ನುಬ್ರಾ ಕಣಿವೆ- ಹೂವುಗಳ ಕಣಿವೆಯೆಂಬ ಅರ್ಥದಲ್ಲಿ ಲುಂಬ್ರ ಕಣಿವೆ ಎಂದೇ ಪ್ರಸಿದ್ದವಾಗಿತ್ತು. ಈ ಕಣಿವೆ ಸಮುದ್ರ ಮಟ್ಟದಿಂದ 10000 ಅಡಿ ಎತ್ತರದಲ್ಲಿದೆ. ಈ ಪ್ರದೇಶ ಲಡಾಖ್ ನ ಹಣ್ಣಿನ ತೋಟವೆಂದೇ ಹೆಸರು ಪಡೆದುಕೊಂಡಿದೆ. ಬೇಸಿಗೆಯ ಸಮಯದಲ್ಲಿ ಗುಲಾಬಿ ಮತ್ತು ಹಳದಿ ಬಣ್ಣದ ಹೂಗಳ ತೋರಣವನ್ನು ನೋಡುವ ಸೌಭಾಗ್ಯ ಪ್ರವಾಸಿಗರಿಗೆ ದಕ್ಕುತ್ತದೆ. ಇಲ್ಲಿನ ಇತಿಹಾಸ 7ನೇ ಶತಮಾನಕ್ಕಿಂತಲೂ ಹಳೆಯದು. ಚೈನೀಸ್, ಮಂಗೋಲಿಯನ್ನರು ಮತ್ತು ಅರಬ್ಬರು ಇಲ್ಲಿಗೆ ದಾಳಿ ಮಾಡಿದ್ದ ಇತಿಹಾಸವಿದೆ. ಇಸ್ಲಾಂಗಿಂತ ಮುಂಚೆ ಬೌದ್ಧ ಧರ್ಮ ಇಲ್ಲಿ ಹರಡಿಕೊಂಡಿತ್ತು.
ನುಬ್ರಾ ಕಣಿವೆಯನ್ನು ಪ್ರವಾಸಿಗರು ತಲುಪುವುದಕ್ಕೆ ಪ್ರಪಂಚದಲ್ಲಿಯೇ ಅತ್ಯಂತ ಎತ್ತರದ ಪಾಸ್ ಲೇಹ್ ನಿಂದ ಖರ್ದಂಗ್ ಪಾಸ್ ಮೂಲಕ ಸಂಚರಿಸಬೇಕು. ಖರ್ದಂಗ್ ಲಾ ಪಾಸ್ ವರ್ಷಪೂರ್ತಿ ಹಿಮದಿಂದ ಆವರಸಿರುತ್ತದೆ. ಹೀಗಾಗಿ, ಬಾರ್ಡರ್ ರೋಡ್ಸ್ ಆರ್ಗನೈಸೇಷನ್ ಸುಗಮ ಸಾರಿಗೆ ವ್ಯವಸ್ಥೆಯ ಜವಾಬ್ದಾರಿಯನ್ನು ವಹಿಸಿಕೊಂಡಿದೆ. ಪನಾಮಿಕ್ ಗ್ರಾಮ, ಎನ್ಸಾ ಆಶ್ರಮ ಮತ್ತು ದಿಸ್ಕಿತ್ ಆಶ್ರಮಗಳು ನುಬ್ರಾ ಕಣಿವೆಯ ಪ್ರಮುಖ ಆಕರ್ಷಣೆಗಳು.
ಪನಾಮಿಕ್ ಹಳ್ಳಿ ಸಮುದ್ರ ಮಟ್ಟದಿಂದ 10442 ಅಡಿ ಎತ್ತರದಲ್ಲಿದೆ ಮತ್ತು ಈ ಪ್ರದೇಶದ ಹೊರಭಾಗದಲ್ಲಿರುವ ಬಿಸಿ ನೀರಿನ ಬುಗ್ಗೆಯಿಂದಾಗಿ ಇದು ಪ್ರಸಿದ್ದಿ ಪಡೆದುಕೊಂಡಿದೆ. ಎನ್ಸಾ ಆಶ್ರಮ ಅಥವಾ ಎನ್ಸಾ ಗೊಂಪ ಗ್ರಾಮದ ನಡುಭಾಗದಲ್ಲಿದೆ. 350 ವರ್ಷಗಳಷ್ಟು ಹಳೆಯ ದಿಸ್ಕಿತ್ ಆಶ್ರಮ ಮತ್ತೊಂದು ಆಕರ್ಷಣೆ.
ಲೇಹ್ ವಿಮಾನ ನಿಲ್ದಾಣ ನುಬ್ರಾ ಕಣಿವೆಯಿಂದ 125 ಕಿಲೋ ಮೀಟರ್ ದೂರದಲ್ಲಿದೆ. ಲೇಹ್ ವಿಮಾನನಿಲ್ದಾಣ ಭಾರತದ ಉಳಿದ ವಿಮಾನ ನಿಲ್ದಾಣಗಳಿಗೂ ಸಂಪರ್ಕ ಕಲ್ಪಿಸುತ್ತದೆ. ಏರ್ ಪೋರ್ಟ್ ನಿಂದ ಸ್ಥಳೀಯ ಬಸ್ಸುಗಳು ಮತ್ತು ಟ್ಯಾಕ್ಸಿ ಸೌಲಭ್ಯಗಳಿವೆ. ಇನ್ನು 620 ಕಿ.ಮೀ ದೂರದಲ್ಲಿರುವ ಜಮ್ಮು ತಾವಿ ರೈಲ್ವೇ ನಿಲ್ದಾಣವು ನುಬ್ರಾಗೆ ಹತ್ತಿರದಲ್ಲಿರುವ ರೈಲ್ವೇ ನಿಲ್ದಾಣ. ಜಮ್ಮು ತಾವಿ ರೈಲ್ವೇ ಜಂಕ್ಷನ್ ಗೆ ಭಾರತದ ಪ್ರಮುಖ ನಗರಗಳಿಂದ ಸಂಪರ್ಕವಿದೆ. ಜಮ್ಮು ತಾವಿ ರೈಲ್ವೇ ನಿಲ್ದಾಣದಿಂದ ಲೋಕಲ್ ಬಸ್ಸು ಮತ್ತು ಕ್ಯಾಬ್ಸ್ ಗಳು ನುಬ್ರಾಗೆ ತಲುಪಲು ದೊರೆಯುತ್ತವೆ.