ಪ್ರವಾಸಿಗರು ಕೋಲಾರ ಜಿಲ್ಲೆಗೆ ಹೋದಾಗೊಮ್ಮೆ ಅವನಿ ಗ್ರಾಮಕ್ಕೆ ಒಮ್ಮೆ ಭೇಟಿ ಕೊಡಬಹುದು. ಈ ಊರು ತನ್ನಲ್ಲಿನ ರಾಮಲಿಂಗೇಶ್ವರ ದೇವಾಲಯಗಳ ಸಮೂಹದಿಂದಾಗಿ ಹೆಸರುವಾಸಿಯಾಗಿದೆ. ಅವನಿಯು ದಕ್ಷಿಣದ ಗಯಾ ಎಂದು ಸಹಾ ಖ್ಯಾತಿ ಪಡೆದಿದೆ. ಇದು ಕೋಲಾರ ಗೋಲ್ಡ್ ಫೀಲ್ಡ್ಸ್ ( ಕೆ.ಜಿ.ಎಫ್) ನಿಂದ 10 ಕಿ.ಮೀ ದೂರದಲ್ಲಿದೆ. ಈ ಊರಿನಲ್ಲಿ ಸೀತಾದೇವಿಗಾಗಿ ಕಟ್ಟಲಾದ ಒಂದು ದೇವಾಲಯವಿದೆ. ಇದು ಈ ದೇವಿಗಾಗಿ ಕಟ್ಟಲಾದ ಒಂದು ಅಪರೂಪದ ದೇವಾಲಯವಾಗಿದೆ.ಪುರಾಣಗಳ ಪ್ರಕಾರ ಸೀತಾದೇವಿಯು ಅವನಿ ಗ್ರಾಮದಲ್ಲಿಯೆ ಲವ-ಕುಶರಿಗೆ ಜನ್ಮನೀಡಿದಳಂತೆ, ಅಲ್ಲದೆ ಇದೇ ಗ್ರಾಮದಲ್ಲಿಯೇ ರಾಮನು ತನ್ನ ಇಬ್ಬರು ಮಕ್ಕಳ ಜೊತೆ ಯುದ್ಧ ಮಾಡಿದನಂತೆ. ಪ್ರವಾಸಿಗರು ಇಲ್ಲಿ ಲವ-ಕುಶರು ಜನಿಸಿದ ಕೋಣೆಯನ್ನು ಕಾಣಬಹುದು. ರಾಮಾಯಣ ಮಹಾಕಾವ್ಯ ರಚಿಸಿದ ಮಹರ್ಷಿ ವಾಲ್ಮೀಕಿ ಇಲ್ಲಿ ಆಶ್ರಮವನ್ನು ಕಟ್ಟಿಕೊಂಡು ಕೆಲ ಕಾಲ ತಂಗಿದ್ದನೆಂದು ಇಲ್ಲಿನ ಸ್ಥಳೀಯರ ನಂಬಿಕೆಯಾಗಿದೆ.ಅವನಿ ಮೂಲಕ ಹಾದು ಹೋಗುವ ಪ್ರವಾಸಿಗರು ಇಲ್ಲಿನ ಅವನಿ ಜಗುದ್ಗುರು ಶಂಕರಾಚಾರ್ಯ ಶಾರದಾ ಪೀಠಕ್ಕೆ ಭೇಟಿಕೊಡುತ್ತಾರೆ. ಈ ಮಠವನ್ನು ಪೂಜ್ಯ ಯತಿಗಳಾದ ಶ್ರೀ ನಾಲ್ವಡಿ ನರಸಿಂಹ ಭಾರತಿಯವರು ಇಲ್ಲಿ ಶಾರದಾ ದೇವಿಯ ಮೂರ್ತಿಯನ್ನು ಕಂಡುಹಿಡಿದ ಮೇಲೆ ಇಲ್ಲಿ ಸ್ಥಾಪಿಸಿದರು. ಈ ಮಠವು ನಿಂತ ಭಂಗಿಯಲ್ಲಿರುವ ದೇವಿಯ ಮೂರ್ತಿಯನ್ನು ಹೊಂದಿದೆ. ಅದರ ಪಾರ್ಶ್ವದಲ್ಲಿಯೆ ಶ್ರೀ ಚಕ್ರ ಮತ್ತು ಶ್ರೀ ಮದ್ ಜಗದ್ಗುರು ಶಂಕರಾಚಾರ್ಯರ ಮೂರ್ತಿಗಳು ಇವೆ.. ಅವನಿಗೆ ಭೇಟಿಕೊಡುವ ಪ್ರವಾಸಿಗರು ಇಲ್ಲಿ ಚಾರಣ ಮತ್ತು ಶಿಲಾರೋಹಣ ಇಲ್ಲವೆ ಪರ್ವತಾರೋಹಣಗಳಲ್ಲಿ ಪಾಲ್ಗೋಳ್ಳಬಹುದು.