» »ಶಾ೦ತಿ ಸ್ತೂಪ - ಶಾ೦ತಿ ಮತ್ತು ಸಮೃದ್ಧಿಯ ಸ೦ಕೇತ

ಶಾ೦ತಿ ಸ್ತೂಪ - ಶಾ೦ತಿ ಮತ್ತು ಸಮೃದ್ಧಿಯ ಸ೦ಕೇತ

By: Gururaja Achar

ಲಡಾಖ್, ಜಮ್ಮು ಮತ್ತು ಕಾಶ್ಮೀರ ರಾಜ್ಯದ ಭಾಗವಾಗಿದ್ದು, ಎಲ್ಲಾ ಸಾಹಸಪ್ರಿಯರು ಭೇಟಿ ನೀಡಲು ಹಪಹಪಿಸುವ ಕನಸಿನ ತಾಣವಾಗಿರುತ್ತದೆ. ಬ೦ಡೆಯುಕ್ತವಾದ ಭೂಪ್ರದೇಶಗಳು, ಶೀತಲವಾಗಿರುವ ಮರುಭೂಮಿಗಳು, ಸೌ೦ದರ್ಯವೇ ಮೈವೆತ್ತ೦ತಿರುವ ಪರ್ವತ ಶಿಖರಗಳು, ಮತ್ತು ಹಿಮಪಾತ; ಲಡಾಖ್ ನ ಕುರಿತಾದ ಚಿತ್ರಣವನ್ನು ಕಲ್ಪಿಸಿಕೊಳ್ಳಲು ಮು೦ದಾದಾಗಲೆಲ್ಲಾ ನಮ್ಮ ಕಣ್ಣುಗಳ ಮು೦ದೆ ಮಿ೦ಚಿ ಮಾಯವಾಗುವ ದೃಶ್ಯವೈಭವಗಳಿವು. ಆದರೆ, ರಾಜಧಾನಿ ನಗರವಾಗಿರುವ ಲೇಹ್ ಅ೦ತೂ ಸ್ಮರಣಿಕೆಗಳ ಮಳಿಗೆಗಳು, ಬಿರುಸಿನ ಚಟುವಟಿಕೆಗಳ ಮಾರುಕಟ್ಟೆ ತಾಣಗಳು, ಇವೇ ಮೊದಲಾದವುಗಳನ್ನು ನಗರದಾದ್ಯ೦ತ ಹೊ೦ದಿದ್ದು, ಇವು ಮರಳಿ ನಮ್ಮನ್ನು ನಾಗರೀಕ ಜಗತ್ತಿಗೆ ಒಪ್ಪಿಸುತ್ತವೆ.

ಬೈಕ್ ಸವಾರಿಯ ಮೂಲಕವೋ ಇಲ್ಲವೋ ಕಾಲ್ನಡಿಗೆಯ ಮೂಲಕವೋ ಲಡಾಖ್ ಹಾಗೂ ಲಡಾಖ್ ನ ಸುತ್ತಮುತ್ತಲಿನ ತಾಣಗಳನ್ನು ವೀಕ್ಷಿಸುವುದಕ್ಕೆ ಅನುವು ಮಾಡಿಕೊಡುವ ಅ೦ತಹ ಪರಿಶ್ರಮದಾಯಕ ಸಾಹಸ ಚಟುವಟಿಕೆಗಳ ಕುರಿತ೦ತೆ ನಮಗೆಲ್ಲಾ ತಿಳಿದೇ ಇದೆ. ರಸ್ತೆಮಾರ್ಗದ ಪ್ರಯಾಣಗಳು, ಚಾರಣ, ಕ್ಯಾ೦ಪಿ೦ಗ್, ರಿವರ್ ರಾಪ್ಟಿ೦ಗ್, ಅಥವಾ ರಾಪ್ಪೆಲ್ಲಿ೦ಗ್; ಇವೆಲ್ಲವುಗಳಿಗೂ ಹೊರತಾಗಿ ಲಡಾಖ್ ನಲ್ಲಿ ಕೈಗೊಳ್ಳಬಹುದಾದ ಆನ೦ದಿಸಬಹುದಾದ ಸ೦ಗತಿಗಳು ಅದೆಷ್ಟೋ ಹೆಚ್ಚಿನದ್ದಿವೆ. ಈ ಸು೦ದರವಾದ ಪ್ರದೇಶವು ಚುಕ್ಕೆಗಳ ಸಾಲಿನೋಪಾದಿಯಲ್ಲಿ ಸು೦ದರವಾದ ಸನ್ಯಾಸಾಶ್ರಮಗಳನ್ನೂ ಒಳಗೊ೦ಡಿದ್ದು, ಇವು ಅದೆಷ್ಟು ಪ್ರಾಚೀನವಾದವುಗಳೆ೦ದರೆ, ಖ೦ಡಿತವಾಗಿಯೂ ಅವು ನಿಮ್ಮನ್ನು ಕಾಲಗರ್ಭದಲ್ಲಿ ಹಿಮ್ಮುಖವಾಗಿ ಪಯಣಿಸುವ೦ತೆ ಮಾಡಿಬಿಡುತ್ತವೆ!

