ಗೋಮಟ್ಗಿರಿಯು ಬೆಟ್ಟಗಳ ನಡುವೆ ಇರುವ ಪ್ರಾಕೃತಿಕ ಪರಿಸರದ ನಡುವೆ ನೆಲೆಗೊಂಡಿದೆ. ಈ ದೇವಾಲಯವು ಜೈನ ಸಮುದಾಯಕ್ಕೆ ಸೇರಿದುದಾಗಿದೆ. ಈ ದೇವಾಲಯವು ಗೊಮ್ಮಟೇಶ್ವರ ಅಥವಾ ಬಾಹುಬಲಿಯ ಬೃಹತ್ ವಿಗ್ರಹಕ್ಕೆ ಹೆಸರುವಾಸಿಯಾಗಿದೆ. ಈ ವಿಗ್ರಹದ ಎತ್ತರವು 21 ಅಡಿಯಾಗಿದ್ದು, ಶ್ರವಣಬೆಳಗೊಳದ ಗೊಮ್ಮಟೇಶ್ವರನ ವಿಗ್ರಹವನ್ನು ಇದು ಹೋಲುತ್ತದೆ. ಗೋಮಟ್ಗಿರಿಯಲ್ಲಿ 24 ತೀರ್ಥಂಕರರಿಗಾಗಿ ನಿರ್ಮಿಸಲಾಗಿರುವ 24 ಅಮೃತಶಿಲೆಯ ದೇವಾಲಯಗಳು ಇವೆ. ಈ ದೇವಾಲಯಗಳು ಎಂತಹವರನ್ನು ಮಂತ್ರಮುಗ್ಧಗೊಳಿಸುತ್ತವೆ.
ಅಮೃತಶಿಲೆಯಲ್ಲಿ ನಿರ್ಮಿಸಲಾಗಿರುವ ಮುಖ್ಯದೇವಾಲಯವು ಶಾಂತಿ ಮತು ಪ್ರಾಕೃತಿಕ ಸೌಂದರ್ಯಕ್ಕೆ ಮತ್ತೊಂದು ಹೆಸರಾಗಿ ನಿಂತಿದೆ. ಹಾಗಾಗಿ ಈ ದೇವಾಲಯವು ಧ್ಯಾನ ಮಾಡಲು ಮತ್ತು ಶಾಂತತೆಯನ್ನು ಆನಂದಿಸಲು ಹೇಳಿ ಮಾಡಿಸಿದ ಜಾಗವಾಗಿದೆ. ಗೊಮಟ್ಗಿರಿಯು ವಾರಾಂತ್ಯಗಳಲ್ಲಿ ಕುಟುಂಬದೊಂದಿಗೆ ಪ್ರಶಾಂತತೆಯನ್ನು ಆನಂದಿಸಲು ಇರುವ ಅತ್ಯುತ್ತಮ ಸ್ಥಳವಾಗಿದೆ. ಈ ಸ್ಥಳದಲ್ಲಿ ಪ್ರವಾಸಿಗರಿಗೆ ಬೇಕಾದ ಅತಿಥಿ ಗೃಹ, ಉಪಾಹಾರ ಗೃಹ ಮತ್ತು ಧರ್ಮಶಾಲಾಗಳಂತಹ ಎಲ್ಲ ವ್ಯವಸ್ಥೆಗಳು ಇವೆ.