ದೀರ್ಘಕಾಲದ ರಜೆಯಲ್ಲಿ ದೂರದ ಪ್ರಯಾಣ

ಕೊಲಾನುಪಾಕ ಜೈನ ದೇಗುಲ

ನಲ್ಗೊಂಡದಲ್ಲಿರುವ ಈ ಜೈನ ದೇಗುಲ 2000 ವರ್ಷಗಳಷ್ಟು ಹಳೆಯ ದೇಗುಲ. ದಕ್ಷಿಣ ಭಾರತದಲ್ಲಿರುವ ಶ್ವೇತಾಂಬರರ ದೇಗುಲದಲ್ಲಿ ಇದು ಒಂದು. ಇಲ್ಲಿ ಜೈನ ತೀರ್ಥಂಕರರ ಮೂರ್ತಿಗಳನ್ನು ಇಡಲಾಗಿದೆ. ಅಮೃತ ಶಿಲೆಯಲ್ಲಿ ನಿರ್ಮಿಸಲಾದ ಈ ದೇಗುಲ ಸುಂದರವಾದ ವಾಸ್ತು ಶಿಲ್ಪವನ್ನು ಒಳಗೊಂಡಿದೆ. ಇಲ್ಲಿಯೇ ಹತ್ತಿರದಲ್ಲಿ ಒಂದು ಶಿವಾಲಯ ಇರುವುದನ್ನು ಕಾಣಬಹುದು.
PC: wikipedia.org

ರಾಮಗಿರಿ ಕೋಟೆ

ಈ ಕೋಟೆ ತೆಲಂಗಾಣದ ಪೆಡ್ಡಪಳ್ಳಿ ಜಿಲ್ಲೆಯಲ್ಲಿದೆ. 12ನೇ ಶತಮಾನದಲ್ಲಿ ನಿರ್ಮಾಣವಾದ ಈ ಕೋಟೆನ್ನು ಕೇವಲ ಮಣ್ಣು ಮತ್ತು ಕಲ್ಲಿನಲ್ಲಿ ನಿರ್ಮಿಸಲಾಗಿದೆ. ಇದನ್ನು ಕಾಕತೀಯರು ನಿರ್ಮಿಸಿದ್ದರು ಎನ್ನಲಾಗುತ್ತದೆ. ಗುಡ್ಡದ ತುದಿಯಲ್ಲಿರುವ ಈ ಕೋಟೆಯ ಸುತ್ತ ಆಯುರ್ವೇದ ಗಿಡಮೂಲಿಕೆಯಿಂದ ಆವೃತಗೊಂಡಿದೆ.
PC: wikipedia.org

ಗೌತಮೇಶ್ವರ ದೇಗುಲ

ಗೋದಾವರಿ ನದಿಯ ದಡದಲ್ಲಿರುವ ಈ ದೇಗುಲ ಬಹಳ ಪುರಾತನ ಕಾಲದ್ದು. ಶಿವನನ್ನು ಆರಾಧಿಸುವ ಈ ದೇಗುಲ ಹಿಂದಿನಕಾಲದಲ್ಲಿ ವೇದಾಧ್ಯಯನದ ಕೇಂದ್ರವಾಗಿತ್ತು ಎನ್ನಲಾಗುತ್ತದೆ.

ಮಲ್ಲೆಲಾ ತೀರ್ಥ

ಮಹಬೂಬ್ ನಗರದಲ್ಲಿರುವವ ನಲ್ಲಮಲ್ಲ ಕಾಡಿನಲ್ಲಿ ಮಲ್ಲೆಲಾ ತೀರ್ಥ ಜಲಪಾತವಿದೆ. ಕೃಷ್ಣ ನದಿ ನೀರಿನಿಂದ ಹುಟ್ಟುವ ಈ ಜಲಧಾರೆ 150 ಅಡಿ ಎತ್ತರದಿಂದ ಧುಮುಕುತ್ತದೆ. ಸ್ನೇಹಿತರೊಡನೆ, ಕುಟುಂಬದವರೊಡನೆ ಬರಲು ಒಂದು ಸೂಕ್ತ ಸ್ಥಳ. ಈ ಜಲಧಾರೆಯಲ್ಲಿ ಪ್ರವಾಸಿಗರು ಸ್ನಾನ ಮಾಡಬಹುದು. ಸುತ್ತ ಹಸಿರು ಕಾಡುಗಳಿಂದ ಕೂಡಿದ್ದು, ಶಾಂತವಾದ ವಾತಾವರಣವನ್ನು ಗಮನಿಸಬಹುದು.
PC: wikipedia.org

