ಪೋಥನ್ಮೆಡು ಎಂಬುದು ಮುನ್ನಾರಿನಿಂದ 6 ಕಿ.ಮೀ ದೂರದಲ್ಲಿರುವ ಸುಂದರವಾದ ಒಂದು ಸಣ್ಣ ಹಳ್ಳಿಯಾಗಿದೆ. ಈ ಊರು ತನ್ನಲ್ಲಿರುವ ವೀಕ್ಷಣಾ ಸ್ಥಳಕ್ಕೆ ( ವ್ಯೂ ಪಾಯಿಂಟ್) ಹೆಸರುವಾಸಿಯಾಗಿದೆ. ಈ ಸ್ಥಳ ಮುನ್ನಾರಿಗೆ ಭೇಟಿ ಕೊಡುವ ಪ್ರತಿಯೊಬ್ಬ ಪ್ರವಾಸಿಗನು ನೋಡಲೆ ಬೇಕಾದ ಸ್ಥಳವಾಗಿದೆ. ಈ ಸ್ಥಳದಿಂದ ಮುನ್ನಾರಿನ ಬೆಟ್ಟ- ಗುಡ್ಡ, ಅದಕ್ಕೆ ಹೊಂದಿಕೊಂಡಿರುವ ಕಣಿವೆಗಳು ಮತ್ತು ಮಧುರಪುಳ ನದಿಯ ನಯನ ಮನೋಹರ ದೃಶ್ಯಗಳನ್ನು ನೋಡಲು ತುಂಬ ಸೊಗಸಾಗಿರುತ್ತದೆ. ಈ ವಿಹಂಗಮ ನೋಟವನ್ನು ವೀಕ್ಷಿಸುವ ಸ್ಥಳವು ಚಾರಣಿಗರಿಗೆ ಮತ್ತು ಪರಿಸರ ಪ್ರಿಯರನ್ನು ತನ್ನತ್ತ ಎಡೆಬಿಡದೆ ಆಕರ್ಷಿಸುತ್ತಿರುತ್ತದೆ.
ಈ ಹಳ್ಳಿಯು ತನ್ನಲ್ಲಿರುವ ಅಗಾಧ ವನಸಿರಿ ಮತ್ತು ವಿಶಾಲವಾದ ತೋಟಗಳಿಗಾಗಿ ಖ್ಯಾತಿ ಪಡೆದಿದೆ. ಏಲಕ್ಕಿ ಬೆಟ್ಟಗಳ ಮತ್ತು ಟೀ ತೋಟಗಳ ಪರಿಮಳವು ವಾತಾವರಣದಲ್ಲಿರುವ ಮೆಲುಗಾಳಿಯೊಂದಿಗೆ ಸೇರಿ ಇಲ್ಲಿಗೆ ಭೇಟಿಕೊಡುವವರನ್ನು ಮರುಳುಗೊಳಿಸುತ್ತದೆ. ಪ್ರವಾಸಿಗರು ಕಾಲ್ನಡಿಗೆ ಮೂಲಕ ಪೋಥನ್ಮೆಡು ವ್ಯೂ ಪಾಯಿಂಟಿಗೆ ಹೋಗಬಹುದು. ಅಲ್ಲದೆ ಈ ಕಾಲುದಾರಿಯು ನಿಜಕ್ಕು ಅವಿಸ್ಮರಣೀಯವಾಗಿರುತ್ತದೆ. ಪ್ರವಾಸಿಗರು ಛಾಯಗ್ರಹಣದಲ್ಲಿ ಆಸಕ್ತಿ ಹೊಂದಿದ್ದರೆ, ಈ ದಾರಿಯು ಚೆಲುವಿನ ಖನಿಯೆನ್ನುವಂತಹ ಸುಂದರ ದೃಶ್ಯಗಳನ್ನು ಒದಗಿಸುತ್ತದೆ.
ಝಿಗ್ಝಾಗ್ ಮಾದರಿಯ ರಸ್ತೆಗಳು ಮತ್ತು ಬೃಹತ್ ಬೆಟ್ಟಗಳು ಈ ಸ್ಥಳಕ್ಕೆ ಒಂದು ಭವ್ಯತೆಯನ್ನು ಒದಗಿಸಿವೆ. ಇಲ್ಲಿಗೆ ಭೇಟಿ ಕೊಡುವ ಪ್ರವಾಸಿಗರು ತಮಗೆ ಬೇಕಾದ ಆಹಾರ ಮತ್ತು ನೀರನ್ನು ತಮ್ಮ ಜೊತೆಯಲ್ಲಿಯೆ ತಂದು ಕೊಳ್ಳುವುದು ಉತ್ತಮ.