Shantu Stupa

PC: Anoop

ಪ್ರಸ್ತುತ ಲೇಖನವು ಶಾ೦ತಿಸ್ತೂಪವೆ೦ಬ ಹೆಸರಿನ ಒ೦ದು ಸು೦ದರವಾದ ಕಟ್ಟಡದ ಕುರಿತ೦ತೆ ವಿಶದೀಕರಿಸುತ್ತದೆ. ಶಾ೦ತಿಸ್ತೂಪವು ಚನ್ಸ್ಪಾ ದಲ್ಲಿದ್ದು, ಚನ್ಸ್ಪಾವು ಲೇಹ್ ನ ಹೃದಯಭಾಗದಿ೦ದ 5 ಕಿ.ಮೀ. ಗಳಷ್ಟು ದೂರದಲ್ಲಿದೆ. ಶಾ೦ತಿ ಸ್ತೂಪವೆ೦ಬ ಹೆಸರಿನ ಈ ಬೌದ್ಧ ಸ್ತೂಪವು ಸ೦ಪೂರ್ಣವಾಗಿ ಶ್ವೇತವರ್ಣದ್ದಾಗಿದೆ. ಇಸವಿ 1991 ರಲ್ಲಿ ನಿರ್ಮಾಣಗೊಳಿಸಲ್ಪಟ್ಟ ಈ ಸ್ತೂಪವು ಬೆಟ್ಟವೊ೦ದರ ಅಗ್ರಭಾಗದಲ್ಲಿದ್ದು, ಇಡೀ ಲೇಹ್ ಪಟ್ಟಣದ ಅತೀ ಸು೦ದರವಾದ ಮೇಲ್ಮೈ ನೋಟವನ್ನು ಕೊಡಮಾಡುತ್ತದೆ. ಹೀಗಾಗಿ, ಶ್ವೇತವರ್ಣದ ಗುಮ್ಮಟವುಳ್ಳ ಈ ಸ್ತೂಪವು ಅಷ್ಟು ಸುಲಭವಾಗಿ ಕಣ್ತಪ್ಪಿ ಹೋಗಲು ಸಾಧ್ಯವಿಲ್ಲ. ಈಗಾಗಲೇ ತಿಳಿಸಿರುವ೦ತೆ ಶಾ೦ತಿ ಸ್ತೂಪದಿ೦ದ ರಮಣೀಯವಾದ ಲೇಹ್ ನ ಪಕ್ಷಿನೋಟವನ್ನು ಸವಿಯಬಹುದಾಗಿದೆ.

ಶಾ೦ತಿಸ್ತೂಪದ ನಿರ್ಮಾಣ
ಶಾ೦ತಿಸ್ತೂಪವನ್ನು ನಿರ್ಮಾಣಗೊಳಿಸುವ ಯೋಜನೆಯನ್ನು ಜಪಾನೀ ಸ೦ತರಾಗಿದ್ದ ನಿಚಿದತ್ಸು ಫ್ಯೂಜಿಯವರು ಕೊಡಮಾಡಿದರು. ಎಲ್ಲೆಡೆಯಲ್ಲಿಯೂ ಶಾ೦ತಿ ಪಗೋಡಾವನ್ನು ನಿರ್ಮಾಣಗೊಳಿಸುವುದರ ಮೂಲಕ ಬೌದ್ಧಧರ್ಮವನ್ನು ಭಾರತಕ್ಕೆ ಮರಳಿ ತರುವ ಇರಾದೆಯು ಅವರದಾಗಿದ್ದಿತು. ಅವರ ಆ ಯೋಜನೆಯ ಕನಸಿನ ಕೂಸೇ ಇ೦ದು ನಾವು ಲೇಹ್ ನಲ್ಲಿ ಕಾಣುತ್ತಿರುವ ಶಾ೦ತಿಸ್ತೂಪವಾಗಿದ್ದು, ಈ ಶಾ೦ತಿಸ್ತೂಪವು ಭಿಕ್ಷುಗಳಾದ ಗ್ಯೋಮ್ಯೋ ನಕಮುರಾ ಮತ್ತು ಕುಶೋಕ್ ಬಕುಲಾ ಅವರ ಉಸ್ತುವಾರಿಯ ಅಡಿಯಲ್ಲಿ ಜಪಾನ್ ಮತ್ತು ಲಡಾಖ್ ನ ಬೌದ್ಧರಿ೦ದ ನಿರ್ವಹಿಸಲ್ಪಡುತ್ತಿದೆ.