ಪಾಕ್ಹಾಲ್ ಕೆರೆ

ವಾರಂಗಲ್ ಜಿಲ್ಲೆಯಲ್ಲಿರುವ ಈ ಕೆರೆ ಮಾನವ ನಿರ್ಮಿತ ಕೆರೆ ಎಂದು ಹೇಳಲಾಗುತ್ತದೆ. ಕಾಕತೀಯ ಅರಸರ ಕಾಲದಲ್ಲಿ ನಿರ್ಮಾಣಗೊಂಡ ಈ ಕೆರೆ ಕಾಡುಗಳ ಮಧ್ಯಭಾಗದಲ್ಲಿದೆ. ಇದರ ಹತ್ತಿರವೇ ಪಾಕ್ಹಾಲ್ ವನ್ಯಜೀವಿ ದಾಮವಿದೆ. ಇದರಲ್ಲಿ ಹುಲಿ, ಚಿರತೆ, ನರಿ, ಜಿಂಕೆ, ತೋಳ, ಕಾಡು ನಾಯಿ ಸೇರಿದಂತೆ ಅನೇಕ ಪ್ರಾಣಿಗಳನ್ನು ಕಾಣಬಹುದು. ಈ ಕೆರೆಯ ದಡದಲ್ಲಿ ಬೆಳದಿಂಗಳ ರಾತ್ರಿಯ ಶಿಬಿರವನ್ನು ಕೈಗೊಂಡರೆ ಮರೆಯಲಾಗದ ಅನುಭವವನ್ನು ಹೊಂದಬಹುದು.
PC: wikipedia.org

ಧುಳಿಕಟ್ಟ ಬೌದ್ಧ ಸ್ತೂಪ

ಧುಳಿಕಟ್ಟ ಎಂದರೆ ಮಣ್ಣಿನ ಕೋಟೆ ಎಂಬ ಅರ್ಥವನ್ನು ನೀಡುತ್ತದೆ. ಇಲ್ಲಿರುವ ಬೃಹತ್ ಬೌದ್ಧ ಸ್ತೂಪವು ಎರಡನೇ ಶತಮಾನದ ಇತಿಹಾಸವನ್ನು ಹೊಂದಿದೆ. ಇದರ ಸುತ್ತಲೂ ಹುಲ್ಲುಗಳಿಂದ ಆವೃತಗೊಂಡಿದ್ದು, ಆ ಕಾಲದ ಶ್ರೀಮಂತ ಇತಿಹಾಸವನ್ನು ಸಾರುತ್ತದೆ.
PC: telanganatourism.gov.in

ಕುಂತಲ ಜಲಪಾತ

ಕುಂತಲ ಎನ್ನುವ ಊರಿನಲ್ಲಿರುವ ಈ ಜಲಪಾತ ಕದಂ ನದಿಯಿಂದ ಹುಟ್ಟುತ್ತದೆ. ಇದು ತೆಲಂಗಣದಲ್ಲಿಯೇ ಅತಿ ಎತ್ತರದಿಂದ ಧುಮುಕುವ ಜಲಪಾತ ಎನ್ನುವ ಹೆಗ್ಗಳಿಕೆಗೆ ಪಾತ್ರವಾಗಿದೆ. ಶಕುಂತಲಾಳ ಪ್ರೇಮ ಕಥೆಯು ಈ ತಾಣದಲ್ಲೇ ಹುಟ್ಟಿಕೊಂಡಿದ್ದು, ಶಕುಂತಲಾ ಈ ಜಲಧಾರೆಯಲ್ಲೇ ಸ್ನಾನ ಮಾಡುತ್ತಿದ್ದಳು ಎಂಬುದು ಇಲ್ಲಿಯ ಸ್ಥಳೀಯರ ಅನಿಸಿಕೆ. ಇಲ್ಲಿಯ ಹಸಿರು ಸಿರಿಯ ಸೌಂದರ್ಯ ಮನಸ್ಸಿಗೆ ಮುದ ನೀಡಬಲ್ಲದು.
PC: wikipedia.org

