ಸೆಂಟ್.ಮೇರೀಸ್ ಚರ್ಚ್ ಕುಮರಕೊಮ್ ಬಳಿಯಲ್ಲಿರುವ ಅತ್ಯಂತ ಪ್ರಸಿದ್ಧ ಕ್ರೈಸ್ತರ ಆರಾಧನಾ ಸ್ಥಳವಾಗಿದೆ. ಇದು ಕೊಟ್ಟಾಯಂನಿಂದ 12 ಕಿ.ಮೀ ದೂರದಲ್ಲಿದೆ. ಈ ಚರ್ಚ್ 1579ರಲ್ಲಿ ನಿರ್ಮಿಸಲ್ಪಟ್ಟಿತು. ತನ್ನೊಳಗೆ ಹಲವು ಶತಮಾನಗಳಷ್ಟು ಇತಿಹಾಸವನ್ನು ಅಡಗಿಸಿಕೊಂಡಿರುವ ಇದು ಮಲಂಕರ ಸಂಪ್ರದಾಯದ ಕ್ರೈಸ್ತರಿಗೆ ಅತ್ಯಂತ ಪವಿತ್ರ ಸ್ಥಳವಾಗಿದೆ.
ಇತಿಹಾಸದ ಪ್ರಕಾರ ಈ ಚರ್ಚನ್ನು ಕ್ನಾನಯ ಕ್ರೈಸ್ತರು ಮತ್ತು ವಡಕ್ಕುಂ ಭಗರ್ ಎಂಬ ಎರಡು ಗುಂಪುಗಳ ನಡುವೆ ಏರ್ಪಟ್ಟ ಭಿನ್ನಾಭಿಪ್ರಾಯಕ್ಕೆ ಪರಿಹಾರಾತ್ಮಕವಾಗಿ ನಿರ್ಮಿಸಲಾಯಿತಂತೆ. ಈ ಭಿನ್ನಾಭಿಪ್ರಾಯವನ್ನು ಆಗ ಇಲ್ಲಿನ ರಾಜನಾಗಿದ್ದ ತೆಕ್ಕುಂಕೂರ್ ರಾಜನು ಪರಿಹರಿಸ್ ವಡಕ್ಕುಂ ಭಗರ್ ಗುಂಪಿಗೆ ಭೂಮಿಯನ್ನು ದಾನ ಮಾಡಿ ಹೊಸ ಚರ್ಚ್ ನಿರ್ಮಿಸಲು ಸಹಾಯ ಮತ್ತು ಮಾರ್ಗದರ್ಶನವನ್ನು ನೀಡಿದನಂತೆ. ಹಾಗೆ ರೂಪುಗೊಂಡಿದ್ದೆ ಈ ಚರ್ಚ್.
ಈ ಚರ್ಚ್ ತನ್ನ ಅನುಪಮವಾದ ವಾಸ್ತುಶಿಲ್ಪದಿಂದಾಗಿ ಕಲಾಸಕ್ತರನ್ನು ಮತ್ತು ಪ್ರವಾಸಿಗರನ್ನು ತನ್ನತ್ತ ಆಕರ್ಷಿಸುತ್ತಿದೆ. ಇದರ ವಾಸ್ತುಶಿಲ್ಪ ಶೈಲಿಯು ಕೇರಳ ಮತ್ತು ಪೋರ್ಚುಗೀಸ್ ಶೈಲಿಯ ಸಂಯೋಜನೆಯನ್ನು ಒಳಗೊಂಡಿದೆ. ಚರ್ಚಿನ ಗೋಡೆಗಳಲ್ಲಿ ಚಿತ್ರಿಸಲಾಗಿರುವ ಚಿತ್ರಗಳು ಕ್ರೈಸ್ತ ಮತ್ತು ಕ್ರೈಸ್ತೇತರ ಅಂಶಗಳನ್ನು ಒಳಗೊಂಡಿವೆ. ಈ ಚರ್ಚಿನಲ್ಲಿ ನಡೆಯುವ ಪ್ರಮುಖ ವಾರ್ಷಿಕ ಉತ್ಸವವೆಂದರೆ ವಿಥುಕಲುಡೆ ಪೆರುನ್ನಾಳ್ (ಬೀಜಗಳ ಹಬ್ಬವೆಂದು ಸಹ ಕರೆಯಲ್ಪಡುತ್ತದೆ) . ಇದನ್ನು ಪ್ರತಿ ವರ್ಷ ಜನವರಿ 15ರಂದು ಆಚರಿಸುತ್ತಾರೆ.