ಮಛು ನದಿ ದಡದಲ್ಲಿರುವ ಮೋರ್ಬಿ ದೇಶೀಯ ಸಂಪ್ರದಾಯ ಮತ್ತು ಯುರೋಪಿಯನ್ ಶೈಲಿಯ ವಾಸ್ತುಶಿಲ್ಪ ದ ಅದ್ಬುತ ಬೆಸುಗೆಗೆ ಉದಾಹರಣೆಯಾಗಿದೆ. ಈ ನಗರವನ್ನು ಪ್ರವೇಶಿಸಲೆಂದು ಇರುವ ತೂಗು ಸೇತುವೆಯನ್ನು ಬ್ರಿಟಿಷರ ಕಾಲದಲ್ಲಿ ಕಟ್ಟಲಾಗಿದ್ದು ಆ ಕಾಲದ ತಾಂತ್ರಿಕ ಪ್ರಗತಿಗೆ ಉದಾಹರಣೆಯಾಗಿದೆ. ಈ ನಗರವು 3 ಪ್ರವೇಶ ದ್ವಾರಗಳನ್ನು ಹೊಂದಿದ್ದು ಈ ಮೂರೂ ಬಾಗಿಲಿನಿಂದ ನಗರದ ಕೇಂದ್ರ ಹಸಿರು ಚೌಕವನ್ನು ಸುಲಭವಾಗಿ ತಲುಪಬಹುದು ಏಕೆಂದರೆ ಇದನ್ನು ಯುರೋಪಿಯನ್ ಶೈಲಿಯನ್ನು ಅನುಕರಿಸಿ ಕಟ್ಟಲಾಗಿದೆ.

ಸೇತುವೆಯ ಬಲಬದಿಯಲ್ಲಿ ದರ್ಬಾರ್ ಗಡ್ ಅಥವಾ ಹಳೆಯ ಅರಮನೆ ಇದ್ದು ಸುಂದರವಾದ ಪ್ರವೇಶ ದ್ವಾರವನ್ನು ಹೊಂದಿದೆ ಮತ್ತು ಪ್ರಸ್ತುತ ಇದನ್ನು ಹೆರಿಟೇಜ್ ಹೋಟೆಲ್ ಆಗಿ ಪರಿವರ್ತಿಸಲಾಗಿದೆ. ಇದಲ್ಲದೆ ಇಲ್ಲೇ ಮಣಿ ಮಂದಿರ ಎಂಬ ಹಿಂದೂ ದೇವಾಲಯವಿದ್ದು ಲಕ್ಷ್ಮೀ ನಾರಾಯಣ, ಮಹಾಕಾಳಿ, ರಾಮಚಂದ್ರ, ರಾಧಾಕೃಷ್ಣ ಮತ್ತು ಶಿವ ವಿಗ್ರಹಗಳನ್ನು ಇದು ಹೊಂದಿದೆ. ಈ ದೇವಾಲಯವನ್ನು ಜೈಪುರ ಕಲ್ಲಿನಿಂದ ಕೆತ್ತಲಾಗಿದ್ದು ರಾಜಸ್ಥಾನಿ ಶೈಲಿಯನ್ನು ಹೊಂದಿದೆ.

ಇಲ್ಲಿನ ವೆಲ್ಲಿಂಗ್ಟನ್ ಸಚಿವಾಲಯ ರಾಜಸ್ಥಾನಿ ಶೈಲಿಯ ಪ್ರಭಾವ ಪಡೆದಿದೆ. ನಂತರ ಯೂರೋಪಿನ ಆರ್ಟ್ ಡೆಕೊ ಚಳುವಳಿಯ ಪ್ರಭಾವ ಬಿಂಬಿಸುವ ಆರ್ಟ್ ಡಿಕೋ ಅರಮನೆ ಕೂಡ ಇಲ್ಲಿ ಕಾಣಬಹುದು. ಮೋರ್ಬಿ ಯುರೋಪಿಯನ್ ಮತ್ತು ರಾಜಸ್ಥಾನಿ ಶೈಲಿಯನ್ನು ಸಂಯೋಜಿಸಿ ನಿರ್ಮಿಸಲಾದ ರೈಲ್ವೇ ನಿಲ್ದಾಣವನ್ನು ಕೂಡ ಹೊಂದಿದೆ. ಮೋರ್ಬಿಗೆ ಹತ್ತಿರದ ವಿಮಾನ ನಿಲ್ದಾಣ ಅಹಮದಾಬಾದ್ ಮತ್ತು ಗುಜರಾತ್ ರಾಜ್ಯ ರಸ್ತೆ ಸಾರಿಗೆ ನಿಗಮವು ರಾಜ್ಯ ಸಾರಿಗೆ ಬಸ್ಸುಗಳ ಸೌಲಭ್ಯ ಕಲ್ಪಿಸಿವೆ.