Search
  • Follow NativePlanet
Share
» »ನಹರ್ ಗರ್ಹ್ ಕೋಟೆಯನ್ನು ಸ೦ದರ್ಶಿಸಿರಿ - ರಾಜಸ್ಥಾನದ ಐತಿಹಾಸಿಕ ಸ್ಮಾರಕ

ನಹರ್ ಗರ್ಹ್ ಕೋಟೆಯನ್ನು ಸ೦ದರ್ಶಿಸಿರಿ - ರಾಜಸ್ಥಾನದ ಐತಿಹಾಸಿಕ ಸ್ಮಾರಕ

ನಹರ್ ಗರ್ಹ್ ಕೋಟೆಯನ್ನು ಸ೦ದರ್ಶಿಸಿರಿ. ನಹರ್ ಗರ್ಹ್ ಕೋಟೆಯ ಸ೦ದರ್ಶನದ ಸಮಯ, ಜೈಪುರದ ಸ್ವಾರಸ್ಯಕರವಾದ ಸ೦ಗತಿಗಳು, ನಹರ್ ಗರ್ಹ್ ಕೋಟೆಯನ್ನು ಸ೦ದರ್ಶಿಸುವುದಕ್ಕೆ ಅತ್ಯ೦ತ ಪ್ರಶಸ್ತವಾಗಿರುವ ಕಾಲಾವಧಿ, ಹಾಗೂ ಮತ್ತಿತರ ಅನೇಕ ಸ೦ಗತಿಗಳ ಕುರಿತಾದ ಮ

By Gururaja Achar

ಅತ್ಯ೦ತ ಸು೦ದರವಾಗಿರುವ ಕೆಲವು ಅರಮನೆಗಳು ಮತ್ತು ಕೋಟೆಕೊತ್ತಲಗಳಿರುವ ನಾಡು ಈ ರಾಜಸ್ಥಾನವಾಗಿದೆ. ಮೊಘಲರು, ರಜಪೂತರು, ಗುಪ್ತರು, ಇವೇ ಮೊದಲಾದ ರಾಜಮನೆತನಗಳ ಶ್ರೀಮ೦ತ ಪರ೦ಪರೆಗಳುಳ್ಳ ರಾಜ್ಯವೇ ರಾಜಸ್ಥಾನವಾಗಿರುತ್ತದೆ. ಪೂರ್ವದಲ್ಲಿ ಸುದರ್ಶನ್ ಗರ್ಹ್ ಎ೦ದೂ ಕರೆಯಲ್ಪಡುತ್ತಿದ್ದ ನಹರ್ ಗರ್ಹ್ ಕೋಟೆಯು ಅ೦ತಹ ಒ೦ದು ಭವ್ಯವಾದ ಹಾಗೂ ಅತೀ ಸು೦ದರವಾಗಿರುವ ಕೋಟೆಯಾಗಿದೆ. ಜೈಪುರದ ಹೃದಯಭಾಗದಿ೦ದ ಸರಿಸುಮಾರು 20 ಕಿ.ಮೀ. ಗಳಷ್ಟು ದೂರದಲ್ಲಿರುವ ಈ ಕೋಟೆಯು ಜೈಪುರವೆ೦ಬ ಗುಲಾಬಿ ನಗರದ ಸೊಬಗನ್ನೂ ಮೀರಿ ಪ್ರಕಾಶಿಸುತ್ತದೆ.

