ಬಾಜ್ ಬಹಾದ್ದೂರ್ ಅರಮನೆಯು ತನ್ನ ಅತ್ಯದ್ಬುತ ದೃಶ್ಯಾವಳಿಗಳೊಂದಿಗೆ  ಪ್ರಪಂಚದಾದ್ಯಂತ ಪ್ರವಾಸಿಗರನ್ನು ಆಕರ್ಷಿಸುತ್ತದೆ. ದೊಡ್ಡ ಅಂಗಳ, ದೊಡ್ಡ ಕೋಣೆಗಳು ಮತ್ತು ತಾರಸಿಗಳುಳ್ಳ ಇದು, 16 ನೇ ಶತಮಾನದ ಕಟ್ಟಡ. ರೂಪಮತಿ ಮಹಲ್ಲಿನ ಅಂಗಳದಿಂದ ಈ ಅರಮನೆಯನ್ನು ಆರಾಮವಾಗಿ ನೋಡಬಹುದು.

ಬಾಜ್ ಬಹಾದ್ದೂರ್ ಮತ್ತು ರೂಪಮತಿಯರ ಇನ್ನುಳಿದ ಅರ್ಧ ಭಾಗದ ಪ್ರೇಮ ಕಥೆಯನ್ನು ಇದು ಬಿಂಬಿಸುತ್ತದೆ. ಕಾಲದ ಹೊಡೆತಕ್ಕೆ ಈ ಅರಮನೆ ಸಿಲುಕಿದೆಯಾದರೂ ಇದರ ಅಂಗಳದಲ್ಲಿ ನಡೆದು ಹೋಗುವಾಗ ಆ ಗತಕಾಲದ ಕೆಲವು ವಿಶೇಷತೆಗಳನ್ನು ಪ್ರವಾಸಿಗರು ತಮ್ಮ ಮನ ಪಟಲದಲ್ಲಿ ಅರಿಯಲು ಉತ್ತಮ ಅವಕಾಶವನ್ನು ಒದಗಿಸುತ್ತದೆ.

ಅರಮನೆ ಮುಂಭಾಗದ ಉದ್ಯಾನವಂತೂ ಮೈಮನ ಸೆಳೆಯುವುದರಲ್ಲಿ ಸಂಶಯವಿಲ್ಲ.  1509 ರಲ್ಲಿ ನಿರ್ಮಿಸಲ್ಪಟ್ಟ ಈ ಅರಮನೆಯಲ್ಲಿ ಹಲವು ಕೊಠಡಿಗಳಿದ್ದು, ಇಲ್ಲಿಯೆ ಸುಮಾರು 1555 ರಿಂದ 1561 ರ ವರೆಗೆ ಬಾಜ್ ಬಹಾದ್ದೂರ್ ಕಾರ್ಯಕಲಾಪವನ್ನು ನಡೆಸುತ್ತಿದ್ದನು. ಗತಕಾಲದ ಕಲೆ ಹಾಗು ವಾಸ್ತುಶಿಲ್ಪದ ವಿವರಣೆಗೆ ಇದೊಂದು ಉತ್ತಮ ಉದಾಹರಣೆಯಾಗಿ ನಿಲ್ಲುತ್ತದೆ.