ರನೆಹ್ ಜಲಪಾತವು ಖಜುರಾಹೊ ಪಟ್ಟಣದಿಂದ 22 ಕಿ.ಮೀ ದೂರದಲ್ಲಿರುವ ಛತ್ರಪುರ್ ಜಿಲ್ಲೆಯಲ್ಲಿ ನೆಲೆಗೊಂಡಿದೆ. ಈ ಜಲಪಾತವು ನೋಡಲು ಅತ್ಯಂತ ಭವ್ಯವಾಗಿದ್ದು, ಕೆ ನದಿಯಿಂದ ಉದ್ಭವವಾಗುತ್ತದೆ. ಈ ಕೆನ್ ನದಿಯು 5 ಕಿ.ಮೀ ಉದ್ದ ಮತ್ತು 30 ಮೀಟರ್ ಆಳವಿರುವ ಒಂದು ದೊಡ್ಡ ಕಮರಿಯನ್ನು ನಿರ್ಮಾಣ ಮಾಡಿದೆ. ಈ ಕಮರಿಯು ಸ್ಫಟಿಕದಂತಹ ಗ್ರಾನೈಟ್ ಕಲ್ಲುಗಳಿಂದ ನಿರ್ಮಾಣಗೊಂಡಿದೆ. ಈ ಕಲ್ಲುಗಳು ನೇರಳೆ ಬಣ್ಣದಿಂದ ಹಿಡಿದು ಬೂದು ಬಣ್ಣದವರೆಗೆ ಹಲವು ಬಗೆಯ ಬಣ್ಣಗಳನ್ನು ಪ್ರತಿಫಲಿಸುತ್ತದೆ.
ಈ ಕಮರಿಯಲ್ಲಿ ಬೇರೆ ಬೇರೆ ಗಾತ್ರದ ಹಲವು ಜಲಪಾತಗಳು ಧುಮ್ಮಿಕ್ಕುತ್ತವೆ. ಇವುಗಳಲ್ಲಿ ಕೆಲವು ವರ್ಷಪೂರ್ತಿ ಕಾಣ ಸಿಕ್ಕರೆ, ಕೆಲವು ಬೇಸಿಗೆಯಲ್ಲಿ ಮರೆಯಾಗಿ, ಮಳೆಗಾಲಗಳಲ್ಲಿ ಮಾತ್ರ ತಮ್ಮ ಪ್ರತಾಪ ತೋರುವ ಜಲಪಾತಗಳಾಗಿವೆ. ರನೆಹ್ ಜಲಪಾತವು ಪನ್ನ ರಾಷ್ಟ್ರೀಯ ಉದ್ಯಾನವನಕ್ಕೆ ಹೊಂದಿಕೊಂಡಂತಿದೆ. ಈ ಸ್ಥಳದ ಸೌಂದರ್ಯವು ತನ್ನ ಭವ್ಯತೆಯಿಂದಾಗಿ ಗಮನ ಸೆಳೆಯುತ್ತದೆ. ಇಲ್ಲಿನ ಕಾಡಿನ ಹಚ್ಚ ಹಸಿರು, ಮತ್ತು ಜಲಪಾತದಲ್ಲಿ ಜುಳು ಜುಳು ಎಂದು ಹರಿಯುವ ನೀರು ಎರಡೂ ಸೇರಿ ಈ ಸ್ಥಳವನ್ನು ನಯನಮನೋಹರವನ್ನಾಗಿ ಮಾಡಿವೆ.ರನೆಹ್ ಜಲಪಾತಕ್ಕೆ ಭೇಟಿ ಕೊಡುವ ಪ್ರವಾಸಿಗರು ತಮ್ಮೊಂದಿಗೆ ಅದ್ಭುತವಾದ ನೆನಪುಗಳನ್ನು ಕೊಂಡೊಯ್ಯುತ್ತಾರೆ ಎಂಬುದರಲ್ಲಿ ಸಂಶಯವಿಲ್ಲ.