ಮಧ್ಯಪ್ರದೇಶದ ಪ್ರಮುಖ ಆಕರ್ಷಣೆಗಳಲ್ಲಿ ಒಂದಾಗಿರುವ ಗಾಂಧಿ ಸಾಗರ್ ಆಣೆಕಟ್ಟು, ನೀಮಚ್ ಸಮೀಪದ ಮಂದ್ಸುರ್ ಜಿಲ್ಲೆಯಲ್ಲಿದೆ. 1954 ಮಾರ್ಚ್ 7 ನೆ ತಾರೀಕಿನಂದು ಪಂಡಿತ್ ಜವಾಹರಲಾಲ್ ನೆಹರು ಅವರು ಅಡಿಗಲ್ಲು ಹಾಕಿದ ಈ ಆಣೆಕಟ್ಟು, ಚಂಬಲ್ ನದಿಗೆ ಕಟ್ಟಲಾಗಿರುವ ಮುಖ್ಯವಾದ ಅಣೆಕಟ್ಟಾಗಿದೆ. ಭಾರತದ ಎರಡನೇ ದೊಡ್ಡ ಜಲಾಶಯವಾಗಿರುವ ಗಾಂಧಿ ಸಾಗರ್ ಆಣೆಕಟ್ಟು, ಸಾವಿರಾರು ಸಂಖ್ಯೆಯ ವಲಸೆ ಹಕ್ಕಿಗಳ ಆಶ್ರಯತಾಣವಾಗಿದೆ. ಆದುದರಿಂದ ಈ ಜಲಾಶಯವನ್ನು ಅಂತಾರ್ರಾಷ್ಟ್ರೀಯ ಬರ್ಡ್ ಲೈಫ್ ಏಜನ್ಸಿ ಪ್ರಮಾಣೀಕರಿಸಿದೆ.  ಈ ಆಣೆಕಟ್ಟು 204 ಅಡಿ ಎತ್ತರ ಹಾಗೂ 514 ಅಡಿ ಉದ್ದವಿದೆ. ಇದರ ಬಲ ದಡದಲ್ಲಿ ಜಲ ವಿದ್ಯುತ್ ಸ್ಥಾವರವಿದೆ. ಈ ಅಣೆಕಟ್ಟಿನಿಂದ ಸೆಕೆಂಡ್ ಗೆ 21238 ಕ್ಯೂಬಿಕ್ ಮೀಟರ್ ಗಳಷ್ಟು ಹೆಚ್ಚುವರಿ ನೀರು ಹೊರಹೋಗುತ್ತದೆ. ಪ್ರವಾಸಿ ಹಾಗೂ ಸಂಶೋಧನೆ ವಿಭಾಗಗಳಲ್ಲಿ, ಗಾಂಧಿ ಸಾಗರ್ ಅಣೆಕಟ್ಟು ಪ್ರಮುಖ ಸ್ಥಾನವನ್ನು ಪಡೆದಿದೆ.