ಮೆಕ್ಕಾ ಮಸೀದಿಯು ಹೈದರಬಾದಿನ ಹಳೆಯ ಮಸೀದಿಯೆಂದಷ್ಟೇ ಅಲ್ಲದೆ ದೇಶದ ಅತ್ಯಂತ ದೊಡ್ಡ ಮಸೀದಿಗಳಲ್ಲಿ ಒಂದು ಎಂಬ ಖ್ಯಾತಿಗೆ ಪಾತ್ರವಾಗಿದೆ. ಈ ಮಸೀದಿಯನ್ನು ಮುಸಲ್ಮಾನರ ಧಾರ್ಮಿಕ ಕೇಂದ್ರವಾಗಿಯಷ್ಟೇ ಅಲ್ಲದೆ, ಐತಿಹಾಸಿಕ ಮಹತ್ವದಿಂದಲು ಮತ್ತು ಪಾರಂಪರಿಕ ಕಟ್ಟಡ ಎಂಬ ದೃಷ್ಟಿಯಿಂದಲು ರಾಜ್ಯ ಸರ್ಕಾರವು ಇದನ್ನು ತನ್ನ ನಿರ್ವಹಣೆಯಲ್ಲಿ ಇರಿಸಿಕೊಂಡಿದೆ.
ಈ ಮಸೀದಿಯು ಚಾರ್ ಮಿನಾರ್ ಮತ್ತು ಚೌಮಹಲ್ಲ ಅರಮನೆಯಂತಹ ಪ್ರಸಿದ್ಧ ಪ್ರವಾಸಿ ತಾಣಗಳಿಗೆ ಸಮೀಪದಲ್ಲಿ ನೆಲೆಗೊಂಡಿದೆ. ಮಹಮ್ಮದ್ ಖುಲಿ ಖುತುಬ್ ಷಾಹ್ ಈ ಮಸೀದಿಯನ್ನು 16 ನೇ ಶತಮಾನದಲ್ಲಿ ಕಟ್ಟಲು ಪ್ರಾರಂಭಿಸಿದನು. ಈ ಮಸೀದಿಯನ್ನು ಕಟ್ಟಲು ಬಳಸಿದ ಇಟ್ಟಿಗೆಗಳಿಗೆ ಮಣ್ಣನ್ನು ಮೆಕ್ಕಾದಿಂದ ತರಲಾಯಿತಂತೆ. ಈ ಇಟ್ಟಿಗೆಗಳನ್ನು ಇಲ್ಲಿನ ಕೇಂದ್ರಭಾಗದ ಕಮಾನು ಕಟ್ಟಲು ಬಳಸಲಾಗಿದೆ. ಈ ಮಸೀದಿಯು ಖುಲಿ ಖುತುಬ್ ಷಾಹ್ ಸ್ಥಾಪಿಸಿದ ಸಾಮ್ರಾಜ್ಯದ ಅಕ್ಷರಶಃ ಕೇಂದ್ರ ಭಾಗದಲ್ಲಿ ನೆಲೆಗೊಂಡಿದೆ. ಈ ಮಸೀದಿಯ ಕುರಿತಾಗಿ ಮತ್ತೂ ಆಸಕ್ತಿ ಕೆರಳಿಸುವ ಸಂಗತಿಯೆಂದರೆ ಇದರ ಆವರಣದಲ್ಲಿರುವ ಕೋಣೆ. ನಂಬಿಕೆಗಳ ಪ್ರಕಾರ ಈ ಕೋಣೆಯಲ್ಲಿ ಇಸ್ಲಾಂ ಧರ್ಮದ ಪ್ರವಾದಿ ಮಹಮ್ಮದ್ರ ಕೂದಲನ್ನು ಸಂರಕ್ಷಿಸಿ ಇಡಲಾಗಿದೆಯಂತೆ.