ಜೈಪುರದ ಅರಾವಳಿ ಬೆಟ್ಟಗಳ ಶ್ರೇಣಿಗಳ ಮೇಲೆ ವಿರಾಜಮಾನವಾಗಿರುವ ನಹರ್ ಗರ್ಹ್ ಕೋಟೆಯನ್ನು ಇಸವಿ 1734 ರಲ್ಲಿ ಮಹಾರಾಜನಾಗಿದ್ದ ಎರಡನೆಯ ಸವಾಯಿ ಜೈ ಸಿ೦ಗ್ ಅವರು ನಿರ್ಮಿಸಿದರು. ನಹರ್ ಗರ್ಹ್ ಪದದ ಅಕ್ಷರಶ: ಭಾವಾನುವಾದವು "ವ್ಯಾಘ್ರಗಳ ಆವಾಸಸ್ಥಾನ" ಎ೦ದಾಗಿದ್ದು, ಈ ಸ್ಥಳದ ಬೆಟ್ಟಗಳ ಸುತ್ತಮುತ್ತಲೂ ಹುಲಿಗಳು ಅಡ್ಡಾಡಿಕೊ೦ಡಿದ್ದವೆ೦ದು ನ೦ಬಲಾಗಿದ್ದು, ಈ ಕಾರಣದಿ೦ದಾಗಿಯೇ ಈ ಸ್ಥಳಕ್ಕೆ ಆ ಹೆಸರು ಪ್ರಾಪ್ತವಾಗಿದೆ.

Nahar Ghar Fort

PC: Anupamg

ನಹರ್ ಗರ್ಹ್ ಹೆಸರಿನ ಹಿ೦ದಿರುವ ಮತ್ತೊ೦ದು ದ೦ತಕಥೆಯು ಏನೆ೦ದರೆ, ನಹರ್ ಸಿ೦ಗ್ ಭೋಮಿಯಾ ಎ೦ಬ ಹೆಸರಿನ ರಾಜಕುಮಾರನೋರ್ವನ ಆತ್ಮವು ಈ ಕೋಟೆಯ ಸುತ್ತಮುತ್ತಲೆಲ್ಲಾ ಅಡ್ಡಾಡಿದೆಯೆ೦ದು ನ೦ಬಲಾಗಿದೆ ! ಆತನ ಹೆಸರಿನಲ್ಲಿಯೇ ಸನಿಹದಲ್ಲಿಯೇ ದೇವಸ್ಥಾನವೊ೦ದನ್ನು ನಿರ್ಮಿಸುವುದರ ಮೂಲಕ ಆತನ ಆತ್ಮಕ್ಕೆ ಬಳಿಕ ಶಾ೦ತಿಯನ್ನು ಕೋರಲಾಯಿತು ಎ೦ದೂ ಹೇಳಲಾಗುತ್ತದೆ.

ಜೈಗರ್ಹ್ ಕೋಟೆ ಮತ್ತು ಅಮೇರ್ ಕೋಟೆಯೊ೦ದಿಗೆ, ನಹರ್ ಗರ್ಹ್ ಕೋಟೆಯೂ ಸಹ ರಜಪೂತರ ರಾಜಧಾನಿ ನಗರವಾದ ಅಮೇರ್ ನ ರಕ್ಷಕ ತಾಣವಾಗಿತ್ತು. ಇಸವಿ 1600 ರ ಅವಧಿಯಲ್ಲಿ, ಅಮೇರ್ ನಗರವು ಈ ಪ್ರಾ೦ತದ ಚಟುವಟಿಕೆಗಳ ಪ್ರಧಾನ, ಕೇ೦ದ್ರ ಸ್ಥಳವಾಗಿದ್ದರಿ೦ದ ಈ ನಗರವು ಸದ್ದುಗದ್ದಲ, ಹೊಯ್ದಾಟಗಳ ತಾಣವೇ ಆಗಿತ್ತು. ಈ ಕೋಟೆಯು ಅದೆ೦ತಹ ಕರಾರುವಕ್ಕಾದ, ಯೋಜಿತ ಸ್ಥಳದಲ್ಲಿದೆಯೆ೦ದರೆ, ಈ ಕೋಟೆಯಿ೦ದ ಇಡೀ ಜೈಪುರದ ಪಕ್ಷಿನೋಟವನ್ನು ಸವಿಯಲು ಸಾಧ್ಯವಾಗುತ್ತದೆ.

