ಥಾರ್ ಮರಭೂಮಿಯ ತುತ್ತ ತುದಿಯಲ್ಲಿರುವ ಒಂದು ಪುಟ್ಟ ಹಳ್ಳಿ ಖಿಮ್ಸರ್. ಇದು ಪ್ರಸಿದ್ಧ ನಗರಗಳಾದ ಬಿಕನೇರ್ ಮತ್ತು ಜೋದಪುರದ ಮಧ್ಯಭಾಗದಲ್ಲಿದೆ. ಈ ತಾಣದ ಒಂದು ಪ್ರಮುಖ ಆಕರ್ಷಣೆಯೆಂದರೆ 16ನೇ ಶತಮಾನಕ್ಕೆ ಸಂಬಂಧಿಸಿದ ನಗೌರ್ ಕೋಟೆ. ಪುರಾತನ ಇತಿಹಾಸ ಹೊಂದಿರುವ ಈ ಕೋಟೆ ಪ್ರವಾಸಿಗರಿಗೆ ಹೊಸತನದ ಅನುಭವ ನೀಡುತ್ತದೆ.
ಬರೀ ಮರಳು ರಾಶಿಯಿಂದಲೇ ಆವೃತ್ತವಾಗಿರುವ ಈ ಥಾರ್ ಮರಭೂಮಿ ಸುಮಾರು 20,8110 ಕಿ.ಮೀ. ವ್ಯಾಪ್ತಿಯಲ್ಲಿ ಹರಡಿಕೊಂಡಿದೆ. ಮರಳಿನಿಂದಲೇ ಆಕರ್ಷಿಸುವ ಈ ತಾಣಕ್ಕೆ ಪ್ರವಾಸಿಗರ ಹರಿವು ಹೆಚ್ಚು. ವರ್ಷ ಪೂರ್ತಿ ಯಾತ್ರಿಕರು ಇಲ್ಲಿಗೆ ಭೇಟಿ ನೀಡುತ್ತಲೇ ಇರುತ್ತಾರೆ. ಇಲ್ಲಿರುವ ವಿಶೇಷ ಸಾಹಸ ಕ್ರೀಡೆಗಳು ಹಾಗೂ ವನ್ಯ ಜೀವಿಗಳ ಸಫಾರಿಯೇ ಈ ತಾಣದ ವಿಶೇಷ ಆಕರ್ಷಣೆ.
ಹಳ್ಳಿಯಲ್ಲಿ ಇರುವ ವಿಭಿನ್ನ ವಾತಾವರಣ ಹಾಗೂ ಮಣ್ಣಿನಲ್ಲೇ ನಿರ್ಮಿಸಲಾದ ಅದ್ಭುತ ಗುಡಿಸಲುಗಳು ಹೊಸ ವಿಚಾರಗಳನ್ನು ಪ್ರವಾಸಿಗರಿಗೆ ಬೋಧಿಸುತ್ತವೆ. ಪ್ರಶಾಂತವಾದ ಪರಿಸರ ಮನಸ್ಸಿಗೆ ಉಲ್ಲಾಸಕರ ಅನುಭವ ನೀಡುತ್ತದೆ. ಈ ಅಪರೂಪದ ತಾಣ ಸದಾ ಕಾಲ ಅತಿಯಾದ ಬಿಸಿಲು, ಒಣಹವೆ ಹಾಗೂ ಉರಿಯ ವಾತಾವರಣದಿಂದ ಕೂಡಿರುತ್ತದೆ. ಯಾತ್ರಿಕರಿಗೆ ಈ ಬಿಸಿಯು ವಿಶೇಷ ಅನುಭವ ನೀಡಬಲ್ಲದು. ಇಲ್ಲಿಗೆ ಬರಲು ಸೂಕ್ತ ಸಮಯವೆಂದರೆ ಅಕ್ಟೋಬರ್ನಿಂದ ಏಪ್ರಿಲ್.
