ತೋರಣಮಲ್ ಮಹಾರಾಷ್ಟ್ರದ ನಂದುರ್ಬಾರ್ ಜಿಲ್ಲೆಯಲ್ಲಿರುವ ಒಂದು ಸಣ್ಣ ಗಿರಿಧಾಮವಾಗಿದೆ. 1,150 ಮೀಟರ್ ಎತ್ತರದಲ್ಲಿರುವ ಈ ಗಿರಿಧಾಮ ಸಾತ್ಪುರ ವಲಯದಲ್ಲಿದೆ. ತೋರಣಮಲ್ ಮೂಲತಃ ತಪ್ಪಲಿನ ಆಕಾರದಲ್ಲಿದ್ದು ಕೇವಲ 44 ಚ.ಕಿ.ಮೀ ವಿಸ್ತೀರ್ಣದಲ್ಲಿದೆ.

ಈ ಗಿರಿಧಾಮವು ತೋರ್ನ ಮರದಿಂದ ತನ್ನ ಹೆಸರನ್ನು ಪಡೆಯಿತು. ದಂತಕಥೆಗಳ ಪ್ರಕಾರ, ತೋರಣಮಲ್ ನಲ್ಲಿ ಈ ಮರಗಳು ಯಥೇಚ್ಛವಾಗಿದ್ದಿದ್ದರಿಂದ, ಇಲ್ಲಿನ ಬುಡಕಟ್ಟು ಜನರು ಈ ಮರಗಳನ್ನು ಮರಗಳ ಮತ್ತು ಸಂತಾನದ ದೇವಿಯಾದ ತೋರಣ ದೇವಿಯ ಪ್ರತಿರೂಪವಾಗಿ ಪೂಜಿಸತೊಡಗಿದರು.

ಇಲ್ಲಿರುವ ಆಕರ್ಷಣೆಗಳಲ್ಲಿ ಯಶವಂತ್ ಕೆರೆಯು ಪ್ರಮುಖ ಯಾತ್ರಾ ಸ್ಥಳವಾಗಿದೆ. ಇಲ್ಲಿ ಗೋರಕನಾಥ್ ಮತ್ತು ನಾಗಾರ್ಜುನ ದೇವಾಲಯಗಳು ಸೇರಿದಂತೆ ಹಲವಾರು ದೇವಾಲಯಗಳಿವೆ. ದಿಗಂತದ ದೃಶ್ಯ ವೈಭವವನ್ನು ಕಣ್ತುಂಬಿಕೊಳ್ಳಲು ಸೀತಾ ಖಾಯಿ ಪಾಯಿಂಟ್ ಮತ್ತು ಸೂರ್ಯಾಸ್ತದ ಪಾಯಿಂಟ್ ಇಲ್ಲಿನ ಪ್ರಾಂತ್ಯದಲ್ಲಿ ನೋಡಲೆಬೇಕಾದ ವಿಹಂಗಮ ನೋಟದ ತಾಣಗಳಾಗಿವೆ.

ತೋರಣಮಲ್ ಗೆ ಏಕೆ ಹೋಗಬೇಕು?

ತೋರಣಮಲ್ ಬೆಟ್ಟದ ತುದಿಯಲ್ಲಿ ನೆಲೆಸಿರುವ ಕಾರಣವಾಗಿ ವರ್ಷಪೂರ್ತಿ ಅತ್ಯಂತ ಅಹ್ಲಾದಕರವಾದ ಹವಾಗುಣದ ವರವನ್ನು ಪಡೆದಿದೆ. ಈ ಗಿರಿಧಾಮವು ಮಹಾರಾಷ್ಟ್ರದ ಪ್ರಮುಖ ನಗರ ಮತ್ತು ಪಟ್ಟಣಗಳಿಂದ ಉತ್ತಮ ಸಂಪರ್ಕವನ್ನು ಹೊಂದಿದೆ. ಈ ಯಾತ್ರಾ ಸ್ಥಳವು ದಿಢೀರ್ ಎಂದು ರಜೆ ಕಳೆಯಲು ಹೇಳಿ ಮಾಡಿಸಿದ ತಾಣವಾಗಿದೆ.

ತೋರಣಮಲ್ ಹಚ್ಚ ಹಸಿರಿನಿಂದ ಕೂಡಿದ ಬೆಟ್ಟಗಳಿಂದ ಸುತ್ತುವರೆದಿದ್ದು, ಇಡೀ ಮಹಾರಾಷ್ಟ್ರದಲ್ಲಿ ಎರಡನೆ ’ತಂಪಾದ’ ಗಿರಿಧಾಮವೆಂಬ ಖ್ಯಾತಿಯನ್ನು ಮುಡಿಗೇರಿಸಿಕೊಂಡಿದೆ. ಈ ಯಾತ್ರಾಸ್ಥಳವು ಬಣ್ಣಿಸಲಸಾಧ್ಯವಾದ ಸುಂದರ ಕೆರೆಗಳನ್ನು, ವೀಕ್ಷಣಾ ಸ್ಥಳಗಳನ್ನು ಮತ್ತು ಯಾವುದೇ ಚಾರಣಿಗರು ಸವಾಲಾಗಿ ಸ್ವೀಕರಿಸುವ ಮತ್ತು ಸಂತಸ ಪಡಬಹುದಾದ ಅದ್ಭುತ ಸ್ಥಳಗಳು ಇಲ್ಲಿವೆ. ಹುಚ್ಚು ಹಿಡಿಸುವ ನಗರದ ಜನಸಂದಣಿಯಿಂದ ದೂರವಾಗಿ ಶಾಂತಿ ಮತ್ತು ಏಕಾಂತವನ್ನು ಪಡೆಯಬೇಕಾದಲ್ಲಿ ಈ ಗಿರಿಧಾಮಕ್ಕೆ ಭೇಟಿಕೊಡಿ.