1509 ರಲ್ಲಿ ನಿರ್ಮಿಸಲಾದ ಚಂದ್ರಪ್ರಭು ದೇವಾಲಯವು ಜೈಸಲ್ಮೇರ್ ಕೋಟೆಯ ಒಳಭಾಗದಲ್ಲಿ ನೆಲೆಗೊಂಡಿದೆ. ಈ ದೇವಾಲಯವನ್ನು ಎಂಟನೆ ಜೈನ ತೀರ್ಥಂಕರರಾದ ಚಂದ್ರಪ್ರಭುಗಳಿಗಾಗಿ ನಿರ್ಮಿಸಲಾಗಿದೆ. ಅಲ್ಲದೆ ಇದು ದೇಶದ ಏಳು ಪ್ರಮುಖ ಜೈನ ದೇವಾಲಯಗಳಲ್ಲಿ ಒಂದೆಂದು ಹೆಸರುವಾಸಿಯಾಗಿದೆ. ಕೆಂಪಗಲ್ಲಿನ ಈ ದೇವಾಲಯ ರಜಪೂತರ ವಾಸ್ತು ಶೈಲಿಗೆ ಖ್ಯಾತಿ ಪಡೆದಿದೆ. ಅತ್ಯಂತ ಸೂಕ್ಷ್ಮವಾದ ಕೆತ್ತನೆಗಳು, ರೇಖಾಗಣಿತದ ವಿನ್ಯಾಸಗಳು ಮತ್ತು ಗುಡಿಯ ಮುಂಭಾಗವು ಇಲ್ಲಿನ ಒಟ್ಟು ಅಂದವನ್ನು ಇಮ್ಮಡಿಗೊಳಿಸಿವೆ.