ನಗೌರ್ ಕೋಟೆ
ಇಲ್ಲಿಯ ಪ್ರಮುಖ ಆಕರ್ಷಣೆಯಾದ ನಗೌರ್ ಕೋಟೆ 10ನೇ ಶತಮಾನದಲ್ಲಿ ನಿರ್ಮಿಸಲಾಯಿತು ಎನ್ನಲಾಗುತ್ತದೆ. ನಾಗವಂಶಿಗಳಿಂದ ನಿರ್ಮಿಸಲಾದ ಈ ಕೋಟೆಯಲ್ಲಿ ಸುಂದರವಾದ ಉದ್ಯಾನವನ, ಅರಮನೆ ಹಾಗೂ ದೇವಸ್ಥಾನ ಇರುವುದನ್ನು ನೋಡಬಹುದು.
PC : Rituraj.bharti
ನಗೌರ್ ಕೋಟೆ
ಇದರ ಅಪರೂಪದ ವಾಸ್ತುಶಿಲ್ಪ ಹಾಗೂ ಕೆತ್ತನೆಯು ಹೆಚ್ಚು ಆಕರ್ಷಕವಾಗಿವೆ. ಈ ಕೋಟೆ ಯುನೆಸ್ಕೂ ಮೆಚ್ಚುಗೆಯನ್ನು ಪಡೆದುಕೊಂಡಿರುವುದು ವಿಶೇಷ.
PC: G41rn8
ಖಿಮ್ಸರ್ ಕೋಟೆ
ಈ ತಾಣದ ಇನ್ನೊಂದು ಪ್ರಮುಖ ಆಕರ್ಷಣೆ ಖಿಮ್ಸರ್ ಕೋಟೆ. ಶತ್ರುಗಳಿಂದ ರಕ್ಷಣೆ ಪಡೆಯುವ ಉದ್ದೇಶಕ್ಕೆ ಈ ಕೋಟೆಯನ್ನು ನಿರ್ಮಿಸಲಾಯಿತು. 16ನೇ ಶತಮಾನದ ಇತಿಹಾಸವನ್ನು ಹೊಂದಿದ್ದು, ಗತಕಾಲದಲ್ಲಿ ಅನೇಕ ಯುದ್ಧಗಳು ಇಲ್ಲಿ ನಡೆದಿತ್ತು ಎನ್ನುವ ವಿಚಾರವನ್ನು ತೆರೆದಿಡುತ್ತದೆ.
PC : Khimsarfort
ಖಿಮ್ಸರ್ ಕೋಟೆ
ಕೋಟೆಯ ಗೋಡೆಯ ಮೇಲೆ ಯುದ್ಧದ ಕುರುಹುಗಳಿರುವುದನ್ನು ಕಾಣಬಹುದು. ಇದರ ಆಕರ್ಷಕ ಕೆತ್ತನೆ ಹಾಗೂ ವಾಸ್ತುಶಿಲ್ಪವು ಹೆಚ್ಚಿನ ಸಂಖ್ಯೆಯಲ್ಲಿ ಪ್ರವಾಸಿಗರನ್ನು ಆಕರ್ಷಿಸುತ್ತವೆ.
PC : Ankur 2436
ಖಿಮ್ಸರ್ ಕೋಟೆ
1940ರಲ್ಲಿ ಮಹಿಳೆಯರಿಗೆಂದು ಜನಾನಾ ಎಂಬ ಭಾಗವನ್ನು ಕೋಟೆಗೆ ಸೇರಿಸಿದ್ದರಿಂದ ಇದೊಂದು ನಿವಾಸಯೋಗ್ಯ ಅರಮನೆಯಾಗಿ ಬದಲಾಯಿತು. ಈಗ ಕೋಟೆಯ ಒಂದು ಭಾಗ ಪಾರಂಪರಿಕ ಹೋಟೆಲ್ ಆಗಿ ಪರಿವರ್ತನೆಗೊಂಡಿದೆ. ಉಳಿದ ಭಾಗದಲ್ಲಿ ಖಿಮ್ಸರ್ ರಾಜವಂಶದ ಕುಟುಂಬದವರು ವಾಸಿಸುತ್ತಿದ್ದಾರೆ. ಇವರು ಈ ವಂಶದ 20ನೇ ಪೀಳಿಗೆಯವರು ಎನ್ನಲಾಗುತ್ತದೆ.
