ಪಂಜಾಬ್ ರಾಜ್ಯದಲ್ಲಿರುವ ಪುರಾತನ, ಶ್ರೀಮಂತ ಇತಿಹಾಸ ಹೊಂದಿರುವ ನಗರ ಜಲಂಧರ್. ಪುರಾಣಗಳ ಪ್ರಕಾರ ಜಲಂಧರ್ ಎನ್ನುವ ಹೆಸರು ದೈವದಿಂದ ಬಂದಿದ್ದು ಎನ್ನಲಾಗಿದೆ ಮತ್ತು ಮಹಾಭಾರತದಲ್ಲಿ ಕೂಡಾ ಇದರ ಉಲ್ಲೇಖನವಿದೆ. ಹಿಂದಿಯಲ್ಲಿ ಜಲಂಧರ್ ಎಂದರೆ ನೀರಿನಲ್ಲಿ ಮುಳುಗಿರುವ ನಗರವೆಂದು ಅರ್ಥ. ದಂತಕಥೆಯ ಪ್ರಕಾರ, ಈ ನಗರಕ್ಕೆ ಭೌಗೋಳಿಕವಾಗಿ ಬಿಯಾಸ್ ಮತ್ತು ಸಟ್ಲೇಜ್ ನದಿ ನಡುವೆ ಇರುವುದರಿಂದ ಈ ಹೆಸರು ಬಂದಿದೆ ಎನ್ನುವುದು ಇತಿಹಾಸ. ಸ್ವಾತಂತ್ರ್ಯ ಬಂದ ನಂತರ ಅಂದರೆ 1953 ರ ತನಕ ಜಲಂಧರ್ ನಗರವು ಪಂಜಾಬ್ ರಾಜ್ಯದ ರಾಜಧಾನಿಯಾಗಿತ್ತು, ನಂತರ ಚಂಡೀಗಢ ಪಂಜಾಬಿನ ರಾಜಧಾನಿಯಾಯಿತು. ಈ ನಗರವು ಹಲವು ಶ್ರೀಮಂತ ಪಾರಂಪರಿಕ ಸಂಸ್ಕೃತಿಯನ್ನು ಹೊಂದಿದ್ದು ಹಲವಾರು ಪ್ರವಾಸಿ ಸ್ಥಳಗಳನ್ನು ಹೊಂದಿದೆ. ಜಲಂಧರ್ ನಗರವು ಪ್ರವಾಸಿಗರಿಗೆ ಮುದ ನೀಡುವ ನಗರವಾಗಿದೆ.
ಜಲಂಧರ್ ಸುತ್ತಮುತ್ತವಿರುವ ಪ್ರವಾಸಿ ಸ್ಥಳಗಳು
ಜಲಂಧರ್ ನಗರವು ಹಲವಾರು ಪ್ರವಾಸಿ ಸ್ಥಳಗಳನ್ನು ಹೊಂದಿದೆ, ಅದರಲ್ಲಿ ಪ್ರಮುಖವಾಗಿ ಕೋಟೆ, ದೇವಾಲಯ ಮತ್ತು ಮ್ಯೂಸಿಯಂ. ಜಲಂಧರ ಪ್ರವಾಸೋದ್ಯಮದಲ್ಲಿ ನಾವು ಪಟ್ಟಿ ಮಾಡಬಹುದಾದ ಪ್ರಮುಖ ಪ್ರವಾಸಿ ಸ್ಥಳಗಳೆಂದರೆ ಶಿವ ಮಂದಿರ, ತುಳಸಿ ಮಂದಿರ, ದೇವಿ ತುಲಾಬ್ ಮಂದಿರ, ಸೈಂಟ್ ಮೇರಿ ಕ್ಯಾಥಡ್ರಾಲ್ ಚರ್ಚ್, ಪುಷ್ಪ ಗುಜ್ರಾಲ್ ವಿಜ್ಞಾನ ನಗರ, ಭಗತ್ ಸಿಂಗ್ ಮ್ಯೂಸಿಯಂ ಮತ್ತು ವಂಡರ್ ಲ್ಯಾಂಡ್ ಥೀಮ್ ಪಾರ್ಕ್. ಇದಲ್ಲದೇ ಹಲವು ಗುರುದ್ವಾರಗಳೂ ನಗರದ ವಿವಿಧ ಪ್ರದೇಶಗಳಲ್ಲಿದೆ, ಇದೆಲ್ಲವೂ ಕಲೆ ಮತ್ತು ಸಂಸ್ಕೃತಿಯನ್ನು ಬಿಂಬಿಸುತ್ತದೆ. ಜಲಂಧರ್ ನಗರದಲ್ಲಿ ಹಲವಾರು ಮಾಲ್ ಗಳು, ವ್ಯಾಪಾರೀ ಕೇಂದ್ರಗಳಿದ್ದು ಖರೀದಿ ಮಾಡುವವರಿಗೆ ಖುಷಿ ನೀಡುತ್ತದೆ.
ಜಲಂಧರ್ ತಲುಪುವುದು ಹೇಗೆ?
ಜಲಂಧರ್ ನಗರವು ದೇಶದ ಪ್ರಮುಖ ನಗರಗಳಿಂದ ರೈಲು ಮೂಲಕ ಉತ್ತಮ ಸಂಪರ್ಕವನ್ನು ಹೊಂದಿದೆ. ಇದಲ್ಲದೇ ವ್ಯಾಪಕವಾಗಿ ಹರಡಿರುವ ಬಸ್ ವ್ಯವಸ್ಥೆ ಉತ್ತರದ ರಾಜ್ಯಕ್ಕೆ ಉತ್ತಮ ಸಂಪರ್ಕ ಕೊಂಡಿಯಾಗಿದೆ. ಜಲಂಧರ್ ನಗರಕ್ಕಿರುವ ಹತ್ತಿರದ ವಿಮಾನ ನಿಲ್ದಾಣವೆಂದರೆ ರಾಜಾ ಸಾನ್ಸಿ ವಿಮಾನ ನಿಲ್ದಾಣ, ಅಮೃತಸರ (90 ಕಿ.ಮೀ) ಇಲ್ಲಿಗೆ ಭಾರತದ ಇತರ ನಗರಗಳಿಂದ ವಿಮಾನದ ಸೌಲಭ್ಯವಿದೆ.
ಜಲಂಧರ್ ಭೇಟಿ ನೀಡಲು ಯಾವ ಸಮಯ ಸೂಕ್ತ?
ಜಲಂಧರ್ ನಗರದಲ್ಲಿ ಉಷ್ಣ ಮತ್ತು ತೇವಾಂಸದ ವಾತಾವರಣವಿದ್ದು, ಜೊತೆಗೆ ಅತಿಯಾದ ಚಳಿಗಾಲ ಮತ್ತು ಬಿರು ಬೇಸಿಗೆ ಇರುತ್ತದೆ. ಅಕ್ಟೋಬರ್, ನವೆಂಬರ್, ಫೆಬ್ರವರಿ ಮತ್ತು ಮಾರ್ಚ್ ತಿಂಗಳಲ್ಲಿ ಜಲಂಧರಿಗೆ ಭೇಟಿ ನೀಡುವುದು ಹೆಚ್ಚು ಪ್ರಶಸ್ತ.