Click it and Unblock the Notifications
ಹಿಮಾಚಲ ಪ್ರದೇಶದ ಸುಂದರ ಪ್ರವಾಸಿ ತಾಣವಾಗಿರುವ ಭಗ್ಸು ಮ್ಯಾಕ್ಲಿಯೋಗಂಜ್ ಗೆ ಹತ್ತಿರದಲ್ಲಿದೆ. ಈ ಪ್ರವಾಸಿ ಗಮ್ಯಸ್ಥಾನ ಮನೆಮಾತಾಗಿರುವುದು ಇಲ್ಲಿರುವ ಪ್ರಾಚಿನ ದೇವಸ್ಥಾನ ಮತ್ತು ಮನಮೋಹಕ ಜಲಪಾತದಿಂದ. ಧಾರ್ಮಿಕ ಮಹತ್ವದ ಸ್ಪರ್ಶವುಳ್ಳದ್ದರಿಂದ ಮತ್ತು ಧರ್ಮಶಾಲಾದ ಸನ್ನಿಧಿಯಲ್ಲಿರುವುದರಿಂದ ವರ್ಷಂಪ್ರತಿ ಪ್ರವಾಸಿಗರನ್ನು ಸೆಳೆಯುತ್ತದೆ.
ಭಗ್ಸುವಿನಲ್ಲಿ ಪ್ರವಾಸಿಗರನ್ನು ಸೆಳೆಯುವ ಪ್ರಸಿದ್ದ ತಾಣವೆಂದರೆ ಪ್ರಾಚೀನ ಭಗ್ಸುನಾಗ್ ದೇವಸ್ಥಾನ, ಮ್ಯಾಕ್ಲಿಯೋಗಂಜ್ ನಿಂದ ಸುಮಾರು 3 ಕಿಲೋ ಮೀಟರ್ ದೂರದಲ್ಲಿದೆ. ಈ ದೇವಸ್ಥಾನ ಹಿಂದೂ ಲಯ ದೇವತೆ ಶಿವನಿಗೆ ಸಮರ್ಪಿತವಾಗಿದೆ. ದೇವಸ್ಥಾನದ ಆಸುಪಾಸಿನಲ್ಲಿ ಹತ್ತಾರು ನೀರಿನ ಕೊಳಗಳು ಮತ್ತು ಟೈಗರ್ ಹೆಡ್ ನೀರಿನ ನಳಿಗೆಗಳಿವೆ. ಹುಲಿ ತಲೆಯ ನೀರಿನ ನಳಿಗೆಯನ್ನು ಹಿಂದೂಗಳು ಪವಿತ್ರವೆಂದು ನಂಬುತ್ತಾರೆ. ಹಿತಕರವಾದ ವಾತಾವರಣ ಮತ್ತು ನಿಸರ್ಗದತ್ತ ಪರಿಸರವುಳ್ಳ ಈ ಪ್ರದೇಶ ಸೌಂದರ್ಯವನ್ನು ಹೆಚ್ಚಿಸಿದೆ.
ಇಂದ್ರಹಾರ ಪಾಸ್(ರಹದಾರಿ) ಒಂದು ಪ್ರಮುಖ ಪ್ರವಾಸಿ ಗಮ್ಯಸ್ಥಾನವಾಗಿದ್ದು ದೌಲಾಧರ್ ಪರ್ವತ ಶ್ರೇಣಿಯಲ್ಲಿ ಸಮುದ್ರ ಮಟ್ಟದಿಂದ 4342 ಮೀಟರ್ ಎತ್ತರದಲ್ಲಿದೆ. ಈ ರಹದಾರಿ ಚಂಬಾ ಮತ್ತು ಕಂಗ್ರಾ ಜಿಲ್ಲೆಗಳ ಭೌಗೋಳಿಕ ಗಡಿ. ಇಲ್ಲಿಗೆ ನಾವು ಧರ್ಮಶಾಲ ಅಥವಾ ಮ್ಯಾಕ್ಲಿಯೋಗಂಜ್ ನಿಂದ ಚಾರಣ ಹೊರಟು ಸುಲಭವಾಗಿ ತಲುಪಬಹುದು. ಪ್ರವಾಸಿಗರು ಧರ್ಮಶಾಲಾ ಮತ್ತು ಚಂಬ ನಡುವಿನ ಚಾರಣದ ದಾರಿಯಲ್ಲಿ ಮಿಂಕೈನಿ ಪಾಸ್ ಅನ್ನೂ ಭೇಟಿ ಮಾಡಬಹುದು. ಉತ್ತರ ಭಾಗದ ಪ್ರದೇಶದ ಶೃಂಗದಿಂದ ಪ್ರವಾಸಿಗರು ಭವ್ಯ ಪರ್ವತ ಶ್ರೇಣಿಯ ನೋಟವನ್ನು ಕಣ್ತುಂಬಿಕೊಳ್ಳಬಹುದು.