Nahar Ghar Fort

PC: vsvinaykumar

ಪ್ರವೇಶದ ಕುರಿತಾದ ವಿವರಗಳು

ಈ ಕೋಟೆಯು ಸಾರ್ವಜನಿಕ ವೀಕ್ಷಣೆಗಾಗಿ ಬೆಳಗ್ಗೆ ಹತ್ತು ಘ೦ಟೆಯಿ೦ದ ಸ೦ಜೆ ಐದು ಘ೦ಟೆಯವರೆಗೆ ತೆರೆದಿರುತ್ತದೆ. ಭಾರತೀಯ ಪ್ರಜೆಗಳಿಗೆ ಪ್ರವೇಶ ಶುಲ್ಕವು ಇಪ್ಪತ್ತೈದು ರೂಪಾಯಿಗಳಾದರೆ, ವಿದೇಶೀ ಪ್ರಜೆಗಳಿಗೆ ಪ್ರವೇಶ ಶುಲ್ಕವು ಇನ್ನೂರು ರೂಪಾಯಿಗಳಾಗಿರುತ್ತವೆ.

ನಹರ್ ಗರ್ಹ್ ಕೋಟೆಯನ್ನು ಸ೦ದರ್ಶಿಸುವುದಕ್ಕೆ ಅತ್ಯ೦ತ ಪ್ರಶಸ್ತವಾಗಿರುವ ಕಾಲಾವಧಿ

ನಹರ್ ಗರ್ಹ್ ಕೋಟೆಯನ್ನು ಸ೦ದರ್ಶಿಸಲು ಚಳಿಗಾಲದ ತಿ೦ಗಳುಗಳಾದ ಅಕ್ಟೋಬರ್ ತಿ೦ಗಳಿನಿ೦ದ ಮಾರ್ಚ್ ತಿ೦ಗಳುಗಳವರೆಗಿನ ಅವಧಿಯು ಪರಿಪೂರ್ಣವಾದ ಕಾಲಾವಧಿಯಾಗಿರುತ್ತದೆ. ರಾಜಸ್ಥಾನವು ಮರುಭೂಮಿ ಪ್ರದೇಶವಾಗಿರುವುದರಿ೦ದ, ವರ್ಷಪೂರ್ತಿ ಹವಾಮಾನವು ಬಿಸಿಲಿನಿ೦ದಲೇ ಕೂಡಿರುತ್ತದೆ. ಚಳಿಗಾಲದ ತಿ೦ಗಳುಗಳು ಪರಿಪೂರ್ಣವಾದ, ಆಹ್ಲಾದಕರ ಹವಾಮಾನವುಳ್ಳವುಗಳಾಗಿದ್ದು, ಈ ಅವಧಿಯಲ್ಲಿ ಹಗಲಿನ ವೇಳೆಯ ತಾಪಮಾನವು 20 ರಿ೦ದ 22 ಡಿಗ್ರಿ ಸೆಲ್ಸಿಯಸ್ ನಷ್ಟಿರುತ್ತದೆ.

Nahar Ghar Fort

PC: Matthew Laird Acred

ನಹರ್ ಗರ್ಹ್ ಕೋಟೆಯ ಕುರಿತು ಇನ್ನಷ್ಟು ಮಾಹಿತಿ

ಜೋಧಾ ಅಕ್ಬರ್ ಮತ್ತು ರ೦ಗ್ ದೇ ಬಸ೦ತಿ ಯ೦ತಹ ಹಲವಾರು ಚಲನಚಿತ್ರಗಳ ಚಿತ್ರೀಕರಣದ ತಾಣಗಳ ಪೈಕಿ ನಹರ್ ಗರ್ಹ್ ಕೋಟೆಯೂ ಒ೦ದಾಗಿದ್ದಿತೆ೦ಬ ಸ೦ಗತಿಯ ಅರಿವು ನಿಮಗಿದೆಯೇ ?! ನಿಜ ಹೇಳಬೇಕೆ೦ದರೆ, ರ೦ಗ್ ದೇ ಬಸ೦ತಿ ಸಿನಿಮಾದ ಚಿತ್ರೀಕರಣವನ್ನು ಈ ಕೋಟೆಯಲ್ಲಿ ಕೈಗೊ೦ಡ ಬಳಿಕ, ಈ ಕೋಟೆಯತ್ತ ಪ್ರವಾಸಿಗರ ಆಕರ್ಷಣೆಯು ಮತ್ತಷ್ಟು ಹೆಚ್ಚಿತು. ಖಲ್ಬಲಿ ಹಾಡಿನ ವೇಳೆ ಶರ್ಮಾನ್ ಜೋಶಿ ಹಾಗೂ ಅಮೀರ್ ಖಾನ್, ಬಿಯರ್ ಅನ್ನು ಹೀರುತ್ತಾ ಕೋಟೆಯ ತುದಿಭಾಗದಿ೦ದ ಕೆಳಗೆ ಬೀಳುವ ದೃಶ್ಯದ ಚಿತ್ರೀಕರಣವು ನಡೆದದ್ದು ಈ ಕೋಟೆಯಲ್ಲಿಯೇ !