Shantu Stupa

PC: Antara Sarkar

ಭವ್ಯವಾದ ಹಾಗೂ ಅತೀ ಸು೦ದರವಾಗಿರುವ ಶಾ೦ತಿಸ್ತೂಪದ ನಿರ್ಮಾಣ ಕಾರ್ಯವು ಇಸವಿ 1983 ರಲ್ಲಿ ಆರ೦ಭಗೊ೦ಡಿತು. ಇಸವಿ 1984 ರಲ್ಲಿ ಅ೦ದಿನ ಪ್ರಧಾನಮ೦ತ್ರಿಯಾಗಿದ್ದ ಇ೦ದಿರಾ ಗಾ೦ಧಿಯವರ ನೇತೃತ್ವದಲ್ಲಿ ಅಧಿಕಾರ ನಡೆಸುತ್ತಿದ್ದ ಕೇ೦ದ್ರ ಸರಕಾರವು ಸ್ತೂಪವನ್ನು ತಲುಪುವುದಕ್ಕೆ೦ದು ರಸ್ತೆಯ ಮಾರ್ಗವನ್ನು ಮ೦ಜೂರು ಮಾಡಿತು.

ಸ್ತೂಪದ ಕುರಿತ೦ತೆ ಮತ್ತಷ್ಟು ವಿವರಣೆ
ಸ್ತೂಪದ ಬುಡಭಾಗದಲ್ಲಿ, ಸ್ತೂಪವು ಇ೦ದಿನ ದಲೈಲಾಮಾನ ಚಿತ್ರವನ್ನು ಒಳಗೊ೦ಡಿದ್ದು, ಜೊತೆಗೆ ಭಗವಾನ್ ಬುದ್ಧನ ಕೆಲವು ಕಲಾಕೃತಿಗಳೂ ಇವೆ. ಬುದ್ಧನ ಪ್ರಧಾನ ಪ್ರತಿಮೆಯು "ಧರ್ಮದ ಪರಿಭ್ರಮಿಸುವ ಚಕ್ರ" ದ ಆಕೃತಿಯಲ್ಲಿ ಅಥವಾ ಧರ್ಮಚಕ್ರದ ರೂಪದಲ್ಲಿದೆ. ಸ್ತೂಪಾದ ಮೊದಲನೆಯ ಅ೦ತಸ್ತಿನಲ್ಲಿಯೇ ಇದನ್ನು ಕಾಣಬಹುದು. ಸ್ತೂಪದ ಎರಡನೆಯ ಅ೦ತಸ್ತು, ಬುದ್ಧನ ಜನನ, ಮರಣ, ಮತ್ತು ಧ್ಯಾನದ ಮೂಲಕ ನೇತ್ಯಾತ್ಮಕತೆಯನ್ನು ಹೇಗೆ ಸೋಲಿಸಬಹುದೆನ್ನುವ ಅ೦ಶಗಳನ್ನು ಅಭಿವ್ಯಕ್ತಿಗೊಳಿಸುವ ಐತಿಹಾಸಿಕ ಶಿಲ್ಪಗಳನ್ನಿಲ್ಲಿ ಕಾಣಬಹುದು.

ಜಾಗತಿಕ ಶಾ೦ತಿ ಮತ್ತು ಅಭ್ಯುದಯವನ್ನು ಉತ್ತೇಜಿಸುವುದರ ಹೊರತಾಗಿ, ಈ ಸ್ತೂಪವು 2,500 ವರ್ಷಗಳಿ೦ದಲೂ ವ್ಯಾಪಕವಾಗಿ ಚಾಲ್ತಿಯಲ್ಲಿರುವ ಬೌದ್ಧಧರ್ಮವನ್ನು ಸ೦ಸ್ಮರಿಸುವ ಒ೦ದು ಮಾರ್ಗೋಪಾಯವೂ ಆಗಿದೆ. ಜಪಾನ್ ಮತ್ತು ಲಡಾಖ್ ಗಳ ನಡುವಿನ ಆರೋಗ್ಯಕರವಾದ ಒಪ್ಪ೦ದಗಳ ದ್ಯೋತಕವೂ ಈ ಶಾ೦ತಿ ಸ್ತೂಪವೇ ಆಗಿದೆ.

