ಕಮಲಾ ನೆಹರೂ ಉದ್ಯಾನವನವು ಇಂದೋರಿನಲ್ಲಿರುವ ಒಂದು ಮೃಗಾಲಯವಾಗಿದೆ. ವಿಸ್ತಾರವಾಗಿ ಹರಡಿರುವ ಈ ಮೃಗಾಲಯವು ಇಂದೋರಿನ ಅತ್ಯಂತ ಜನಪ್ರಿಯ ಪ್ರವಾಸಿ ತಾಣವಾಗಿ ಗುರುತಿಸಲ್ಪಟ್ಟಿದೆ. ಸ್ಥಳೀಯರ ವಲಯದಲ್ಲಿ ಚಿಡಿಯಾ ಘರ್ ಎಂದೆ ಕರೆಯಲ್ಪಡುವ ಈ ಉದ್ಯಾನವನವು ಖನ್ ನದಿಯ ಪಕ್ಕದಲ್ಲಿ, ಸ್ವಾಭಾವಿಕ ವಾತಾವರಣದಲ್ಲಿ ತಲೆ ಎತ್ತಿದೆ. ಈ ಮೃಗಾಲಯದ ಒಳಗೆ ಹಲವಾರು ಬಗೆಯ ಪಕ್ಷಿ ಮತ್ತು ಪ್ರಾಣಿಗಳು ಇವೆ.

ಈ ಮೃಗಾಲಯದ ವೈಶಿಷ್ಟ್ಯವೇನೆಂದರೆ ಇಲ್ಲಿ ಹುಲಿ ಮತ್ತು ಅದರ ಮರಿಗಳನ್ನು ಅವುಗಳಿಗೆ ಅನುಕೂಲವಾಗುವ ನೈಜ ವಾತಾವರಣದಲ್ಲಿ ಇರಿಸಲಾಗಿದೆ. ಇದರ ಜೊತೆಗೆ ಈ ಮೃಗಾಲಯದಲ್ಲಿ ಪ್ರಾಣಿ ಮತ್ತು ಸಸ್ಯಗಳನ್ನು ಅವುಗಳ ಪ್ರಾಕೃತಿಕ ವಾತಾವರಣವನ್ನು ಪುನರ್ ಕಲ್ಪಿಸಿ ,ಅವುಗಳ ವಂಶಾಭಿವೃದ್ಧಿ ಮಾಡುವ ಪ್ರಕ್ರಿಯೆಯನ್ನು ಕೈಗೊಳ್ಳಲಾಗುತ್ತಿದೆ. ಇಲ್ಲಿ ಆನೆ ಸವಾರಿ, ಕುದುರೆ ಸವಾರಿ ಮತ್ತು ಒಂಟೆ ಸವಾರಿಗಳಿಗೆ ಅವಕಾಶವಿದೆ. ಅಲ್ಲದೆ ಇಲ್ಲಿ ಚಿಕ್ಕ ಮಕ್ಕಳಿಗೆ ಆಟವಾಡಲು ಸ್ಥಳಾವಕಾಶವಿದೆ. ನಿಮ್ಮೊಂದಿಗೆ ಮಕ್ಕಳು ಬರುವುದಿದ್ದರೆ, ಈ ಸುಂದರವಾದ ಚಿಕ್ಕ ಉದ್ಯಾನವನವು ನಿಮಗೆ ಆನಂದವನ್ನುಂಟು ಮಾಡುವುದರಲ್ಲಿ ಯಾವುದೇ ಸಂಶಯವಿಲ್ಲ.