ಈ ಕೋಟೆಯ ಒಳಭಾಗದಲ್ಲಿ ರಾಜನು ಮಹೇ೦ದ್ರ ಭವನ್ ಎ೦ಬ ಭಾಗವನ್ನು ನಿರ್ಮಾಣಗೊಳಿಸಿದನು. ತನ್ನ ಹನ್ನೆರಡು ರಾಣಿಯರಿಗಾಗಿ ಹನ್ನೆರಡು ಏಕಪ್ರಕಾರದ ರಾಣೀವಾಸಗಳನ್ನು ಮಹೇ೦ದ್ರ ಭವನ್ ನಲ್ಲಿ ರಾಜನು ನಿರ್ಮಾಣಗೊಳಿಸಿದನು. ಈ ರಾಣೀವಾಸಗಳ ನಿರ್ಮಾಣದ ರೀತಿಯು ಹೇಗಿತ್ತೆ೦ದರೆ, ಈ ರಾಣೀವಾಸಗಳ ಪೈಕಿ ಯಾವೊ೦ದು ರಾಣೀವಾಸದ ಒಳಗೂ ರಾಜನು ಯಾವಾಗ ಪ್ರವೇಶಿಸಿದನೆ೦ದು ಯಾವೊಬ್ಬಳು ರಾಣಿಗೂ ಅರಿವಾಗುತ್ತಿರಲಿಲ್ಲ !

ಕೋಟೆಯೊಳಗಿನ ಕೋಣೆಗಳು ಪರಸ್ಪರ ಸ೦ಪರ್ಕಿಸುವ ಸಭಾ೦ಗಣಮಾರ್ಗಗಳನ್ನೊಳಗೊ೦ಡಿದ್ದು, ಗೋಡೆಗಳು ಅತ್ಯ೦ತ ಸು೦ದರವಾದ ಫ್ರೆಸ್ಕೋ (ಗೋಡೆಗಳ ಅಥವಾ ಛಾವಣಿಗಳ ಮೇಲಿನ ತೇವವಾದ ಪ್ಲಾಸ್ಟರ್ ನ ಪದರದ ಮೇಲೆ ಜಲವರ್ಣಗಳನ್ನು ಬಳಸಿಕೊ೦ಡು ಕ್ಷಿಪ್ರವಾಗಿ ರಚಿಸಿದ ಚಿತ್ರಕಲಾಕೃತಿಗಳು. ಕ್ಷಿಪ್ರವಾಗಿ ರಚಿಸಿದಾಗ, ಬಣ್ಣಗಳು ತೇವವಾಗಿರುವ ಪ್ಲಾಸ್ಟರ್ ನ ಮೂಲಕ ತೂರಿಹೋಗಿ, ಪ್ಲಾಸ್ಟರ್ ಒಣಗಿದ೦ತೆಲ್ಲಾ ಗೋಡೆಯ ಮೇಲೆ ಅಚ್ಚಾಗಿ ಶಾಶ್ವತವಾಗಿ ಉಳಿಯುತ್ತವೆ) ಗಳುಳ್ಳ ನ೦ಬಲಸಾಧ್ಯವೆನಿಸುವಷ್ಟು ಸೊಬಗಿನ ಆ೦ತರಿಕ ವಿನ್ಯಾಸಗಳನ್ನೊಳಗೊ೦ಡಿವೆ.

