ಪೋರ್ಟ್ ಬ್ಲೇರ್ ಈ ದ್ವೀಪ ಸಮೂಹಗಳ ರಾಜಧಾನಿ ನಗರ. ಇದು ಈ ದ್ವೀಪ ಸಮೂಹಗಳಲ್ಲಿಯೇ ಅತ್ಯಂತ ದೊಡ್ಡ ದ್ವೀಪವಾದ ದಕ್ಷಿಣ ಅಂಡಮಾನ್ ದ್ವೀಪದಲ್ಲಿದೆ. ದ್ವೀಪದ ದಕ್ಷಿಣದಲ್ಲಿರುವ ಕಾರಣ ಹಿತಕರವಾದ ಉಷ್ಣವಲಯದ ಹವಾಮಾನವನ್ನು ಹೊಂದಿದೆ. ಮಳೆಗಾಲದಲ್ಲಿ ಬೀಳುವ ಮಳೆ ಇದನ್ನು ಅತ್ಯುತ್ತಮ ರಜಾಕಾಲ ಕಳೆಯುವ ಸ್ಥಳವನ್ನಾಗಿಸಿದೆ. ಇದು ಭಾರತೀಯ ಮತ್ತು ವಿದೇಶಿ ಪ್ರವಾಸಿಗರಿಬ್ಬರಲ್ಲೂ ಅತ್ಯಂತ ಪ್ರಸಿದ್ಧ ತಾಣವಾಗಿದೆ. ಅದರಲ್ಲೂ ಇಲ್ಲಿ ವಿದೇಶಿಯರಿಗೆ ಮೀಸಲಾಗಿರಿಸಿರುವ ಕೆಲವು ಪ್ರದೇಶಗಳು ವಿದೇಶಿಯರನ್ನು ಮತ್ತಷ್ಟು ಆಕರ್ಷಿಸುತ್ತದೆ.
ಒಂದು ನಗರವಾಗಿ ಪೋರ್ಟ್ ಬ್ಲೇರ್ ಹಲವಾರು ಕಾರಣಗಳಿಗೆ ಪ್ರಮುಖವಾಗಿದೆ. ಇದು ಭಾರತದ ಟ್ರೈ ಸರ್ವೀಸ್ ಕಮಾಂಡ್ ನ ಕೇಂದ್ರ ಕಾರ್ಯಾಲಯವೂ ಆಗಿದೆ. ಅಂದರೆ ನೀವು ಊಹಿಸಿರುವಂತೆ ಇಲ್ಲಿ ಭಾರತೀಯ ವಾಯುಪಡೆ, ನೌಕಾಪಡೆ ಮತ್ತು ಭೂಸೈನ್ಯದ ಸೇನೆಗಳಿವೆ. ಇದು ಕೆಲವು ಮೋಜಿನ ಆಟಗಳಿರುವ ಕಡಲ ತೀರಗಳು ಮತ್ತು ರಜಾ ದಿನಗಳನ್ನು ಕಳೆಯುವ ತಾಣಗಳನ್ನೂ ಹೊಂದಿದ್ದು ಆಕರ್ಷಣೆಯ ಕೇಂದ್ರವಾಗಿದೆ. ಹಾಗೂ ಇದು ಕುಖ್ಯಾತ 'ಕಾಲಾಪಾನಿ' (ಕಪ್ಪು ನೀರಿನ ಜೈಲು)ಗೆ ಪ್ರಸಿದ್ಧವಾಗಿದೆ. ಇದು ಭಾರತದ ಜೈಲುಗಳಲ್ಲೇ 1800 ರಿಂದಲೂ ಪ್ರಸಿದ್ಧವಾಗಿದೆ.
ಭಾರತದ ಸ್ವಾತಂತ್ರ್ಯ ಸಂಗ್ರಾಮದ ವೇಳೆ ಭಾರತೀಯ ಹೋರಾಟಗಾರರನ್ನು ಬಂಧಿಸಿಡಲು ಬ್ರಿಟೀಷರು 1800 ರ ಕೊನೆಯಲ್ಲಿ ಕಟ್ಟಿದ ಜೈಲು ಇದಾಗಿದೆ. ಇದು ಅಷ್ಟೊಂದು ಕುಖ್ಯಾತವಾಗಲು ಕಾರಣ ಸಹಿಸಲಾಗದ ರೀತಿಯಲ್ಲಿ ಬ್ರಿಟೀಷರು ಅನುಸರಿಸಿದ ಕೆಲವು ಶಿಕ್ಷೆ ನೀಡುವ ತಂತ್ರಗಳು!