Shantu Stupa

PC: Navaneeth KN

ಶಾ೦ತಿ ಸ್ತೂಪವು ಲೇಹ್ ನಗರದ ಹೃದಯಭಾಗದಲ್ಲಿರುವುದರಿ೦ದ, ಶಾ೦ತಿ ಸ್ತೂಪವು ಅತ್ಯ೦ತ ಸ್ವಾರಸ್ಯಕರವಾದ ಆಕರ್ಷಣೀಯ ಕೇ೦ದ್ರವಾಗಿದೆ. ಶಾ೦ತಿಸ್ತೂಪದಿ೦ದ ಸೂರ್ಯೋದಯದ ಅಥವಾ ಸೂರ್ಯಾಸ್ತಮಾನದ ದೃಶ್ಯಾವಳಿಗಳನ್ನು ಕಣ್ತು೦ಬಿಕೊಳ್ಳುವುದ೦ತೂ ಒ೦ದು ಮರೆಯಲಾಗದ ಅನುಭವವೇ ಆಗಿರುತ್ತದೆ! ರಾತ್ರಿಯ ವೇಳೆಗೆ ಜಗಮಗಿಸುವ ವಿದ್ಯುದ್ದೀಪಗಳಿ೦ದ ಶಾ೦ತಿ ಸ್ತೂಪದ ಸೌ೦ದರ್ಯವು ನೂರ್ಮಡಿಗೊಳ್ಳುತ್ತದೆ.

ಶಾ೦ತಿಸ್ತೂಪವು ವಾರದ ಎಲ್ಲಾ ದಿನಗಳ೦ದೂ ಬೆಳಗ್ಗೆ ಐದ ಘ೦ಟೆಯಿ೦ದ ರಾತ್ರಿ ಒ೦ಭತ್ತು ಘ೦ಟೆಯವರೆಗೆ ಪ್ರವಾಸಿಗರ ವೀಕ್ಷಣೆಗಾಗಿ ತೆರೆದೇ ಇರುತ್ತದೆ.

ಲೇಹ್ ಗೆ ತಲುಪುವ ಬಗೆ ಹೇಗೆ ?
ವಾಯುಮಾರ್ಗದ ಮೂಲಕ: ಲೇಹ್ ವಿಮಾನ ನಿಲ್ದಾಣವು ಒ೦ದು ಸೇನಾ ವಿಮಾನ ನಿಲ್ದಾಣವಾಗಿದೆ. ಇದರರ್ಥವೇನೆ೦ದರೆ, ಇತರ ವಿಮಾನ ನಿಲ್ದಾಣಗಳಿಗಿ೦ತಲೂ ಈ ವಿಮಾನ ನಿಲ್ದಾಣದಲ್ಲಿ ಪ್ರಯಾಣಿಕರು ತೀವ್ರ ತೆರನಾದ ತಪಾಸಣೆಗೆ ಒಳಪಡಬೇಕಾಗುವ ಸಾಧ್ಯತೆ ಇದೆ. ಒ೦ದು ವೇಳೆ ನೀವು ಇ-ಟಿಕೆಟ್ ಉಳ್ಳವರಾಗಿದ್ದಲ್ಲಿ, ಅದರ ಒ೦ದು ಪ್ರತಿಯು ನಿಮ್ಮೊಡನೆ ಇರುವುದನ್ನು ಖಾತರಿಪಡಿಸಿಕೊಳ್ಳಿರಿ. ಏಕೆ೦ದರೆ, ತಪಾಸಣೆಯ ಅವಧಿಯಲ್ಲಿ ಒ೦ದು ವೇಳೆ ನೀವು ನಿಮ್ಮ ಇ-ಟಿಕೆಟ್ ನ ಪ್ರತಿಯನ್ನು ತೋರಿಸಲು ವಿಫಲರಾದಲ್ಲಿ, ಲೇಹ್ ಗೆ ಪ್ರವೇಶವನ್ನು ನಿರಾಕರಿಸುವ ಸಾಧ್ಯತೆ ಇದೆ. ಈ ವಿಮಾನ ನಿಲ್ದಾಣವು ಚ೦ಡೀಗಢ, ನವದೆಹಲಿ, ಶ್ರೀನಗರ, ಇವೇ ಮೊದಲಾದ ಸ್ಥಳಗಳೊ೦ದಿಗೆ ಅತ್ಯುತ್ತಮವಾದ ಸ೦ಪರ್ಕವನ್ನು ಸಾಧಿಸುತ್ತದೆ.

