ಜಖು ಬೆಟ್ಟವು ಸಮುದ್ರ ಮಟ್ಟದಿಂದ ಸುಮಾರು 8000 ಅಡಿ ಎತ್ತರದಲ್ಲಿದೆ. ಅಲ್ಲದೆ ಇದು ರಿಡ್ಜ್ ನಿಂದ 1 ಕಿ.ಮೀ ದೂರದಲ್ಲಿದೆ. ಇದು ಶಿಮ್ಲಾದಲ್ಲಿಯೆ ಅತ್ಯಂತ ಎತ್ತರವಾದ ಬೆಟ್ಟವಾಗಿದೆ. ಹಾಗಾಗಿ ಇದು ಸುತ್ತಲಿನ ಹಿಮಾಲಯ ಪರ್ವತ ಶ್ರೇಣಿಯ ನಯನ ಮನೋಹರ ದೃಶ್ಯಾವಳಿಗಳನ್ನು ನೋಡುವ ಅವಕಾಶ ಕೊಡುತ್ತದೆ. ಪ್ರಸಿದ್ಧವಾದ "ಜಖು" ದೇವಾಲಯವು ಈ ಬೆಟ್ಟದಲ್ಲಿ ನೆಲೆಗೊಂಡಿದೆ. ಹಾಗಾಗಿಯೆ ಇದಕ್ಕೆ ಈ ಹೆಸರು ಬಂದಿದೆ. "ಜಖು" ಎಂಬ ಪದದ ಅರ್ಥ " ಯಕ್ಷ" ಎಂದಾಗುತ್ತದೆ. ಇದರರ್ಥ ಪುರಾಣಗಳ ಪ್ರಕಾರ ದೇವತೆಗಳ ಸಂಪತ್ತನ್ನು ಕಾಯುವ ಜನರು ಎಂದರ್ಥ.  ಜನಪದ ಕತೆಯ ಪ್ರಕಾರ ಈ ದೇವಾಲಯವು ಇಲ್ಲಿ ರಾಮಾಯಣ ಕಾಲದಿಂದಲು ಇದೆಯಂತೆ. ಲಕ್ಷ್ಮಣನು ಮೂರ್ಛೆ ತಪ್ಪಿದಾಗ ಆತನಿಗಾಗಿ ಸಂಜೀವಿನಿ ಮೂಲಿಕೆಯನ್ನು ಹುಡುಕಿ ಹೊರಟ ಆಂಜನೇಯನು ಇಲ್ಲಿ ವಿಶ್ರಾಂತಿ ತೆಗೆದುಕೊಂಡನಂತೆ. ಸಾಹಸ ಪ್ರಿಯರಿಗೆ ಇಲ್ಲಿ ಚಾರಣ ಕೈಗೊಳ್ಳುವ ಅವಕಾಶ ಸಹ ಸಿಗುತ್ತದೆ.