ದಕ್ಷಿಣ ಒಡಿಶದ ಎರಡನೇ ದೊಡ್ಡ ಪಟ್ಟಣವಾದ ಜೆಪೋರ್, 'ಗೆಲುವಿನ ನಾಡು' ಎಂದು ಹೆಸರುವಾಸಿಯಾಗಿದೆ. ಇದು ಕೊರಪುಟ್ ಜಿಲ್ಲೆಯಲ್ಲಿನ ಒಂದು ನಗರವಾಗಿದೆ. ಈ ಸ್ಥಳವು ಪ್ರಾಕೃತಿಕ ಸೌಂದರ್ಯದ ಗಣಿಯಾಗಿದ್ದು, ಚಿತ್ರಮಯವಾದ ದಟ್ಟ ಹಸಿರು ಕಾಡುಗಳು, ಜುಳುಜುಳು ಧುಮ್ಮುಕ್ಕುವ ಜಲಪಾತ, ಹುಲ್ಲುಗಾವಲು ಹಾಗೂ ಹಚ್ಚ ಹಸಿರ ಕಂದರಗಳಿಂದ ಅನುಗ್ರಹೀತವಾಗಿದೆ.
ಇಲ್ಲಿನ ಜನಸಂಖ್ಯೆಯಲ್ಲಿ ಹೆಚ್ಚಿನ ಪಾಲು ಬುಡಕಟ್ಟು ಜನಾಂಗದವರಾಗಿದ್ದು, ಇದು ಅವರ ತಾಯಿನಾಡಾಗಿದೆ. ಈ ಸ್ಥಳವು ಪೂರ್ವ ಘಟ್ಟದ ಬೆಟ್ಟಗಳಿಂದ ಸುತ್ತುವರೆಯಲ್ಪಟ್ಟಿದ್ದು, ಮುಖ್ಯವಾಗಿ ಇದರ ಮೂರು ಬದಿಗಳು ಅರಕು ಪರ್ವತಗಳಿಂದ ಸುತ್ತುವರೆಯಲ್ಪಟ್ಟಿದೆ. ಇದು ಆಂಗ್ಲ ಭಾಷೆಯ 'U' ಆಕಾರದಲ್ಲಿದ್ದು, ಇಲ್ಲಿನ ಸೌಂದರ್ಯವನ್ನು ಇನ್ನಷ್ಟು ಹೆಚ್ಚಿಸುತ್ತದೆ.
ಜೆಪೋರ್ ನ ಸುತ್ತಲಿನ ಯಾತ್ರಾಸ್ಥಳಗಳು
ಜೆಪೋರ್ ನ ವೈಭವಯುತ ಜಲಪಾತಗಳಾದ ಶಕ್ತಿ, ಬಗರ ಮತ್ತು ದುದುಮ ಗಳು ಹೆಚ್ಚಿನ ಸಂಖ್ಯೆಯ ಯಾತ್ರಿಗಳನ್ನು ಆಕರ್ಷಿಸುತ್ತವೆ. ದೆಮಲಿಯ ಸೊಗಸಾದ ಪರ್ವತಗಳು, ಸುನಬೇದದಲ್ಲಿನ ಸೊಂಪಾದ ಕಣಿವೆ ಹಾಗೂ ಅಸಾಮಾನ್ಯ ವನ್ಯಜೀವಿಗಳು, ಕೊಲಬ್ ನ ಅನುಭಾವಿ ನದಿ ಹಾಗೂ ಕೊರಪುಟ್ ನ ಸುಂದರ ನಗರ, ಜೆಪೋರ್ ನ ಇತರ ಉತ್ಕೃಷ್ಟ ಪ್ರಾಕೃತಿಕ ಸ್ಥಳಗಳು.
ಮಲಿಗುರದ ಬ್ರಾಡ್ ಗೇಜ್ ಸುರಂಗಮಾರ್ಗ, ನಂದ್ಪುರ್ ನ ಬತ್ರಿಸ ಸಿಂಹಾಸನ, ಜೆಪೋರ್ ಪಾರ್ಕ್ ಮತ್ತು ಆಕರ್ಷಕವಾದ ಮಿನ್ನ ಝೊಲ ಪಟ್ಟಣ ಮುಂತಾದುವುಗಳು ಜೆಪೋರ್ ಪ್ರವಾಸೋದ್ಯಮಕ್ಕೆ ಇನ್ನಷ್ಟು ಮೆರಗನ್ನು ನೀಡುತ್ತವೆ. ಇದಲ್ಲದೆ, ಜೆಪೋರ್ ನಲ್ಲಿರುವ ಹಲವಾರು ಪುರಾತನ ಅರಮನೆಗಳು ಹಾಗೂ ಕೋಟೆಗಳು ಇಲ್ಲಿನ ಪ್ರವಾಸೋದ್ಯಮವನ್ನು ಇನ್ನಷ್ಟು ಅಭಿವೃದ್ಧಿಪಡಿಸುತ್ತದೆ.
ಜೆಪೋರ್ ಗೆ ತಲುಪುವ ಬಗೆ
ಜೆಪೋರ್ ಗೆ ಸಮೀಪದ ವಿಮಾನ ನಿಲ್ದಾಣ 237 ಕಿ.ಮೀ ದೂರದ ವಿಶಾಖಪಟ್ಟಣದಲ್ಲಿದೆ. ಯಾತ್ರಿಗಳು ಬಸ್ ಅಥವಾ ರೈಲಿನ ಮೂಲಕ ಜೆಪೋರ್ ತಲುಪಬಹುದಾಗಿದೆ. ಈ ಪಯಣದುದ್ದಕ್ಕೂ ಮನಸೂರೆಗೊಳ್ಳುವ ಅರಕು ಬೆಟ್ಟಗಳ ಸಮಗ್ರ ಚಿತ್ರಣವನ್ನು ಅನುಭವಿಸಬಹುದಾಗಿದೆ.
ಜೆಪೋರ್ ಸಂದರ್ಶಿಸಲು ಸೂಕ್ತ ಸಮಯ
ಚಳಿಗಾಲದಲ್ಲಿ ಜೆಪೋರ್ ಅನ್ನು ಸಂದರ್ಶಿಸುವುದು ಉತ್ತಮ.