ಕೊಚ್ಚಿಗೆ ತೆರಳಿದಾಗ ಭೇಟಿ ನೀಡಲೇ ಬೇಕಾದ ಪ್ರವಾಸೀತಾಣಗಳ ಪಟ್ಟಿಯಲ್ಲಿ ಸಾಂಟಾ ಕ್ರೂಜ್ ಕ್ಯಾಥೆಡ್ರಲ್ ಬೆಸಿಲಿಕಾ ಕೂಡ ಒಂದು. ಕೊಚ್ಚಿ ಬಂದರಿನ  ಪಕ್ಕದಲ್ಲಿಯೇ ಇರುವ ಈ ಚರ್ಚ್ ಭಾರತದಲ್ಲಿ ನಿರ್ಮಾಣವಾದ ಮೊದಲ ಚರ್ಚ್ ಎಂಬ ಹೆಗ್ಗಳಿಕೆಗೂ ಪಾತ್ರವಾಗಿದೆ. ಪ್ರಸ್ತುತ ದೇಶದಲ್ಲಿ ಎಂಟು ಬೆಸೆಲಿಕಾಗಳು ಅಸ್ಥಿತ್ವದಲ್ಲಿದ್ದು ಇದು ಮೊದಲನೆ ಸ್ಥಾನದಲ್ಲಿದೆ. ಇದೊಂದು ಪರಂಪರಾಗತ ಕಟ್ಟಡವಾಗಿದ್ದರಿಂದ ಭಾರತೀಯ ಪುರಾತತ್ವ ಇಲಾಖೆ ಇದರ ನಿರ್ವಹಣೆಯ ಜವಾಬ್ಧಾರಿಯನ್ನು ವಹಿಸಿಕೊಂಡಿದೆ.

ವಾಸ್ತುಶಿಲ್ಪ ಹಾಗೂ ಬೆಸೆಲಿಕಾ ಶೈಲಿಯ ಅಪರೂಪದ ಸಂಯೋಜನೆ ಇದಾಗಿದೆ. ದೇಶದಲ್ಲಿ ಗೋಥಿಕ್ ಕಲೆಯನ್ನು ಹೊಂದಿರುವ ಕೆಲವೇ ಕೆಲವು ಚರ್ಚಗಳಲ್ಲಿ ಇದೂ ಒಂದಾಗಿದೆ. ಡಚ್ ದಾಳಿಕೋರರ ಆಕ್ರಮಣದಲ್ಲಿ ಹಲವಾರು ಕ್ಯಾಥೋಲಿಕ್ ಚರ್ಚ್ ಗಳನ್ನು ನೆಲಸಮ ಮಾಡಲಾಗಿತ್ತು. ಇಲ್ಲಿರುವ ಕಲಾಕೃತಿಗಳಲ್ಲಿ ಯೇಸು ಕ್ರಿಸ್ತನ ಜೀವನ ಮತ್ತು ಕೊನೆಯ ದಿನಗಳನ್ನು ವ್ಯಕ್ತಪಡಿಸುವ ಚಿತ್ರಗಳು ಸುಂದರವಾಗಿವೆ. ಭಿತ್ತಿ ಚಿತ್ರಗಳು, ಕ್ಯಾನ್ವಾಸು ಚಿತ್ರಣಗಳು ಇಲ್ಲಿನ ಪ್ರಮುಖ ಆಕರ್ಷಣೆಯಾಗಿದೆ.