಪ್ಯಾಯಮಾನವಾಗಿಸುತ್ತದೆ. ಈ ಅವಧಿಯಲ್ಲಿ ಮೈಮೂಳೆ ಕೊರೆಯುವ ಚಳಿಯಿಂದ ರಕ್ಷಿಸಿಕೊಳ್ಳಲು, ಪ್ರವಾಸಿಗರು ಸಾಕಷ್ಟು ಬೆಚ್ಚಗಿನ ಬಟ್ಟೆಗಳನ್ನು ಕೊಂಡೊಯ್ಯುವಂತೆ ಶಿಪಾರಸು ಮಾಡಲಾಗಿದೆ.