ಭಗ್ಸು(ಭಗ್ಸುನಾಗ್) ಪ್ರದೇಶವನ್ನು ಬೇರೇ ಬೇರೇ ವಿಧದ ಸಾರಿಗೆ ಸಂಪರ್ಕದ ಮೂಲಕ ಸುಲಭವಾಗಿ ತಲುಪಬಹುದು. ಧರ್ಮಶಾಲಾ ವಿಮಾನನಿಲ್ದಾಣ ಭಗ್ಸುವಿಗೆ ಹತ್ತಿರದಲ್ಲಿರುವ ವಿಮಾನನಿಲ್ದಾಣವಾಗಿದ್ದು ದೆಹಲಿ ಮತ್ತು ಕುಲುವಿನಿಂದ ಬಹಳಷ್ಟು ವಿಮಾನಗಳು ಇಲ್ಲಿ ಸಂಚರಿಸುತ್ತಿರುತ್ತವೆ. ಭಗ್ಸುವಿಗೆ ಹತ್ತಿರದಲ್ಲಿರುವ ರೈಲ್ವೇ ನಿಲ್ದಾಣವೆಂದರೆ ಪಠಾನಕೋಟ್ ರೈಲ್ವೇ ನಿಲ್ದಾಣ. ರೈಲ್ವೇ ನಿಲ್ದಾಣದಿಂದ ಭಗ್ಸುವಿಗೆ ಬಾಡಿಗೆ ಕ್ಯಾಬ್ಸ್ ಅಥವಾ ಕಾರ್ ದೊರೆಯುತ್ತದೆ. ಅಲ್ಲದೆ ಹತ್ತಾರು ಬಸ್ ಗಳೂ ಕೂಡ ಮ್ಯಾಕ್ಲಿಯೋಗಂಜ್ ಮತ್ತು ಧರ್ಮಶಾಲದಿಂದ ದೊರೆಯುತ್ತವೆ.
ಭಗ್ಸುವಿನಲ್ಲಿ ಸಮಶೀತೋಷ್ಣ ವಲಯದ ವಾತಾವರಣವಿದ್ದು ಸೌಮ್ಯವಾದ ಬೇಸಿಗೆ ಮತ್ತು ಶೀತಕರ ಚಳಿಗಾಲ ಅನುಭವಕ್ಕೆ ಬರುತ್ತದೆ. ಕಡಿಮೆ ಉಷ್ಣಾಂಶವಿರುವುದನ್ನು ಹೊರತುಪಡಿಸಿದರೆ ಚಳಿಗಾಲ ಭಗ್ಸುವಿಗೆ ಭೇಟಿ ನೀಡಲು ಪ್ರಶಸ್ತವಾದ ಸಮಯ. ಅದರಲ್ಲೂ ಹಿಮಪಾತವನ್ನು ನೋಡಲಿಚ್ಚಿಸುವವರು ಚಳಿಗಾಲದಲ್ಲಿ ಇಲ್ಲಿಗೆ ಭೇಟಿ ನೀಡಬೇಕು. ಶೀತದ ವಾತಾವರಣದಿಂದ ದೂರವಿರಲು ಇಚ್ಚಿಸುವವರು ಬೇಸಿಗೆಯಲ್ಲಿ ಹಿತಕರ ವಾತಾವರಣವಿರುವುದರಿಂದ ಬೇಸಿಗೆಯಲ್ಲಿ ಭೇಟಿ ಮಾಡಬಹುದು.
