ದಾಳಿಕೋರರಿಂದ ಮೇಡಕ್‌ ಪಟ್ಟಣವನ್ನು ರಕ್ಷಿಸುವ ಉದ್ದೇಶದಿಂದ ಕಾಕತೀಯ ಅರಸು ಮನೆತನದವರು ನಿರ್ಮಿಸಿದ ಕೋಟೆ ಐತಿಹಾಸಿಕ ಮಹತ್ವದ ತಾಣವಾಗಿದೆ. ಹೈದರಾಬಾದ್ ನಿಂದ 100 ಕಿಲೋಮೀಟರ್‌ ದೂರದಲ್ಲಿರುವ ಈ ಕೋಟೆಯನ್ನು 12 ನೇ ಶತಮಾನದಲ್ಲಿ ಕಾಕತೀಯ ದೊರೆ ಮಹಾರಾಜ ಪ್ರತಾಪ್‌ರುದ್ರನಿಂದ ಕಟ್ಟಲ್ಪಟ್ಟಿತು. ಇದನ್ನು ಮೆಥುಕು ದುರ್ಗ ಎಂದೂ ಕರೆಯಲಾಗುತ್ತಿತ್ತು.

ಕಾಕತೀಯ ಅರಸರ ನಂತರ ಬಂದ ಕುತುಬ್‌ಷಾಹಿಗಳು ಈ ಕೋಟೆಯನ್ನು ತಮ್ಮದಾಗಿಸಿಕೊಂಡರು. ತಮ್ಮ ವ್ಯಾಪಾರದ ಗೋದಾಮಿನಂತೆ ಈ ಕೋಟೆಯನ್ನು ಬಳಸಿಕೊಂಡರು. ಹಲವು ಐತಿಹಾಸಿಕ ಮಹತ್ವದ ಘಟನೆಗಳು ಈ ಕೋಟೆಯಲ್ಲಿ ಸಂಭವಿಸಿವೆ. 17 ನೇ ಶತಮಾನದಲ್ಲಿ ಈ ಕೋಟೆಯೊಳಗೆ ನಿರ್ಮಿಸಿದ ಮಸೀದಿ ಜನಾಕರ್ಷಣೆಯ ಕೇಂದ್ರವಾಗಿದೆ. ಇಲ್ಲಿನ ಇನ್ನೊಂದು ಪ್ರಮುಖ ಆಕರ್ಷಣೆಯೆಂದರೆ 3.2 ಮೀಟರ್‌ ಉದ್ದದ ಫಿರಂಗಿ. ಈ ಕೋಟೆಯ ಮೇಲೆ ನಿಂತು  ಇಡೀ ಪಟ್ಟಣವನ್ನು ನೋಡಬಹುದಾಗಿದೆ. ಈ ಸುಂದರ ದೃಶ್ಯವನ್ನು ನೋಡುವ ಸಲುವಾಗಿಯೇ ಹೆಚ್ಚಿನ ಸಂಖ್ಯೆಯಲ್ಲಿ ಪ್ರವಾಸಿಗರು ಇಲ್ಲಿಗೆ ಆಗಮಿಸುತ್ತಾರೆ.