ಭೊಂಗಿರ್ ಕೋಟೆ

ಯಾದಗಿರಿ ಭುವನಗಿರಿ ಜಿಲ್ಲೆಯ ಭೊಂಗಿರ್ ಊರಿನಲ್ಲಿ ಈ ಕೋಟೆಯಿದೆ. ಬೃಹತ್ ಆಕಾರದ ಬಂಡೆಯಮೇಲಿರುವ ಈ ಕೋಡೆ 10ನೇ ಶತಮಾನದ ಇತಿಹಾಸವನ್ನು ಒಳಗೊಂಡಿದೆ. ಚಾಲುಕ್ಯರ ಕಾಲದ ಆರನೇ ತ್ರಿಭುವನ ಮಲ್ಲ ವಿಕ್ರಮಾದಿತ್ಯನು ಈ ಕೋಟೆಯನ್ನು ನಿರ್ಮಿಸಿದ್ದ. ಆನಂತರ ಈ ಪ್ರದೇಶವನ್ನು ತ್ರಿಭುವನಗಿರಿ ಎಂದು ಕರೆಯಲಾಯಿತು. ಸಮುದ್ರ ಮಟ್ಟದಿಂದ 609.6 ಅಡಿ ಎತ್ತರದಲ್ಲಿ ಇರುವ ಈ ಕೋಟೆ ಅಂಡಾಕಾರದಲ್ಲಿದೆ. ಎರಡು ದ್ವಾರವನ್ನು ಹೊಂದಿರುವ ಈ ಕೋಟೆಗೆ ಬೃಹತ್ ಕಲ್ಲುಗಳಿಂದ ರಕ್ಷಣೆ ಪಡೆದಿದೆ.
PC: wikipedia.org

ಪೋಚರಂ ಅಭಯಾರಣ್ಯ ಮತ್ತು ಅಣೆಕಟ್ಟು

ತೆಲಂಗಣದಿಂದ 115 ಕಿ.ಮೀ. ದೂರದಲ್ಲಿರುವ ಈ ತಾಣ ನಿಜಾಮರ ಕಾಲದಲ್ಲಿ ಬೇಟೆಯಾಡುವ ಸ್ಥಳವಾಗಿತ್ತು. 20ನೇ ಶತಮಾನದಲ್ಲಿ ಅಭಯಾರಣ್ಯವೆಂದು ಘೋಷಿಸಿ, ಪೋಚರಂ ಎಂದು ಹೆಸರಿಸಲಾಯಿತು. 130 ಕಿ.ಮೀ. ವ್ಯಾಪ್ತಿಯನ್ನು ಹೊಂದಿರುವ ಈ ತಾಣ ಮೇದಕ್ ಊರಿಗೆ ಹತ್ತಿರವಾಗಿದೆ. ಇಲ್ಲಿ ಹಲವು ಬಗೆಯ ಪ್ರಾಣಿ-ಪಕ್ಷಿಗಳನ್ನು ವೀಕ್ಷಿಸಬಹುದು.
PC: wikipedia.org

ಡಿಚ್‍ಪಲ್ಲಿ ರಾಮಾಲಯ

ನಿಜಾಮಾಬಾದ್‍ಅಲ್ಲಿ ಇರುವ ಈ ದೇವಾಲಯ 14ನೇ ಶತಮಾನದ ಇತಿಹಾಸವನ್ನು ಒಳಗೊಂಡಿದೆ. ರಾಮನನ್ನು ಆರಾಧಿಸುವ ಈ ಕ್ಷೇತ್ರ ಕಾಕತೀಯ ರಾಜರ ಕೊಡುಗೆ ಎನ್ನಲಾಗುತ್ತದೆ. ಈ ದೇವಾಲಯವನ್ನು ಬಿಳಿ ಮತ್ತು ಕಪ್ಪು ಬಣ್ಣದ ಬಸಾಲ್ಟ್ ಕಲ್ಲಿನಿಂದ ನಿರ್ಮಿಸಲಾಗಿದೆ. ಇದರ ಮೇಲೆ ದೇವತೆಗಳು ಹಾಗೂ ಪ್ರಾಣಿಗಳ ಚಿತ್ರವನ್ನು ಕೆತ್ತಲಾಗಿದೆ. ಈ ದೇಗುಲಕ್ಕೆ 105 ಮೆಟ್ಟಿಲುಗಳನ್ನು ಏರಿ ಬರಬೇಕು.
PC: wikipedia.org