ಕೇರಳದ ಕೊಟ್ಟಾಯಂ ಮತ್ತು ಇಡುಕ್ಕಿ ಗಡಿಯಲ್ಲಿರುವ ವಗಮೋನ್ , ಒಂದು ಗುಡ್ಡ ಪ್ರದೇಶ. ನವದಂಪತಿಗಳಿಗೆ ಕಾಲಕಳೆಯಲು ಸುಂದರವಾದ ತಾಣವಿದು. ವಿಶಾಲವಾಗಿ ಹರಡಿರುವ ಹಸಿರು, ನೀಲಿ ನೀಲಿ ಪರ್ವತಗಳು, ಸುಂದರ ನದಿಗಳು, ನೀರಝರಿಗಳು, ಆಹ್ಲಾದಕರವಾದ ವಾತಾವರಣ ಮತ್ತು ದಟ್ಟವಾದ ಅರಣ್ಯವಿರುವದರಿಂದ ವಗಮೋನ್‌ ಎಂಥವರ ಮನಸ್ಸನ್ನೂ ಸೆಳೆಯುತ್ತದೆ. ರಜಾಕಾಲದ ದಿನಗಳನ್ನು ಕಳೆಯಲು ಸೂಕ್ತವಾದ ತಾಣವಿದು. ಥಂಗಾಲ್‌ ಬೆಟ್ಟ, ಮುರುಗನ್‌ ಬೆಟ್ಟ ಮತ್ತು ಕುರಿಸುಮಾಲವು ನಿಸರ್ಗ ಸೌಂದರ್ಯವನ್ನು ಹೆಚ್ಚಿಸಿವೆ.

ಸೌಂದರ್ಯದ ಖನಿಯಲ್ಲಿ...

ಸೌಂದರ್ಯದ ಖನಿಯ ಹೊರತಾಗಿ ವಗಮೋನ್‌ನಲ್ಲಿ ಜನರ ನೋಡಬೇಕಾದ ಹಲವು ಸಂಗತಿಗಳಿವೆ. ಬಂಡೆ ಹತ್ತುವುದು, ಚಾರಣ, ಗುಡ್ಡ ಹತ್ತುವುದು ಮತ್ತು ಪ್ಯಾರಾಗ್ಲೈಡಿಂಗ್‌ನಂಥ ಚಟುವಟಿಕೆಗಳನ್ನು ಪ್ರವಾಸಿಗರು ನಡೆಸಬಹುದು. ಇನ್ನು ನೀವು ಸಾಹಸಿಗಳಲ್ಲದಿದ್ದರೆ ಸುತ್ತಲಿನ ಸುಂದವಾದ ಹಸಿರು ಪರಿಸರವನ್ನು ವೀಕ್ಷಿಸುತ್ತಾ ಕುಳಿತುಕೊಳ್ಳಬಹುದು. ಸಮುದ್ರ ಮಟ್ಟದಿಂದ ಸುಮಾರು 1,100 ಮೀಟರು ಎತ್ತರಕ್ಕೆ ಈ ಪ್ರದೇಶವಿದೆ. ಏಷ್ಯಾದ ಸ್ಕಾಟ್‌ಲ್ಯಾಂಡ್‌ ಎಂದು ವಗಮೋನ್‌ಅನ್ನು ಕರೆಯಲಾಗಿದೆ. ಭೇಟಿ ಮಾಡಲೇಬೇಕಾದ ಭಾರತದ 50 ಪ್ರದೇಶಗಳಲ್ಲಿ ಇದೂ ಒಂದೆಂಬ ಹೆಗ್ಗಳಿಕೆಯನ್ನು ನ್ಯಾಷನಲ್ ಜಿಯೋಗ್ರಾಫಿಕ್ ಪ್ರಕಾರ ಪಡೆದಿದೆ.

ವಗಮೋನ್‌ ಪ್ರದೇಶವನ್ನು ಕಂಡುಹಿಡಿದಿದ್ದು ಬ್ರಿಟಿಷರು. ಇವರು ತಮ್ಮ ಟೀ ಪ್ಲಾಂಟೇಷನ್ನಿಗೆ ಈ ತಾಣ ಸೂಕ್ತ ಎಂದು ಭಾವಿಸಿದ್ದರು. ನಂತರದಲ್ಲಿ ಕುರಿಸುಮಾಲಾದಲ್ಲಿ ಕ್ರಿಶ್ಚಿಯನ್‌ ಮಿಶಿನರಿಗಳನ್ನು ಸ್ಥಾಪಿಸಿದರು.

ವಗಮೋನ್‌ಗೆ ಹೋಗುವುದು...

ಕೊಟ್ಟಾಯಮ್‌ನಿಂದ ವಗಮೋನ್‌ಗೆ ಸುಮಾರು 65 ಕಿ.ಮೀ ದೂರ. ಸಮೀಪದ ವಿಮಾನ ನಿಲ್ದಾಣವೆಂದರೆ ಕೊಚಿನ್‌ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ ಮತ್ತು ಸಮೀಪದ ರೈಲ್ವೆ ಸ್ಟೇಷನ್‌ ಕೊಟ್ಟಾಯಮ್‌ನಲ್ಲಿದೆ.

ಪ್ರವಾಸಿ ತಾಣಗಳು...

ಸುತ್ತಮುತ್ತಲಿನ ಪ್ರದೇಶದಲ್ಲಿ ಹಲವು ರೆಸಾರ್ಟ್‌‌ಗಳು ಲಭ್ಯವಿದೆ. ತೆಕ್ಕಡಿ, ಪೀರ್‌ಮೇಡ್‌ ಮತ್ತು ಕುಲಮಾವುಗಳಿಗೆ ವಗಮೋನ್‌ನಿಂದ ಪ್ರವಾಸ ಕೈಗೊಳ್ಳಬಹುದು. ವರ್ಷಪೂರ್ತಿ ಇಲ್ಲಿನ ವಾತಾವರಣವು ಪ್ರವಾಸಿಗಳಿಗೆ ಸೂಕ್ತವಾಗಿರುತ್ತದೆ.