PC : Ankur2436
ಹಳ್ಳಿಯ ಆಕರ್ಷಣೆ
ಈ ಹಳ್ಳಿಯಲ್ಲಿ ಇರುವ ಬಂಗಾರದ ಹೊಳಪಿನ ಮರಳಿನ ದಿಬ್ಬದ ಮೇಲೆ ಒಂಟೆ ಸವಾರಿ ಹಾಗೂ ಸಾಹಸ ಪ್ರಿಯರು ಜೀಪ್ ಸವಾರಿಗಳನ್ನು ಮಾಡಬಹುದು. ಇದು ಒಂದು ಹೊಸತನದ ಅನುಭವ ನೀಡುವುದು. ಮರಳುಗಾಡಿನ ಸಫಾರಿ ಮತ್ತು ಒಂಟೆ ಸವಾರಿಗಳಿಂದ ಭವ್ಯವಾದ ಥಾರ್ ಮರಭೂಮಿಯ ವಿಶೇಷತೆಯನ್ನು ಆಸ್ವಾದಿಸಬಹುದು. ಈ ಮರಭೂಮಿಯಲ್ಲಿ ಸುಂದರವಾದ ನೀಲಿ ಸರೋವರ ಇರುವುದನ್ನು ನೋಡಬಹುದು.
PC : William J Sisti
ಹಳ್ಳಿಯ ಆಕರ್ಷಣೆ
ಅಲ್ಲದೆ ಅಪರೂಪದ ತಾಳೇ ಮರಗಳು ಇಲ್ಲಿವೆ. ಹಿಂದೂ ದೇಗುಲ ಹಾಗೂ ಜೈನ್ ದೇವಾಲಯಗಳು ನೆಲೆನಿಂತಿರುವುದು ಒಂದು ವಿಶೇಷ. ಇಲ್ಲಿಯ ಹೊಸ ಬಗೆಯ ವಾತಾವರಣ ಹಾಗೂ ಸಂಸ್ಕೃತಿಗಳು ಮರೆಯಲಾಗದ ಅದ್ಭುತ ಅನುಭವವನ್ನು ನೀಡುತ್ತವೆ.
PC : William J Sisti
ಪಾರಂಪರಿಕ ಹೋಟೆಲ್
ಪ್ರಕೃತಿ ಪ್ರಿಯರಿಗೆ ಇದೊಂದು ಸ್ವರ್ಗ ತಾಣ. ಇಲ್ಲಿ ಕಡಿಮೆ ಎಂದರೂ ಸುಮಾರು 47 ವಿವಿಧ ಬಗೆಯ ಪಕ್ಷಿ ಸಂಕುಲಗಳಿರುವುದನ್ನು ವೀಕ್ಷಿಸಬಹುದು. ಈ ಹೋಟೆಲ್ನಲ್ಲಿ ಪ್ರವಾಸಿಗರನ್ನು ಬಹಳ ಆದರ-ಆತಿಥ್ಯದಿಂದ ಉಪಚರಿಸುತ್ತಾರೆ.
PC : Uzi Yachin
ಪಾರಂಪರಿಕ ಹೋಟೆಲ್
ರಾಜ ವಂಶದ ರೀತಿಯಲ್ಲಿ ಯಾತ್ರಿಕರಿಗೆ ಉಪಚರಿಸುವುದರಿಂದ ಆರಾಮದಾಯಕ ಅನುಭವ ಪಡೆಯಬಹುದು. ಇಲ್ಲಿಯ ಇನ್ನೊಂದು ಕುತೂಹಲ ಹಾಗೂ ತಿಳಿದುಕೊಳ್ಳಲೇ ಬೇಕಾದ ಸಂಗತಿ ಎಂದರೆ ಹೋಟೆಲ್ನಲ್ಲಿ ಉಪಚರಿಸುವ ಸಿಬ್ಬಂದಿಗಳು ರಾಜ ಮನೆತನದವರು ಎನ್ನುವುದು.
PC : Uzi Yachin