ನೀವು ಇಲ್ಲಿರುವಾಗ ನೀರಿನ ಚಟುವಟಿಕೆಗಳ ಆಗರವಾದ ರಾಷ್ಟ್ರೀಯ ಸಾಗರ ಉದ್ಯಾನವನ್ನು ನೋಡಲೇಬೇಕು. ಈ ಉದ್ಯಾನಕ್ಕೆ ಭೇಟಿ ನೀಡುವುದು ಎಂದರೆ ಸುಮಾರು 150 ದ್ವೀಪಗಳಿಗೆ ಭೇಟಿ ನೀಡಿದಂತೆ. ನಿಮ್ಮಲ್ಲಿರುವ ಸಮುದ್ರ ಜೀವಿಗಳ ಆಸಕ್ತಿಯ ಮೇಲೆ ಅವಲಂಬಿತವಾಗಿ ನಿಮ್ಮ ಪ್ರವಾಸ ಕೆಲವು ಘಂಟೆಗಳಿಂದ ಕೆಲವು ದಿನಗಳ ವರೆಗೂ ವಿಸ್ತರಿಸಬಹುದು.
ಸೆಲ್ಯುಲಾರ್ ಜೈಲಿಗೆ ಸಮೀಪದಲ್ಲಿರುವ ಅಂಡಮಾನ್ ನೀರಿನಾಟಗಳ ಸಮೂಹ ಪಾರಾಸೈಲಿಂಗ್, ವಾಟರ್ ಸ್ಕೂಟರ್, ಪೆಡಲ್ ಬೋಟ್ಸ್ ಮತ್ತು ಕಯೇಕಿಂಗ್ ನಂತಹ ಹಲವು ರಂಜನೀಯ ವಾಟರ್ ಸ್ಪೋರ್ಟ್ ಗಳನ್ನು ಹೊಂದಿದೆ. ವಾಣಿಜ್ಯ ಉದ್ದೇಶಗಳನ್ನು ಹೊರತುಪಡಿಸಿಯೂ ಅಂಡಮಾನ್ ನಲ್ಲಿನ ನೀರಿನ ಆಟಗಳು ನಿಮ್ಮನ್ನು ಪ್ರಕೃತಿಯ ಮತ್ತಷ್ಟು ಸಮೀಪಕ್ಕೆ ಕರೆದೊಯ್ಯುತ್ತದೆ. ಇದರ ಜೊತೆಗೆ ಇಲ್ಲಿನ ಹವಾಮಾನ ಈ ಖುಷಿಯನ್ನು ದುಪ್ಪಟ್ಟುಗೊಳಿಸುತ್ತದೆ.
ಪೋರ್ಟ್ ಬ್ಲೇರ್ ಅನ್ನು ಪ್ರವಾಸಿಗರು ಸುಲಭವಾಗಿ ತಲುಪಬಹುದಾಗಿದೆ. ಇಲ್ಲಿನ ವೀರ್ ಸಾವರ್ಕರ್ ವಿಮಾನ ನಿಲ್ದಾಣಕ್ಕೆ ಭಾರತದ ಕೊಲ್ಕತ್ತಾ, ಭುವನೇಶ್ವರ್ ಮತ್ತು ಚೆನ್ನೈನಿಂದ ತಲುಪುವುದು ಒಂದು ಮರೆಯಲಾಗದ ಅನುಭವವೇ ಸರಿ. ಇದರ ಜೊತೆಗೆ ಭಾರತದ ನೌಕಾಯಾನ ನಿಗಮ ಹಲವಾರು ನಗರಗಳಿಂದ ಹಡಗು ಸೌಕರ್ಯಗಳನ್ನೂ ಕಲ್ಪಿಸಿದೆ.