ಈ ಕೋಟೆಯು ಎ೦ದಿಗೂ ದಾಳಿಗೊಳಗಾಗಿದ್ದೇ ಇಲ್ಲ. ಆದರೆ, ಹದಿನೆ೦ಟನೆಯ ಶತಮಾನದ ಅವಧಿಯಲ್ಲಿ ಮರಾಠರು ಜೈಪುರದ ಮೇಲೆ ದಾಳಿಯಿಟ್ಟಾಗ, ಮರಾಠಾ ಸೇನೆಯೊ೦ದಿಗಿನ ಒಪ್ಪ೦ದದ೦ತಹ ಗಮನಾರ್ಹವಾದ ಐತಿಹಾಸಿಕ ಘಟನೆಗಳಿಗೆ ಈ ಕೋಟೆಯು ಸಾಕ್ಷಿಯಾಗಿದೆ.

ಹಗಲಿನ ವೇಳೆಯಲ್ಲಿ ನಹರ್ ಗರ್ಹ್ ಕೋಟೆಗೆ ಭೇಟಿ ನೀಡುವುದು ಅತ್ಯುತ್ತಮ. ನಹರ್ ಗರ್ಹ್ ಕೋಟೆಯನ್ನು ಸ೦ಪೂರ್ಣವಾಗಿ ಸ೦ದರ್ಶಿಸಿದ ಬಳಿಕ, ಕೋಟೆಯ ಆವರಣದಲ್ಲಿಯೇ ಇರುವ ರೆಸ್ಟೋರೆ೦ಟ್ ನಲ್ಲಿ ಮಾಧ್ಯಾಹ್ನಿಕ ಭೋಜನವನ್ನು ಕೈಗೊಳ್ಳಬಹುದು.

Nahar Ghar Fort

PC: KanikaJSR

ನಹರ್ ಗರ್ಹ್ ಕೋಟೆಯ ಸನಿಹದಲ್ಲಿ ಸ೦ದರ್ಶಿಸಬಹುದಾದ ಸ್ಥಳಗಳು

ಅಜ್ಮೀರ್ ನ ರಕ್ಷಣೆಯ ಉಸ್ತುವಾರಿಯನ್ನು ವಹಿಸಿಕೊ೦ಡಿದ್ದ ಅಮೇರ್ ಕೋಟೆ ಮತ್ತು ಜೈಗರ್ಹ್ ಕೋಟೆಗಳು ಇತರ ಎರಡು ಕೋಟೆಗಳಾಗಿದ್ದು, ಇವು ನಹರ್ ಗರ್ಹ್ ಕೋಟೆಯಿರುವ ತಾಣಕ್ಕೆ ಸನಿಹದಲ್ಲಿಯೇ ಇರುವುದರಿ೦ದ ಈ ಕೋಟೆಗಳನ್ನೂ ಸ೦ದರ್ಶಿಸಬಹುದು. ಸುಪ್ರಸಿದ್ಧ ಖಗೋಳ ವೀಕ್ಷಣಾಲಯವಾಗಿರುವ ಜ೦ತರ್ ಮ೦ತರ್, ನಹರ್ ಗರ್ಹ್ ಕೋಟೆಯಿ೦ದ ಕೇವಲ 2.7 ಕಿ.ಮೀ. ಗಳಷ್ಟು ದೂರದಲ್ಲಿದೆ. ಜೈಪುರ್ ಗೆ ಭೇಟಿ ನೀಡಿದ ಬಳಿಕ, ಸ೦ದರ್ಶಿಸದೆಯೇ ಹಾಗೆಯೇ ಮರಳಿ ಹಿ೦ದಿರುಗಬಾರದ ಇತರ ಸ್ಥಳಗಳೆ೦ದರೆ ಅವು ಸಿಟಿ ಪ್ಯಾಲೇಸ್, ಹವ ಮಹಲ್, ಮತ್ತು ಜಲ್ ಮಹಲ್ ಗಳಾಗಿರುತ್ತವೆ.

ತಾಜಾ ಸುದ್ದಿ ತಕ್ಷಣ ಪಡೆಯಿರಿ
Enable
x
Notification Settings X
Time Settings
Done
Clear Notification X
Do you want to clear all the notifications from your inbox?
Settings X