ಆನಂದ ಬುದ್ಧ ವಿಹಾರವು ಒಂದು ವಿಶಿಷ್ಟವಾದ ಬೌದ್ಧ ದೇವಾಲಯವಾಗಿದ್ದು, ಹೈದರಬಾದ್‍ನ ಒಂದು ಸಣ್ಣ ಗುಡ್ಡದ ಮೇಲೆ ನೆಲೆಗೊಂಡಿದೆ. ಮೊಟ್ಟ ಮೊದಲ ಬಾರಿಗೆ ಈ ದೇವಾಲಯವನ್ನು ನೋಡುವವರು ಮಂತ್ರ ಮುಗ್ಧರಾಗುತ್ತಾರೆ. ಈ ಸಣ್ಣ ಗುಡ್ಡವನ್ನು ನೀವು ಹತ್ತಿ ದೇವಾಲಯವನ್ನು ತಲುಪಿದರೆ ನೀವು  ಈದೇವಾಲಯದ ಅದ್ಭುತ ಭವ್ಯತೆಯನ್ನು ನೋಡಿ ಆನಂದಿಸಬಹುದು. ಈ ಗುಡ್ಡದ ಮೇಲಿನಿಂದ ನೀವು ಈ ನಗರದ ಸಂಪೂರ್ಣ ವಿಹಂಗಮ ನೋಟವನ್ನು ನೋಡಿ ತಣಿಯಬಹುದು. ಬುದ್ಧ ಮತ್ತು ಬೌದ್ಧ ಧರ್ಮವನ್ನು ಗಮನದಲ್ಲಿರಿಸಿಕೊಂಡು ಇದನ್ನು ಸುಂದರವಾದ ಶೈಲಿ ಮತ್ತು ವಾಸ್ತುಶಿಲ್ಪದಿಂದ ನಿರ್ಮಿಸಲಾಗಿದೆ.

ಈ ದೇವಾಲಯವು ಒಂದು ದೊಡ್ಡ ಹಜಾರವನ್ನು ಹೊಂದಿದೆ. ಇದಕ್ಕೆ ನೈಸರ್ಗಿಕವಾದ ಬೆಳಕನ್ನು ಬಳಸಿ ಬೆಳಕನ್ನು ನೀಡಲಾಗುತ್ತದೆ. ಇಲ್ಲಿ ದೊಡ್ಡದಾದ ಫ್ರೆಂಚ್ ಶೈಲಿಯ ಕಿಟಕಿಗಳಿಂದ ಬೆಳಕು ಬರುವಂತೆ ವ್ಯವಸ್ಥೆ ಮಾಡಲಾಗಿದೆ. ಈ ದೇವಾಲಯದ ಪ್ರತಿ ಗೋಡೆ, ಪ್ರತಿ ಮೂಲೆಯಲ್ಲು ಶಾಂತಿ ಅನುರಣಿಸುತ್ತಿರುತ್ತದೆ. ಈ ದೇವಾಲಯದ ಒಳಗಡೆ ನೀವು ಪ್ರವೇಶಿಸಿದ ಕೂಡಲೆ ನಗರದ ಎಲ್ಲ ಜಂಜಡಗಳನ್ನು ನೀವು ಮರೆತು ನೆಮ್ಮದಿಯನ್ನು ಪಡೆಯುವಿರಿ. ಈ ದೇವಾಲಯದ ಹಜಾರದಲ್ಲಿ ಒಂದು ದೊಡ್ಡ ಚಿನ್ನದ ಬುದ್ಧನ ವಿಗ್ರಹವನ್ನು ಇಡಲಾಗಿದೆ. ಅದರ ಸುತ್ತಲು ಹಲವು ಭಕ್ತಾಧಿಗಳು ಧ್ಯಾನ ಮಗ್ನರಾಗಿರುವುದನ್ನು ನೀವು ಕಾಣಬಹುದು.