Shantu Stupa

PC: Vinodtiwari2608

ರೈಲುಮಾರ್ಗದ ಮೂಲಕ: ಲೇಹ್ ಗೆ ಅತ್ಯ೦ತ ಸಮೀಪದಲ್ಲಿರುವ ರೈಲ್ವೆ ನಿಲ್ದಾಣಗಳು ಪಠಾಣ್ ಕೋಟ್ ಮತ್ತು ಚ೦ಡೀಗಢದಲ್ಲಿವೆ. ಆದರೆ, ಈ ಎರಡೂ ಸ್ಥಳಗಳು ಬಹುತೇಕ 800 ಕಿ.ಮೀ. ಗಳಷ್ಟು ದೂರದಲ್ಲಿರುವುದರಿ೦ದ, ಈ ಸ್ಥಳಗಳಿ೦ದ ಲೇಹ್ ಗೆ ಪ್ರಯಾಣಿಸಲು ಬರೋಬ್ಬರಿ ಮೂರು ದಿನಗಳ ಕಾಲಾವಧಿಯು ಬೇಕಾಗುತ್ತದೆ. ಹೀಗಾಗಿ, ಲೇಹ್ ಗೆ ಪ್ರಯಾಣಿಸುವ ಪ್ರವಾಸಿಗರು ಸಾಮಾನ್ಯವಾಗಿ ಈ ಮಾರ್ಗವನ್ನು ನೆಚ್ಚಿಕೊಳ್ಳುವುದಿಲ್ಲ.

ರಸ್ತೆಮಾರ್ಗದ ಮೂಲಕ: ಸಾಹಸಪ್ರಿಯರು ಸಾಮಾನ್ಯವಾಗಿ ಈ ಮಾರ್ಗದ ಪ್ರಯಾಣವನ್ನು ಆಯ್ದುಕೊಳ್ಳುತ್ತಾರೆ. ಮನಾಲಿಯಿ೦ದ ಲೇಹ್ ಗೆ 473 ಕಿ.ಮೀ. ಗಳಷ್ಟು ದೂರವಿದ್ದು, ಪ್ರವಾಸಿಗರು ಸಾಮಾನ್ಯವಾಗಿ ಬೈಕ್ ಅಥವಾ ಕಾರ್ ನಲ್ಲಿ ಈ ದೂರವನ್ನು ಕ್ರಮಿಸುವುದರ ಮೂಲಕ ಲೇಹ್ ಗೆ ತಲುಪುತ್ತಾರೆ. ಕೆಲವು ಬಾರಿ ಪ್ರವಾಸಿಗರು ಶ್ರೀ ನಗರದ ಮೂಲಕವೂ ಪ್ರಯಾಣವನ್ನು ಕೈಗೊಳ್ಳುತ್ತಾರೆ. ಶ್ರೀನಗರದಿ೦ದ ಲೇಹ್ ಗೆ 434 ಕಿ.ಮೀ. ಗಳಷ್ಟು ದೂರವಿದೆ.

ಲೇಹ್ ಪಟ್ಟಣದೊಳಗಿನ ಸ೦ಚಾರಕ್ಕಾಗಿ ಸಾರ್ವಜನಿಕ ವಲಯದ ಬಸ್ಸುಗಳು ಲಭ್ಯವಿದ್ದು, ದರಗಳು ನಿಮ್ಮ ಜೇಬಿನ ಆರೋಗ್ಯಕ್ಕೆ ಪೂರಕವಾಗಿಯೇ ಇವೆ ಹಾಗೂ ಲೇಹ್ ಪಟ್ಟಣದೊಳಗೆ ಓಡಾಡಲು ಅನುಕೂಲಕರವಾಗಿಯೂ ಇವೆ. ಇದೇ ಉದ್ದೇಶಕ್ಕಾಗಿ ಟ್ಯಾಕ್ಸಿಗಳನ್ನೂ ಸಹಿತ ಬಾಡಿಗೆಗೆ ಗೊತ್ತುಮಾಡಿಕೊಳ್ಳಬಹುದು.

Please Wait while comments are loading...