ಕಿಹಿಮ್ – ನಾಗೋನ್ ಎಂಬ ಎರಡು ಅವಳಿ ಕಡಲ ತೀರಗಳು ಅಲಿಬಾಗ್ ನಿಂದ 10 ಕೀ. ಮಿ ಅಂತರದಲ್ಲಿವೆ. ಕಿಹಿಮ್ ಬೀಚ್ ಅಡಿಕೆ ಹಾಗೂ ತೆಂಗಿನ ಮರಗಳಿಂದ ಸುತ್ತುವರೆದಿದೆ. ಅಲ್ಲದೆ ಇಲ್ಲಿರುವ ಅಪರೂಪದ ನಾನಾ ವಿಧದ ಪಕ್ಷಿಗಳು ಹಾಗೂ ಪಾತರಗಿತ್ತಿ / ಚಿಟ್ಟೆಗಳು ಇಲ್ಲಿನ ಸೌಂದರ್ಯವನ್ನು ಇಮ್ಮಡಿಗೊಳಿಸಿವೆ.

ಈ ಪ್ರದೇಶಗಳಲ್ಲಿ ಬೇರೆ ಬೇರೆ ಜಾತಿಯ ಮರಗಳನ್ನು ಗುರುತಿಸಬಹುದು. ಈ ಬೀಚ್ ಗಳು ಅತ್ಯದ್ಭುತವಾಗಿದ್ದು ಇಲ್ಲಿಗೆ ಭೇಟಿ ನೀಡುವ ಪ್ರವಾಸಿಗರನ್ನು ಜೊತೆಗೆ ಸ್ಥಳೀಯರನ್ನು ಬೇರೆಯದೆ ಲೋಕಕ್ಕೆ ಕೊಂಡೊಯ್ಯುತ್ತವೆ!

ನಗೋನ್ ಬೀಚ್ ಅಲಿಬಾಗ್ ಪಟ್ಟಣದಿಂದ 7 ಕೀ. ಮಿ ದೂರದಲ್ಲಿದೆ. ಇದು ಕಿಹಿಮ್ ಬೀಚ್ ನಂತೆಯೆ ಸಾಲುಗಟ್ಟಿದ ತೆಂಗು ಕಂಗು ಮರಗಳಿಂದ ಕಂಗೊಳಿಸುತ್ತದೆ. ಇನ್ನೊಂದು ಆಕರ್ಷಕ ಸಂಗತಿಯೆಂದರೆ ಅತ್ಯಂತ ಹೆಸರುವಾಸಿಯಾದ, ಎಲ್ಲರಿಗೂ ಚಿರಪರಿಚಿತವಾದ ’ಸಾಗರ್’ ಚಿತ್ರದ ’ಸಾಗರ್ ಕಿನಾರೆ ದಿಲ್ ಯೇ ಪುಕಾರೆ’ ಹಾಡು ಈ ಪರಿಶುದ್ಧವಾದ ವಾತಾವರಣವನ್ನು ಹೊಂದಿರುವ ಈ ಕಡಲ ತೀರದಲ್ಲೆ ಚಿತ್ರೀಕರಣವಾಗಿತ್ತು!